లోకల్ గైడ్ హైదరాబాద్: ప్రత్యేక రాష్ట్రంగా ఏర్పడిన 2014 నుంచి తెలంగాణ ఆర్థికంగా వేగంగా అభివృద్ధి చెందుతోంది. ఐటీ, గ్లోబల్ కెపాబిలిటీ సెంటర్లు (GCCs), ఫార్మాస్యూటికల్స్, లైఫ్ సైన్సెస్, డేటా సెంటర్లు, ఆర్టిఫిషియల్ ఇంటెలిజెన్స్ (AI), బ్యాటరీలు, ఎలక్ట్రిక్ వాహనాల రంగాలు రాష్ట్ర ఆర్థిక వృద్ధికి ప్రధాన చోదకశక్తులుగా మారుతున్నాయి.

అయితే ఈ వేగవంతమైన వృద్ధితో పాటు నీటి కొరత, పెరుగుతున్న అప్పులు, యువత నిరుద్యోగం, భూసేకరణ, భారీ మౌలిక సదుపాయాల ప్రాజెక్టులపై స్థానిక వ్యతిరేకత వంటి సవాళ్లు కూడా తెలంగాణ ముందున్నాయి.

పదేళ్లలో మూడింతలు పెరిగిన తలసరి ఆదాయం

2014లో తెలంగాణ తలసరి ఆదాయం సుమారు ₹1.24 లక్షలు ఉండగా, దశాబ్ద కాలంలో అది సుమారు ₹4.18 లక్షలకు చేరింది. అంటే తలసరి ఆదాయం మూడు రెట్లకు పైగా పెరిగింది.

ప్రపంచ బ్యాంకు ఆదాయ సూచికల ప్రకారం, ఈ కాలంలో ఎగువ-మధ్య ఆదాయ స్థాయికి (Upper-Middle Income) చేరిన భారత రాష్ట్రాల్లో తెలంగాణ కూడా ఒకటిగా నిలిచింది.

దేశ జీడీపీలో తెలంగాణ వాటా సుమారు 5 శాతం వరకు ఉందని అంచనాలు సూచిస్తున్నాయి. జాతీయ సగటుతో పోలిస్తే రాష్ట్ర స్థూల దేశీయోత్పత్తి (GSDP) కూడా పలు సంవత్సరాల్లో వేగంగా పెరిగింది.

బెంగళూరుకు పోటీగా హైదరాబాద్

తెలంగాణ ఆర్థిక వ్యవస్థకు ఐటీ రంగం ఇప్పటికీ కీలక ఆధారం. ముఖ్యంగా హైదరాబాద్, దేశంలోని ప్రముఖ టెక్నాలజీ కేంద్రంగా తన స్థానాన్ని మరింత బలోపేతం చేసుకుంటోంది.

బహుళజాతి సంస్థలు హైదరాబాద్‌లో తమ గ్లోబల్ కెపాబిలిటీ సెంటర్లు (GCCs) ఏర్పాటు చేయడంపై ఆసక్తి చూపుతున్నాయి. 2024-25 ఆర్థిక సంవత్సరంలో హైదరాబాద్‌లో సుమారు 70 కొత్త GCCలు వచ్చాయని, దీంతో నగరంలోని మొత్తం GCCల సంఖ్య 355కు పైగా చేరిందని అంచనాలు చెబుతున్నాయి.

Amazon, J.P. Morgan, Sanofi, Kenvue Health, L’Oréal వంటి అంతర్జాతీయ సంస్థలు హైదరాబాద్‌లో తమ కార్యకలాపాలను విస్తరిస్తున్నాయి.

హైదరాబాద్‌కు ప్రధాన ప్రయోజనాల్లో ఒకటి వ్యయపరమైన పోటీతత్వం. బెంగళూరుతో పోలిస్తే కార్యాలయ అద్దెలు సుమారు 25 శాతం తక్కువగా ఉండటంతో పాటు, నగరంలోని కొన్ని ప్రాంతాల్లో మెరుగైన రహదారులు, తక్కువ ప్రయాణ సమయం వంటి అంశాలు కూడా పెట్టుబడిదారులను ఆకర్షిస్తున్నాయి.

ఫార్మా, లైఫ్ సైన్సెస్‌లో తెలంగాణ బలమైన కేంద్రం

ఐటీతో పాటు ఫార్మాస్యూటికల్స్, లైఫ్ సైన్సెస్ రంగాల్లో తెలంగాణ దేశంలోనే కీలక రాష్ట్రంగా ఎదిగింది.

హైదరాబాద్ సమీపంలోని జీనోమ్ వ్యాలీ పరిశోధన, బయోటెక్నాలజీ, ఫార్మా తయారీకి ముఖ్యమైన కేంద్రంగా మారింది.

తెలంగాణ దేశంలోని మొత్తం ఔషధ ఉత్పత్తిలో సుమారు 35-40 శాతం వాటా కలిగి ఉందని అంచనాలు ఉన్నాయి. ప్రపంచ వ్యాక్సిన్ తయారీలో హైదరాబాద్ ప్రాంతానికి కూడా కీలక పాత్ర ఉంది.

వరల్డ్ ఎకనామిక్ ఫోరం దావోస్ సమావేశంలో తెలంగాణ ప్రభుత్వం Next-Gen Life Sciences Policyని ప్రకటించింది. దీని ద్వారా సుమారు ₹1 లక్ష కోట్ల పెట్టుబడులు, 5 లక్షల ఉద్యోగాలు సాధించాలని లక్ష్యంగా పెట్టుకుంది.

