కారేపల్లి, అక్టోబర్ 15 (లోకల్ గైడ్ న్యూస్):

కారేపల్లి మండల కేంద్రంలోని బీసీ కాలనీలో భక్తి పారవశ్యం వెల్లివిరిసింది. దేవీ నవరాత్రుల సందర్భంగా ఏర్పాటు చేసిన దుర్గామాత మండపంలో గురువారం మహా అన్నదాన కార్యక్రమాన్ని భక్తిశ్రద్ధలతో నిర్వహించారు. సర్వమంగళ స్వరూపిణి అయిన కనకదుర్గమ్మను లలిత త్రిపుర సుందరి దేవి అలంకరణలో ముస్తాబు చేయడంతో అమ్మవారి సుందర రూపం భక్తులను విశేషంగా ఆకట్టుకుంది. అమ్మవారిని దర్శించుకుని ఆశీస్సులు పొందేందుకు భక్తులు పెద్ద సంఖ్యలో తరలివచ్చి ప్రత్యేక పూజలు, అర్చనలు నిర్వహించి మొక్కులు చెల్లించుకున్నారు. అనంతరం నిర్వహించిన మహా అన్నదాన కార్యక్రమంలో గ్రామస్తులతోపాటు పరిసర ప్రాంతాల భక్తులు పాల్గొన్నారు.

బీసీ కాలనీలో తొలిసారిగా కనకదుర్గమ్మ ప్రతిష్ఠాపన

బీసీ కాలనీలో ఈ ఏడాది తొలిసారిగా కనకదుర్గ అమ్మవారిని ప్రతిష్ఠించడంతో స్థానిక భక్తుల్లో ఆధ్యాత్మిక ఉత్సాహం నెలకొంది. *జైశ్రీరామ్ మహిళా కమిటీ సభ్యుల* పర్యవేక్షణలో అమ్మవారికి నిత్యం ప్రత్యేక పూజలు, భక్తి కార్యక్రమాలు నిర్వహిస్తున్నారు. అమ్మవారి వివిధ అవతారాలను ప్రతిబింబించేలా బాలికలు ప్రదర్శించిన నృత్యాలు భక్తులను మంత్రముగ్ధులను చేశాయి. భక్తి గీతాలు, పూజలు, అమ్మవారి నామస్మరణతో కాలనీలో ఆధ్యాత్మిక శోభ సంతరించుకుంది. భక్తుల రాకతో దుర్గామాత మండపం సందడిగా మారగా, అమ్మవారి కృపాకటాక్షాలు అందరికీ కలగాలని భక్తులు ప్రార్థించారు.

లోకల్ గైడ్/తాండూరు:
కాంగ్రెస్ ప్రభుత్వానికి దోచుకోవడం తప్ప ప్రజలకు పాలన అందించడం చేతకావడం లేదని మాజీ ఎమ్మెల్యే పైలట్ రోహిత్ రెడ్డి విమర్శించారు. గురువారం తాండూరులోని తన నివాసంలో ఏర్పాటు చేసిన విలేకరుల సమావేశంలో ఆయన మాట్లాడుతూ.. గత బీఆర్ఎస్ ప్రభుత్వ హయాంలో రైతులకు 24 గంటల ఉచిత నాణ్యమైన విద్యుత్ అందించామని గుర్తుచేశారు. ప్రస్తుతం విద్యుత్ కోతలు, నీటి కొరతతో రైతులు పంటలను కాపాడుకునేందుకు ఇబ్బందులు పడుతున్నారని ఆరోపించారు.
తాండూరు ప్రాంతంలో ఇసుక అక్రమ రవాణా జరుగుతున్నా అధికారులు ఎందుకు చర్యలు తీసుకోవడం లేదని ప్రశ్నించారు. అక్రమ రవాణాను అరికట్టి ప్రభుత్వ ఆదాయానికి గండి పడకుండా చూడాలన్నారు. నియోజకవర్గ ప్రజా సమస్యల పరిష్కారంపై ఎమ్మెల్యే నిర్లక్ష్యంగా వ్యవహరిస్తున్నారని విమర్శించారు. ప్రజలకు ఇచ్చిన హామీలను నెరవేర్చి, రైతులు, సామాన్యుల సమస్యల పరిష్కారానికి ప్రభుత్వం ప్రాధాన్యత ఇవ్వాలని డిమాండ్ చేశారు. ఈ కార్యక్రమంలో మాజీ గ్రంథాలయ చైర్మన్ రాజు గౌడ్,పట్టణ వర్కింగ్ ప్రెసిడెంట్ నరేందర్, సీనియర్ నాయకులు పట్లోళ్ల నర్సింలు, తదితరులు పాల్గొన్నారు.