అయితే ఈ రంగంలో ఒక ప్రధాన సవాలు ఉంది. అధిక విలువ కలిగిన పేటెంట్లు, మేధో సంపత్తి, పరిశోధన ద్వారా వచ్చే లాభాల్లో గణనీయమైన భాగం ఇప్పటికీ విదేశీ బహుళజాతి సంస్థల చేతుల్లోనే ఉండటం స్థానిక ఆవిష్కరణలకు సవాలుగా మారుతోంది.

డేటా సెంటర్లు, ఏఐపై భారీ ఆశలు

తదుపరి తరం టెక్నాలజీ రంగాల్లోనూ తెలంగాణ భారీగా పెట్టుబడులను ఆకర్షిస్తోంది.

డేటా సెంటర్లు, ఆర్టిఫిషియల్ ఇంటెలిజెన్స్, డిజిటల్ ఇన్‌ఫ్రాస్ట్రక్చర్ రంగాలపై ప్రభుత్వం ప్రత్యేక దృష్టి పెట్టింది.

Amazon తెలంగాణలో డేటా సెంటర్ల కోసం సుమారు ₹60,000 కోట్ల పెట్టుబడి ప్రకటించింది. దీంతో హైదరాబాద్ దేశంలోని ప్రధాన డిజిటల్ మౌలిక సదుపాయాల కేంద్రాల్లో ఒకటిగా ఎదిగే అవకాశం ఉంది.

ఇదే సమయంలో రాష్ట్ర ప్రభుత్వం సుమారు 30,000 ఎకరాల్లో భారత్ ఫ్యూచర్ సిటీ అభివృద్ధికి ప్రణాళికలు రూపొందిస్తోంది. టెక్నాలజీ, వ్యాపారం, ఆధునిక మౌలిక సదుపాయాలు, భవిష్యత్ పరిశ్రమలకు కేంద్రంగా దీనిని అభివృద్ధి చేయాలని లక్ష్యంగా పెట్టుకుంది.

బ్యాటరీలు, ఈవీ రంగంలో కొత్త అడుగు

తెలంగాణ ఐటీ, ఫార్మా రంగాలకే పరిమితం కాకుండా ఎలక్ట్రిక్ వాహనాలు, బ్యాటరీ తయారీ, క్లీన్ ఎనర్జీ రంగాల్లోనూ తన స్థావరాన్ని విస్తరిస్తోంది.

Amara Raja Energy & Mobility సుమారు ₹9,500 కోట్ల పెట్టుబడితో Giga Corridor, లిథియం-అయాన్ సెల్ తయారీ ప్రాజెక్టును అభివృద్ధి చేస్తోంది.

ఈ పెట్టుబడులు తెలంగాణలో బ్యాటరీ స్టోరేజ్, ఎలక్ట్రిక్ మొబిలిటీ, క్లీన్ ఎనర్జీ సరఫరా వ్యవస్థ అభివృద్ధికి ఊతమివ్వనున్నాయి.

ఆంధ్రప్రదేశ్‌తో పెరుగుతున్న టెక్ పోటీ

తెలంగాణతో పాటు పొరుగు రాష్ట్రం ఆంధ్రప్రదేశ్ కూడా భారీ టెక్ పెట్టుబడులను ఆకర్షించేందుకు ప్రయత్నిస్తోంది.

హైదరాబాద్‌ను AI, డేటా సెంటర్లు, GCCలు, లైఫ్ సైన్సెస్ కేంద్రంగా తెలంగాణ అభివృద్ధి చేస్తుండగా, ఆంధ్రప్రదేశ్ కూడా AI, టెక్నాలజీ, మౌలిక సదుపాయాల రంగాల్లో పెట్టుబడులను ఆకర్షిస్తోంది.

దీంతో రెండు తెలుగు రాష్ట్రాల మధ్య గ్లోబల్ టెక్ పెట్టుబడుల కోసం పోటీ మరింత పెరుగుతోంది.

తెలంగాణకు నీటి కొరత పెద్ద సవాలుగా మారే అవకాశం

భారీ పెట్టుబడులతో ఆర్థిక వృద్ధి వేగం పెరుగుతున్నప్పటికీ, తెలంగాణ ఎదుర్కొంటున్న అతిపెద్ద సమస్యల్లో నీటి లభ్యత ఒకటి.

డేటా సెంటర్లలో సర్వర్లను చల్లబరచడానికి భారీ స్థాయిలో నీరు అవసరమవుతుంది. కొన్ని డేటా సెంటర్లలో సాంకేతికతను బట్టి ఒక్క మెగావాట్ సామర్థ్యానికి ఏడాదికి మిలియన్ల లీటర్ల నీరు అవసరమయ్యే అవకాశం ఉంది.

మరోవైపు హైదరాబాద్‌లోని పలు ప్రాంతాల్లో భూగర్భ జలాల మట్టాలు గణనీయంగా పడిపోతున్నాయి.

డేటా సెంటర్లు, పరిశ్రమలు, వేగంగా పెరుగుతున్న పట్టణ జనాభా — ఇవన్నీ కలిసి నీటి వనరులపై ఒత్తిడిని పెంచే అవకాశం ఉంది.

పెరుగుతున్న అప్పులు ఆందోళనకరం

తెలంగాణ వేగవంతమైన అభివృద్ధి, సంక్షేమ, మౌలిక సదుపాయాల వ్యయంతో పాటు రాష్ట్ర అప్పులు, ఆఫ్-బడ్జెట్ రుణాలు కూడా చర్చనీయాంశంగా మారాయి.

సుమారు 26 నెలల కాలంలో రాష్ట్ర అప్పులు ₹1.6 లక్షల కోట్ల మేర పెరిగినట్లు అంచనాలు ఉన్నాయి.

అభివృద్ధి ప్రాజెక్టులకు అవసరమైన పెట్టుబడులను కొనసాగిస్తూనే ఆర్థిక క్రమశిక్షణను కాపాడుకోవడం రాష్ట్ర ప్రభుత్వానికి కీలక సవాలుగా మారనుంది.

భూసేకరణ, స్థానిక వ్యతిరేకత మరో సవాలు

భారీ మౌలిక సదుపాయాల ప్రాజెక్టులకు కొన్ని ప్రాంతాల్లో స్థానిక ప్రజల నుంచి వ్యతిరేకత కూడా ఎదురవుతోంది.

మూసీ రివర్‌ఫ్రంట్ ప్రాజెక్టు, రీజినల్ రింగ్ రోడ్ వంటి ప్రాజెక్టుల్లో భూసేకరణ, పునరావాసం, రహదారి అలైన్‌మెంట్ వంటి అంశాలపై అభ్యంతరాలు వ్యక్తమయ్యాయి.

భారీ అభివృద్ధి ప్రాజెక్టులను వేగంగా అమలు చేయడంతో పాటు ప్రభావిత కుటుంబాలకు సరైన పరిహారం, పునరావాసం, ప్రజలతో సంప్రదింపులు నిర్వహించడం కీలకం కానుంది.

ఆర్థిక వృద్ధి ఉన్నా యువతకు ఉద్యోగాల సవాలు

తెలంగాణ ఆర్థిక వ్యవస్థ వేగంగా పెరుగుతున్నప్పటికీ, యువతకు తగిన స్థాయిలో ఉద్యోగాలు కల్పించడం మరో ప్రధాన సవాలుగా ఉంది.

GCCలు, ఐటీ కంపెనీలు, హైటెక్ పరిశ్రమల్లో లభించే ఉద్యోగాల్లో ఎక్కువ భాగం ప్రత్యేక నైపుణ్యాలు కోరుతున్నాయి. దీంతో రాష్ట్రంలో ఉన్న యువతలో ఒక వర్గానికి అవకాశాలు అందకుండా పోయే పరిస్థితి ఏర్పడుతోంది.

యువతలో నిరుద్యోగం జాతీయ సగటుతో పోలిస్తే ఎక్కువగా ఉందనే అంచనాలు ఉన్నాయి. అందువల్ల నైపుణ్యాభివృద్ధి, పరిశ్రమలకు అవసరమైన ఉద్యోగ నైపుణ్యాలపై శిక్షణ పెంచడం కీలకం.

తెలంగాణ భవిష్యత్తు ఎటు?

తెలంగాణ ఆర్థిక వృద్ధి ఇప్పుడు ఒక్క ఐటీ రంగంపై ఆధారపడటం లేదు. ఐటీ-జీసీసీలు, ఫార్మా-లైఫ్ సైన్సెస్, క్లీన్ ఎనర్జీ-బ్యాటరీలు, డేటా సెంటర్లు-ఏఐ అనే నాలుగు ప్రధాన రంగాలు రాష్ట్ర భవిష్యత్ వృద్ధికి బలమైన పునాదులుగా మారుతున్నాయి.

దీంతో ఒక రంగంలో మందగమనం వచ్చినా ఇతర రంగాల ద్వారా ఆర్థిక వృద్ధిని కొనసాగించే అవకాశం తెలంగాణకు ఉంది.

అయితే పెట్టుబడులను ఆకర్షించడం మాత్రమే సరిపోదు. వాటిని దీర్ఘకాలిక ఆర్థిక వృద్ధిగా మార్చేందుకు ఆర్థిక క్రమశిక్షణ, నీటి భద్రత, నైపుణ్యాభివృద్ధి, ఉపాధి కల్పన, స్థిరమైన పట్టణాభివృద్ధి, పారదర్శక భూసేకరణ విధానాలు కీలకం.

వచ్చే పదేళ్లు తెలంగాణకు మరో కీలక మార్పు దశగా నిలిచే అవకాశం ఉంది. పెట్టుబడులు, పరిశ్రమలు, టెక్నాలజీతో పాటు నీరు, అప్పులు, ఉపాధి వంటి సవాళ్లను ప్రభుత్వం ఎంత సమర్థంగా పరిష్కరిస్తుందన్నదే రాష్ట్ర తదుపరి ఆర్థిక విజయాన్ని నిర్ణయించనుంది.

ఖమ్మం జిల్లా,కారేపల్లి (సింగరేణి ) : లోకల్ గైడ్, ఆగష్టు 7 : గేట్ కారేపల్లి అంగన్వాడీ కేంద్రంలో వెలుగు స్వప్న–సురేష్ దంపతుల కుమారుడి అన్నప్రాసన వేడుకను ఘనంగా నిర్వహించారు. గేట్ కారేపల్లి సర్పంచ్ పూసం ఎల్లయ్య చేతుల మీదుగా చిన్నారికి అన్నప్రాసన కార్యక్రమాన్ని నిర్వహించి, చిన్నారిని ఆశీర్వదించారు. ఈ సందర్భంగా అంగన్వాడీ కేంద్రంలో సందడి వాతావరణం నెలకొంది.

చిన్నారుల ఆరోగ్యకరమైన ఎదుగుదలకు తొలి దశ నుంచే పౌష్టికాహారం అందించడం ఎంతో ముఖ్యమని సర్పంచ్ పూసం ఎల్లయ్య తెలిపారు. ఆరు నెలల వయస్సు పూర్తయిన అనంతరం తల్లిపాలతో పాటు వయస్సుకు అనుగుణంగా పౌష్టిక విలువలతో కూడిన ఆహారాన్ని అందించాలని సూచించారు. పిల్లల శారీరక, మానసిక ఎదుగుదలకు సమతుల్య ఆహారం, పరిశుభ్రత, ఆరోగ్య సంరక్షణ ఎంతో అవసరమన్నారు.