లోకల్ గైడ్/తాండూర్:
భారత మాజీ రాష్ట్రపతి, భారతరత్న డాక్టర్ ఏపీజే అబ్దుల్ కలాం జయంతి వేడుకలను నిర్వహించకపోవడం విచారకరమని తాండూర్ మున్సిపాలిటీ 8వ వార్డు కౌన్సిలర్ జావిద్ ఆవేదన వ్యక్తం చేశారు. దేశానికి విశేష సేవలందించిన మహనీయుల జయంతి వేడుకలను నిర్వహించడం ద్వారా వారి ఆశయాలను, సేవలను భావితరాలకు తెలియజేయాల్సిన బాధ్యత అధికారులపై ఉందన్నారు.
సాధారణ కుటుంబంలో జన్మించి, తన ప్రతిభతో దేశ అత్యున్నత పదవిని అధిరోహించిన అబ్దుల్ కలాం యువతకు ఆదర్శప్రాయుడని కొనియాడారు. ముఖ్యంగా విద్యార్థుల్లో శాస్త్రీయ దృక్పథాన్ని, దేశభక్తిని, ఉన్నత లక్ష్యాలను సాధించాలనే పట్టుదలను పెంపొందించడంలో కలాం జీవితం స్ఫూర్తిదాయకమన్నారు.
ఇలాంటి మహనీయుల జయంతి వేడుకలను నిర్వహించకపోవడం బాధాకరమని జావిద్ ఆవేదన వ్యక్తం చేశారు. భవిష్యత్తులోనైనా సంబంధిత అధికారులు, ప్రజా ప్రతినిధులు,నాయకులు స్పందించి మహనీయుల జయంతి, వర్ధంతి కార్యక్రమాలను అధికారికంగా నిర్వహించి వారికి తగిన గౌరవం కల్పించాలని ఆయన కోరారు.

లోకల్ గైడ్,వికారాబాద్, అక్టోబర్ 15:

వికారాబాద్ పట్టణంలో నిరంతరం పెరుగుతున్న రద్దీని నియంత్రించి, ప్రజల ప్రాణరక్షణే ధ్యేయంగా ఆటోమేటెడ్ ట్రాఫిక్ నిర్వహణ వ్యవస్థను తక్షణమే ఏర్పాటు చేయాలని వైబ్రెంట్ అడ్వకేట్స్ అసోసియేషన్ ఆఫ్ తెలంగాణ ( పిఏఏటి ) వికారాబాద్ జిల్లా యూనిట్ డిమాండ్ చేసింది. ఈ మేరకు గురువారం సంఘ ముఖ్య ప్రతినిధి బృందం సమావేశమై, గౌరవనీయ జిల్లా కలెక్టర్ మరియు జిల్లా మేజిస్ట్రేట్ గారికి సమర్పించాల్సిన సమగ్ర వినతిపత్రాన్ని పూర్తి స్థాయిలో సిద్ధం చేసింది.
గతంలో జిల్లా పోలీస్ సూపరింటెండెంట్ (ఎస్.పి.) గారికి వినతిపత్రం అందించిన క్రమంలో, దాని కొనసాగింపుగా జిల్లా కలెక్టర్‌ను కలవనున్నట్లు సంఘ నాయకులు తెలిపారు. పట్టణంలోని అత్యంత ప్రమాదకరమైన, రద్దీగా ఉండే ప్రధాన కూడళ్ల వద్ద ఆధునిక ఎలక్ట్రానిక్ ట్రాఫిక్ సిగ్నళ్లను ఏర్పాటు చేయడానికి అవసరమైన పరిపాలనా అనుమతులు, తగిన బడ్జెట్ కేటాయింపులు మరియు సంబంధిత ప్రభుత్వ శాఖల మధ్య సమన్వయాన్ని కల్పించాలని ఈ వినతిపత్రం ద్వారా కోరనున్నారు.
ఈ సందర్భంగా అధ్యక్షులు ఎన్. బస్వరాజ్ పటేల్ మాట్లాడుతూ... రోజురోజుకూ పెరుగుతున్న ట్రాఫిక్ వల్ల వాహనదారులు, పాఠశాల విద్యార్థులు, వృద్ధులు మరియు రోజువారీ కోర్టు సముదాయాలకు వచ్చే ప్రజలు తీవ్ర ఇబ్బందులు పడుతున్నారని ఆందోళన వ్యక్తం చేశారు. ప్రజా భద్రతే తమ అసోసియేషన్ ప్రధాన ప్రాధాన్యత అని, వికారాబాద్‌లో సురక్షితమైన, క్రమబద్ధమైన ట్రాఫిక్ వ్యవస్థ పూర్తిస్థాయిలో అందుబాటులోకి వచ్చే వరకు తమ ఉద్యమం శ్రమించకుండా కొనసాగుతుందని స్పష్టం చేశారు.
ఈ సమావేశం మరియు ప్రతినిధి బృందంలో అధ్యక్షులు శ్రీ ఎన్. బస్వరాజ్ పటేల్‌తో పాటు నాయకులు శ్రీ వెంకట్ రెడ్డి, శ్రీ మోహన్ రాథోడ్, శ్రీ జనార్ధన్, శ్రీ కె. పరమేశ్, శ్రీ ఈశ్వర్ రెడ్డి, శ్రీమతి సుమలత, అజీజ్ తదితరులు పాల్గొన్నారు.