అంగన్వాడీ కేంద్రాల ద్వారా చిన్నారులు, గర్భిణీలు, బాలింతలకు ప్రభుత్వం అందిస్తున్న సేవలను సద్వినియోగం చేసుకోవాలని సూచించారు. పిల్లల బరువు, ఎదుగుదల, ఆరోగ్య పరిస్థితిని ఎప్పటికప్పుడు పరిశీలిస్తూ అవసరమైన పోషకాహారం అందించడంలో అంగన్వాడీ సిబ్బంది చేస్తున్న సేవలు అభినందనీయమని పేర్కొన్నారు.

కార్యక్రమంలో పంచాయతీ కార్యదర్శి కె. అనూష, పాలకవర్గ సభ్యులు భూక్యా రమేష్, మూడు శ్రీను పాల్గొని చిన్నారిని ఆశీర్వదించారు. అంగన్వాడీ టీచర్లు ఇల్లంగి విజయకుమారి, భూక్యా లక్ష్మి, సోమందుల నాగమణి, ఆయాలు భూక్యా నందిని, సైయాద్. మహిముద కార్యక్రమాన్ని విజయవంతంగా నిర్వహించారు.

అలాగే గర్భిణీ స్త్రీలు, చిన్నారుల తల్లులు పాల్గొని అన్నప్రాసన వేడుకను తిలకించారు. ఈ సందర్భంగా చిన్నారికి ఆరోగ్యం, ఆయురారోగ్యాలు, సుఖసంతోషాలతో కూడిన భవిష్యత్తు కలగాలని ఆకాంక్షిస్తూ కుటుంబ సభ్యులు, అంగన్వాడీ సిబ్బంది ఆశీర్వాదాలు అందించారు. చిన్నారుల ఆరోగ్యం, పోషణపై తల్లులకు పలు సూచనలు చేసి అవగాహన కల్పించారు.

 ఆస్థి పన్ను వసూల్ కోసం ఇళ్లకు వెళ్లిన అధికారులకు సవా లక్షా ప్రశ్నలతో ముచ్చెమటలు పట్టిస్తున్న ఆస్తిపన్నుదారులు. కాలనీలో ఏం అభివృద్ధి చేశారని ఆస్తిపన్ను వసూలుకు వచ్చారని అధికారులను నిలదీస్తున్న ప్రజలు. ఆస్తి పన్ను వసూలుకు సమయపాలన లేదా.... అప్పులోల్లా రాత్రిపూట వచ్చారని అధికారులపై అసహనం వ్యక్తం చేస్తున్న ప్రజలు. . సమయపాలన లేకుండా ఆస్తిపన్ను వసూలు కోసం వెళ్లిన అధికారులు, సిబ్బందికి ఎదురవుతున్న చేదు అనుభవాలు. మార్చి 31వ తేదీ లోపు ఆస్తి పన్ను వసూలు చేయాలని ప్రభుత్వ ఆదేశాలతో రాత్రి,పగలనకా వసూళ్లకు వెళ్లిన అధికారులు సిబ్బంది. రంగారెడ్డి జిల్లా బ్యూరో, ( లోకల్ గైడ్ ): ఎంత రాత్రి అయినా సరే ఆస్తిపన్ను వసూలు చేయాలని మున్సిపల్ కమిషనర్ ఆదేశాలతో కిందిస్థాయి అధికారులు, సిబ్బందికీ షాద్ నగర్ మున్సిపాలిటీ పరిధిలో చేదు అనుభవాలు ఎదురైనట్లు తెలిసింది. ఏడాది ఆర్థిక సంవత్సరం మార్చి 31 తో ముగియనుండటంతో ప్రభుత్వ ఆదేశాలను సారం మున్సిపల్ అధికారులు ముమ్మరంగా ఆస్తిపన్ను వసూళ్లకు దిగారు. మార్చీ 31 ఒక్క(చివరి ) రోజే గడువు ఉండటంతో రాత్రి పగలనకా కాలనీలు, బస్తీల్లో ఆస్తి పన్ను వసూలుకు వెళ్లిన అధికారులను ఆస్తిపన్నుదారులు కాలనీలో ఏం అభివృద్ధి చేశారని సమయపాలన లేకుండా ఆస్తిపన్ను వసూలుకు వచ్చారని ప్రశ్నల వర్షం కురిపిస్తున్నట్లు సమాచారం. ఆస్తి పన్ను వసూలుకు వెళ్లిన కొందరు సిబ్బందికి ప్రజల నుంచి అనేక చేదు అనుభవాలు ఎదురైనట్లు కొందరు సిబ్బంది వాపోయారు. ఆస్తిపన్ను వసూలే టార్గెట్ గా విధులు నిర్వహించాలని మున్సిపల్ కమిషనర్ ఆదేశాలతో బిల్ కలెక్టర్లు, కింది స్థాయి సిబ్బంది ఒకవైపు కమిషనర్ ఒత్తిడి... మరోవైపు ప్రజల నుంచి ఎదురయ్య చేదు అనుభవాలతో తీవ్ర ఒత్తిడికీ గురవుతున్నారు. ఆదివారాలు, సెలవు దినాల్లో కూడా విధులు నిర్వహించాల్సిన పరిస్థితులు నెలకొన్నయని కొందరు సిబ్బంది ఆవేదన వ్యక్తం చేస్తున్నారు. ఆస్తిపన్ను వసూలు చేయాల్సిందే... ఎవ్వరు కూడా ఎలాంటి సెలవులు, పండుగలు ఇతర ఈ కార్యాలకు వెళ్ళేది లేదని కమిషనర్ తీవ్రమైన వత్తిడి చేస్తున్నట్లు ఆరోపణలు ఉన్నాయి. ఇంట్లో కుటుంబ సభ్యులకు ఏ బాధ వచ్చినా కూడా సెలవు పై వెళ్లలేని దుస్థితి నెలకొందని కొందరు ఉద్యోగులు వాపోయారు. ఆశపన్ను వసూలు కోసం ఉదయం ఏడు గంటల నుంచి రాత్రి వరకు ఎంత సమయం పడుతుందో.... ఎప్పుడు ఇంటికి వెళ్తాము తెలియని పరిస్థితులు నెలకొన్నాయని సిబ్బంది విచారం వ్యక్తం చేస్తున్నారు. ప్రధానంగా ఆస్తిపన్ను వసూళ్లకు ఎలాంటి సమయపాలన లేదా...? అప్పులు ఇచ్చినోళ్ళలా ఆస్తి పన్ను కోసం ఇల్ల చుట్టూ తిరుగుతున్నారని ప్రజలు అసహన వ్యక్తం చేస్తున్నట్లు తెలిసింది. మా బస్తీలు, కాలనీలో ఏం అభివృద్ధి చేశారని రాత్రిపూట ఆస్తి పన్ను వసూళ్లకు వచ్చారని అధికారులు సిబ్బందిని ప్రజలు నిలదీసినట్లు సమాచారం. ఈ పని ఒత్తిడితో ఉద్యోగం కొనసాగించడం కష్టంగా మారిందని, అనారోగ్యాలపాకు గురవుతున్నట్లు కొందరు ఉద్యోగులు వాపోతున్నారు. ఈ పనివత్తిడితో సమయానికి భోజనం చేయకపోవడమే కాకుండా కనీసం చాయ్, నీళ్లు తాగలేని పరిస్థితితులు నెలకొన్నాయి. అదనంగా పని చేసినప్పటికీ ఎలాంటి అదనపు జీతం లేదా అలవెన్స్‌లు ఇవ్వడం లేదని, పెట్రోల్ సౌకర్యం కూడా కల్పించకపోవడంతో ఖర్చులు తమపై పడుతున్నాయని కొందరు ఉద్యోగులు ఆవేదన వ్యక్తం చేశారు. 

శ్రీరామ నవమి పండుగ రోజున కూడా టాక్స్ కలెక్షన్ల కోసం తిరగాల్సి వచ్చిందని ఉద్యోగులు ఆగ్రహం వ్యక్తం చేశారు. రాత్రి వేళల్లో ఇళ్లకు వెళ్లి వసూళ్లు చేయాల్సి రావడం వల్ల ప్రజలకు కూడా అసౌకర్యం కలుగుతోందని తెలిపారు.

గత మూడు నెలలుగా ఇదే పరిస్థితి కొనసాగుతోందని, మండుటెండల్లో కూడా ఉదయం నుంచి రాత్రి వరకు పనిచేయాల్సి వస్తోందంటున్నారు.

హైదరాబాద్, మార్చి 29: నగరంలోని నెక్లెస్ రోడ్ పీపుల్స్ ప్లాజా వద్ద ఆదివారం ‘యువ భారత్ రన్ 2026’ కార్యక్రమం ఘనంగా నిర్వహించబడింది. ఢిల్లీ పబ్లిక్ స్కూల్ (DPS), పల్లవి స్కూల్స్ సంయుక్తంగా ఎమ్మెల్సీ మల్కా కొమరయ్య తనయుడు యశస్వి మల్కా ఆధ్వర్యంలో నిర్వహించిన ఈ కార్యక్రమం దేశంలోనే అతిపెద్ద యువత ఆధారిత ఫిట్‌నెస్ ఉద్యమంగా నిలిచింది. ఈ రన్‌లో 10,000 మందికి పైగా విద్యార్థులు, యువత, కుటుంబ సభ్యులు పాల్గొని విజయవంతం చేశారు.

ఉదయం 6 గంటలకు ప్రారంభమైన ఈ రన్‌ ఫిట్ ఇండియా మూవ్మెంట్ కేంద్ర యువజన వ్యవహారాలు మరియు క్రీడల మంత్రిత్వ శాఖ మద్దతు అందించగా, రెడ్ ఎఫ్ఎం అధికారిక రేడియో భాగస్వామిగా వ్యవహరించింది.

ఈ కార్యక్రమంలో భాగంగా 5 కిలోమీటర్ల ‘ది ఛాలెంజ్’ (టైమ్‌డ్ రన్), 2 కిలోమీటర్ల ‘రన్ అండ్ బాండ్’ (కుటుంబ సభ్యులు, ప్రారంభికుల కోసం), 500 మీటర్ల ‘యంగ్ రన్నర్స్’ (చిన్నారుల కోసం) విభాగాలు నిర్వహించారు. అన్ని వయసుల వారికి అనుకూలంగా ఈ విభాగాలను ఏర్పాటు చేయడం విశేషం.

రన్‌తో పాటు జుంబా, యోగా వార్మప్ సెషన్స్, హార్ట్‌ఫుల్‌నెస్ మెడిటేషన్, ప్లే జోన్స్, ఫుడ్ స్టాల్స్, గేమ్స్ వంటి కార్యక్రమాలు పాల్గొన్న వారిని ఆకట్టుకున్నాయి. టైమ్‌డ్ విభాగాల్లో విజేతలకు మొత్తం రూ.1 లక్ష నగదు బహుమతులు అందజేశారు.

ఈ కార్యక్రమానికి ముఖ్య అతిథులుగా తెలంగాణ గవర్నర్ శివ ప్రతాప్ శుక్ల మాజీ ఉపరాష్ట్రపత శ్రీ వెంకయ్య నాయుడు కేంద్ర మంత్రి కిషన్ రెడ్డి రాష్ట్ర ఐటీ మంత్రి డి శ్రీధర్ బాబు , సినీ నటుడు శర్వానంద్ తదితరులు హాజరయ్యారు. గవర్నర్ శివ ప్రతాప్ శుక్లా, వెంకయ్య నాయుడు, కిషన్ రెడ్డి, బీజేపీ రాష్ట్ర అధ్యక్షుడు రామచంద్ర రావు కలిసి జెండా ఊపి 2కే, 5కే రన్‌లను ప్రారంభించారు.

ఈ సందర్భంగా గవర్నర్ మాట్లాడుతూ, దేశ భవిష్యత్తు యువత ఆరోగ్యకరమైన అలవాట్లపై ఆధారపడి ఉందన్నారు. ఇది కేవలం పరుగే కాకుండా శక్తివంతమైన ప్రజా ఉద్యమమని అభివర్ణించారు. యువత మాదకద్రవ్యాలకు దూరంగా ఉండి, శారీరక దృఢత్వంతో పాటు మానసిక ప్రశాంతత కోసం ధ్యానం అలవాటు చేసుకోవాలని సూచించారు.

మాజీ ఉపరాష్ట్రపతి వెంకయ్య నాయుడు మాట్లాడుతూ, యువతలో విదేశీ అలవాట్లు పెరుగుతున్నాయని ఆందోళన వ్యక్తం చేశారు. మాతృభాషలో మాట్లాడడం, తల్లిదండ్రులతో సమయం గడపడం, ఆరోగ్యకరమైన ఆహారం తీసుకోవడం వంటి మంచి అలవాట్లు అలవరుచుకోవాలని సూచించారు. ఫాస్ట్ ఫుడ్ ఆరోగ్యానికి హానికరమని హెచ్చరించారు.

సోషల్ మీడియా వినియోగంపై కూడా జాగ్రత్తగా ఉండాలని, అవసరమైనప్పుడు మాత్రమే మొబైల్ ఉపయోగించాలని సూచించారు. మంచి ప్రవర్తన, క్రమశిక్షణతో జీవించడం ద్వారా భవిష్యత్తు మెరుగవుతుందని తెలిపారు.

ఈ కార్యక్రమం ద్వారా యువతలో ఫిట్‌నెస్‌తో పాటు నైతిక విలువలు పెంపొందించాలనే లక్ష్యాన్ని నిర్వాహకులు విజయవంతంగా సాధించినట్లు అధికారులు పేర్కొన్నారు.

హైదరాబాద్, మార్చి 29: రాష్ట్రంలో మౌలిక సదుపాయాల అభివృద్ధికి కీలకంగా ఉన్న రోడ్లు మరియు భవనాల (ఆర్‌&బీ) శాఖ పనితీరుపై ఈ రోజు శాసనసభలో సమగ్ర చర్చ జరగనుంది. ఈ సందర్భంగా ఆ శాఖ మంత్రి Komatireddy Venkat Reddy సభను ఉద్దేశించి ప్రసంగించనున్నారు.

ప్రస్తుతం రాష్ట్రవ్యాప్తంగా కొనసాగుతున్న రహదారుల నిర్మాణం, మరమ్మతులు, వంతెనలు మరియు ప్రభుత్వ భవనాల నిర్మాణ పనుల పురోగతిని మంత్రి వివరించనున్నారు. ముఖ్యంగా గ్రామీణ మరియు పట్టణ ప్రాంతాల్లో రహదారి సదుపాయాల మెరుగుదల, ప్రధాన రహదారుల విస్తరణ, నాణ్యత ప్రమాణాల అమలు వంటి అంశాలపై ప్రత్యేకంగా దృష్టి సారించనున్నట్లు సమాచారం.

అలాగే, ఆర్‌&బీ శాఖ ఆధ్వర్యంలో చేపట్టిన అభివృద్ధి పనుల ప్రస్తుత స్థితి, పూర్తయిన ప్రాజెక్టులు, కొనసాగుతున్న పనులు మరియు రాబోయే కాలానికి సంబంధించిన లక్ష్యాలను సభకు వివరించనున్నారు. ప్రజలకు మెరుగైన రవాణా సదుపాయాలు అందించడమే లక్ష్యంగా ప్రభుత్వం తీసుకుంటున్న చర్యలను మంత్రి ప్రస్తావించనున్నారు.

ఇకపై చేపట్టబోయే కొత్త ప్రాజెక్టులు, బడ్జెట్ వినియోగం, పనుల వేగవంతం, పారదర్శకత మరియు సమయపాలనపై ప్రభుత్వం తీసుకుంటున్న చర్యలను కూడా మంత్రి తన ప్రసంగంలో ప్రస్తావించే అవకాశం ఉంది.

ఈ చర్చతో రాష్ట్ర మౌలిక వసతుల అభివృద్ధికి సంబంధించి ప్రభుత్వ దిశానిర్దేశం స్పష్టమవుతుందని అధికార వర్గాలు భావిస్తున్నాయి.

హైదరాబాద్, మార్చి 28: పర్యావరణ పరిరక్షణ, భూతాపం (గ్లోబల్ వార్మింగ్) పై ప్రజల్లో అవగాహన కల్పించే ఉద్దేశంతో నిర్వహించే ‘ఎర్త్ అవర్’ కార్యక్రమంలో లోక్ భవన్ భాగస్వామ్యమైంది.

ఈ సందర్భంగా శనివారం రాత్రి 8:30 గంటల నుంచి 9:30 గంటల వరకు లోక్ భవన్ పరిధిలోని ప్రధాన భవనం, సిబ్బంది నివాస సముదాయం, అధికారుల క్వార్టర్స్, పరిపాలనా భవనాల్లో ఒక గంటపాటు విద్యుత్ దీపాలను నిలిపివేశారు.

ప్రతి సంవత్సరం ప్రపంచవ్యాప్తంగా నిర్వహించే ఈ కార్యక్రమంలో భాగంగా, ఈ ఏడాది “గివ్ అన అవర్ ఫర్ ఎర్త్” అనే థీమ్‌కు అనుగుణంగా దీపాలను ఆర్పివేసి పర్యావరణ పరిరక్షణకు తమ మద్దతును తెలియజేసినట్లు అధికారులు పేర్కొన్నారు.

ఈ కార్యక్రమం ద్వారా పర్యావరణాన్ని కాపాడాల్సిన అవసరాన్ని ప్రజలకు గుర్తుచేసే ప్రయత్నం చేసినట్లు తెలిపారు.

భద్రాచలం, మార్చి 28: భద్రాచలం శ్రీ సీతారామచంద్ర స్వామి వారి పట్టాభిషేక మహోత్సవం శనివారం భక్తుల మధ్య అంగరంగ వైభవంగా జరిగింది. ఈ పవిత్ర వేడుకను తెలంగాణ రాష్ట్ర గవర్నర్ శ్రీ శివ ప్రతాప్ శుక్లా, వారి సతీమణి శ్రీమతి జానకి శుక్లా దంపతులు తిలకించి, స్వామివారికి పట్టు వస్త్రాలు సమర్పించారు.

ఈ మహోత్సవానికి వ్యవసాయ శాఖ మంత్రి తుమ్మల నాగేశ్వరరావు, ఎంపీ బలరాం నాయక్, భద్రాచలం ఎమ్మెల్యే డా. తెల్లం వెంకట్రావు, గవర్నర్ ప్రత్యేక ప్రధాన కార్యదర్శి ఎం. దాన కిషోర్, దేవాదాయ శాఖ కమిషనర్ హనుమంతరావు తదితరులు హాజరయ్యారు.

భద్రాచలం పర్యటనకు తొలిసారిగా విచ్చేసిన గవర్నర్ దంపతులకు ప్రజా ప్రతినిధులు, అధికారులు ఘన స్వాగతం పలికారు. బూర్గంపాడు మండలం సారపాకలోని ఐటీసీ హెలీప్యాడ్ వద్ద మంత్రి తుమ్మల నాగేశ్వరరావు, ఎమ్మెల్యే వెంకట్రావు, కలెక్టర్ అంకిత్, ఎస్పీ రోహిత్ రాజు శాలువాలు, పుష్పగుచ్ఛాలతో స్వాగతం తెలిపారు.

ఈ సందర్భంగా గవర్నర్ భద్రాచలంలో ఐటిడిఎ ఆధ్వర్యంలో ఏర్పాటు చేసిన ‘భద్రగిరి మార్ట్’ను ప్రారంభించారు. మార్ట్‌లో గిరిజనులు తయారు చేసిన ఉత్పత్తులను పరిశీలించిన గవర్నర్ దంపతులు, వాటి వివరాలను ఐటిడిఎ ప్రాజెక్ట్ అధికారి బి. రాహుల్, సహాయ ప్రాజెక్ట్ అధికారి డేవిడ్‌ల నుంచి తెలుసుకున్నారు. అనంతరం పలు గిరిజన ఉత్పత్తులను కొనుగోలు చేశారు.

ఈ వేడుకలో భారీ సంఖ్యలో భక్తులు పాల్గొని, శ్రీ సీతారాముల దివ్య దర్శనం పొందారు.

లోకల్ గైడ్/ తాండూర్:
వార్డు ప్రజలు ఆశీర్వదిస్తే గెలిచిన వెంటనే మౌలిక వసతులకు అధిక ప్రాధాన్యతను ఇస్తానని ఇండిపెండెంట్ అభ్యర్థి అంజాద్ అలీ పాషా తెలిపారు. ఈ సందర్భంగా ఆయన మాట్లాడుతూ... రానున్న బల్దియా ఎన్నికల్లో 31 వార్డు నుంచి స్వతంత్ర అభ్యర్థిగా పోటీ చేసేందుకు సిద్ధంగా ఉన్నట్లు స్పష్టం చేశారు. ప్రజలు దీవిస్తే తక్షణమే వార్డు సమస్యలపై పోరాడుతున్నానని అన్నారు. 31 వ వార్డులో తాగునీరు,మురుగు , రోడ్డు సమస్య అధికంగా ఉందని, తక్షణమే వాటిని పరిష్కరిస్తానని భరోసానిచ్చారు.ముఖ్యంగా మురుగు సమస్యను నివారించేందుకు అండర్ డ్రైన్ వ్యవస్థను రూపొందించేందుకు కృషి చేస్తానని స్పష్టికరించారు.

లోకల్ గైడ్ పాలేరు: మన ప్రియతమ నేత, తెలంగాణ రెవెన్యూ, గృహ నిర్మాణం, సమాచార శాఖల మంత్రి శ్రీ పొంగులేటి శ్రీనివాస రెడ్డి గారు ప్రాతినిధ్యం వహిస్తున్న మన పాలేరు  నియోజకవర్గంలో ఈ నెల 18న ఆదివారం (రేపు) ఉదయం 10:30 గంటలకు గౌరవ ముఖ్యమంత్రి శ్రీ రేవంత్ రెడ్డి గారు పర్యటించనున్నారు. ఈ పర్యటనను భారీ సంఖ్యలో తరలివచ్చి విజయవంతం చేయాలని పొంగులేటి గారి క్యాంప్ కార్యాలయ ఇన్ చార్జి తుంబూరు దయాకర్ రెడ్డి ఒక ప్రకటనలో పిలుపునిచ్చారు.

మద్దులపల్లి వేదికగా సీఎం గారు 100 పడకల ఆసుపత్రి (కూసుమంచి), జేఎన్టీయూ కళాశాల, మున్నేరు-పాలేరు లింక్ కెనాల్ పనులకు శంకుస్థాపన చేస్తారు. అలాగే నర్సింగ్ కళాశాల మరియు కొత్త వ్యవసాయ మార్కెట్‌ను ప్రారంభిస్తారు.

ఈ కార్యక్రమానికి నియోజకవర్గంలోని  ఆత్మ కమిటీ, సీడీసీ, మార్కెట్ కమిటీల చైర్మన్లు, వైస్ చైర్మన్లు, డైరెక్టర్లు, సర్పంచులు, ఉప సర్పంచులు, వార్డు మెంబర్లు, దేవాలయ కమిటీ బాధ్యులు మరియు కాంగ్రెస్ ముఖ్య నాయకులు, కార్యకర్తలు అందరూ ఉదయం 10:30 గంటలకే హాజరై కార్యక్రమాన్ని జయప్రదం చేయాలని దయాకర్ రెడ్డి కోరారు.

లోకల్ గైడ్/తాండూర్:

తాండూర్ పట్టణంలోని ప్రముఖ పుణ్యక్షేత్రం శ్రీ భాగివి భద్రేశ్వర దేవాలయ దుకాణ సముదాయాల నిర్మాణం వివాదాస్పదంగా మారింది. ఎలాంటి అనుమతులు లేకుండా, నిబంధనలకు విరుద్ధంగా చేపట్టినట్లు వీరశైవ సమాజ సభ్యులు ప్రవీణ్ పటేల్ ఆరోపించారు.ఈ సందర్భంగా ప్రవీణ్ పటేల్ మీడియాతో మాట్లాడుతూ….. దేవాలయ కమిటీ ఈఓ కుమ్మక్కై దాదాపు రూ. 3.5 కోట్ల విలువైన దుకాణాలను అక్రమంగా నిర్మించారన్నారు. నిబంధనలకు విరుద్ధంగా వ్యాపారుల నుంచి భారీ మొత్తంలో డిపాజిట్లు వసూలు చేసి దేవాలయ ఆదాయానికి గండి కొట్టారు అని ఆరోపించారు.​   ఎండోమెంట్ యాక్ట్ ప్రకారం 5ఏళ్లకు ఒక సారి రిటైడర్లు వెయ్యాల్సి ఉంది. కానీ లైఫ్దే టైం సెటిల్మెంట్   అని వసూళ్లు చేపట్టారని  ఆగ్రహం వ్యక్తం చేశారు. దేవదాయ శాఖ     చట్టం ప్రకారం వెంటనే పబ్లిక్ నోటిఫికేషన్ విడుదల చేయాలని,​అక్రమంగా వసూలు చేసిన డిపాజిట్లను వెంటనే దేవాదాయ శాఖ ఖాతాలో జమ చేయాలన్నారు. నియమ నిబంధనలు పాటించని అధికారులపై, రెవల్యూషన్ కమిటీపై శాఖాపరమైన చర్యలు తీసుకోవాలని డిమాండ్ చేశారు.​కోర్టు ఆదేశాల నేపథ్యంలో, అధికారులు రంగంలోకి దిగి దుకాణాలను మూసివేయించారు. సరైన అనుమతులు పొంది, చట్టబద్ధంగా ప్రక్రియ పూర్తి చేసే వరకు ఈ దుకాణాలు తెరిచే ప్రసక్తి లేదని హెచ్చరించారు.

ఖమ్మం:లోకల్ గైడ్:
ఖమ్మం : 25వ డివిజన్ రిక్క బజార్ సెంటర్ అమ్మ భవాని గుడి దగ్గర స్థానిక కార్పొరేటర్ గోళ్ళ చంద్రకళ వెంకటేశ్వర్లు ఆధ్వర్యంలో సంక్రాంతి సందర్భంగా జరిగిన ముగ్గుల పోట్లలో గెలుపొందిన విజేతులకు బహుమతి ప్రధానం చేశారు . మొదటి బహుమతి వెండి దీపపు కుండీలు , రెండవ బహుమతి గ్రైండర్ , మూడవ బహుమతి మిక్సీ మరియు ముగ్గుల పోటీలో పాల్గొన్న ఆడపడుచులకు ప్రతి ఒక్కరికి సుమారుగా 500 మందికి పట్టు చీరలు అందజేశారు . ఈ కార్యక్రమాన్ని సహకరించి  విజయవంతం చేసిన డివిజన్ ప్రజలకు , నాయకులకు ప్రతి ఒక్కరికి పేరు పేరున కృతజ్ఞతలు తెలిపారు .

శంషాబాద్ ,జనవరి 17( లోకల్ గైడ్);
జీహెచ్‌ఎంసీ శంషాబాద్ జోన్ పరిధిలోని శంషాబాద్ సర్కిల్–18లో ప్రత్యేక పారిశుద్ధ్య కార్యక్రమంలో భాగంగా శనివారం శంషాబాద్ ప్రభుత్వ బాలికల హై స్కూల్‌లో అవగాహన కార్యక్రమం నిర్వహించబడింది.
ఈ కార్యక్రమంలో జోనల్ కమిషనర్ కె. చంద్రకళ మాట్లాడుతూ, మూలంలోనే చెత్త వేరు చేయడం, సింగిల్ యూజ్ ప్లాస్టిక్ వినియోగ నిషేధం, యొక్క ప్రాముఖ్యతపై విద్యార్థులకు అవగాహన కల్పించారు. అలాగే పరిసరాలను శుభ్రంగా ఉంచుతూ హరిత వాతావరణాన్ని కాపాడుకోవాల్సిన అవసరాన్ని వివరించారు. అనంతరం విద్యార్థులతో పరిశుభ్రత ప్రతిజ్ఞ చేయించారు. ఈ కార్యక్రమంలో డిప్యూటీ కమిషనర్ బి. సుమన్ రావు , డిప్యూటీ ఈఈ  అన్నపూర్ణ ,  ప్రధానోపాధ్యాయులు, సిబ్బంది పాల్గొన్నారు. 
ఐటెం ఎండ్.