భద్రాచలం, లోకల్ గైడ్ న్యూస్ : 
ధాన్యం కొనుగోలు కేంద్రాలకు రైతులు తీసుకొచ్చే వరి ధాన్యాన్ని నాణ్యత ప్రమాణాల ప్రకారం పూర్తిస్థాయిలో పరిశీలించిన తర్వాతే కొనుగోలు చేయాలని జీసీసీ డీఎం రామనందం సూచించారు. ధాన్యంలో తేమ శాతాన్ని తనిఖీ చేయడంతో పాటు, తడిసిన ధాన్యాన్ని కొనుగోలు చేయకుండా జాగ్రత్తలు తీసుకోవాలని కేంద్రాల ఇన్చార్జులకు ఆదేశించారు. గురువారం భద్రాచలం ఐటీడీఏ కార్యాలయంలోని సమావేశ మందిరంలో పౌరసరఫరాల శాఖ ఆధ్వర్యంలో జీసీసీ మేనేజర్లు, ధాన్యం కొనుగోలు కేంద్రాల ఇన్చార్జులకు నిర్వహించిన ఒకరోజు శిక్షణ కార్యక్రమంలో ఆయన పాల్గొన్నారు. ఈ సందర్భంగా రామనందం మాట్లాడుతూ, కొనుగోలు కేంద్రాల పరిధిలోని రైతులు ధాన్యాన్ని విక్రయించేందుకు తీసుకొచ్చినప్పుడు దాని నాణ్యతను పూర్తిస్థాయిలో పరిశీలించాలని తెలిపారు. తేమ శాతాన్ని సాంకేతిక పద్ధతుల్లో తనిఖీ చేసి, నాణ్యత ప్రమాణాలకు అనుగుణంగా ఉన్న ధాన్యాన్ని మాత్రమే కొనుగోలు చేయాలని సూచించారు. కొనుగోలు చేసిన ధాన్యాన్ని జాగ్రత్తగా భద్రపరచాలని స్పష్టం చేశారు. అనంతరం పౌరసరఫరాల శాఖ సాంకేతిక ఇన్చార్జి సతీష్ మాట్లాడుతూ, రైతులు ధాన్యం తీసుకొచ్చిన వెంటనే తేమ శాతాన్ని పరీక్షించాలని, ధాన్యం తడిసిందా లేదా అనే విషయాన్ని క్షుణ్ణంగా పరిశీలించాలని అన్నారు. ధాన్యం నాణ్యతను సాంకేతికంగా ఏ విధంగా తనిఖీ చేయాలో పవర్పాయింట్ ప్రజెంటేషన్ ద్వారా వివరించారు. ఈ కార్యక్రమంలో జీసీసీ మేనేజర్లు సమ్మయ్య, ధాన్యం కొనుగోలు కేంద్రాల 30 మంది ఇన్చార్జులు, జీసీసీ సిబ్బంది తదితరులు పాల్గొన్నారు.

దుమ్ముగూడెం, లోకల్ గైడ్ న్యూస్‌ :
భద్రాద్రి కొత్తగూడెం జిల్లా దుమ్ముగూడెం పోలీస్ స్టేషన్ పరిధిలోని లక్ష్మీనగర్, ములకపాడు గ్రామాల్లో ఏర్పాటు చేసిన సీసీ కెమెరాల పర్యవేక్షణ వ్యవస్థను భద్రాచలం డీఎస్పీ అరుణ్ కుమార్ గురువారం ప్రారంభించారు. ఈ వ్యవస్థ ద్వారా గ్రామాల్లో ఏర్పాటు చేసిన సీసీ కెమెరాలను నేరుగా పోలీస్ స్టేషన్ నుంచే పర్యవేక్షించే సదుపాయం కల్పించారు. ఈ సందర్భంగా డీఎస్పీ మాట్లాడుతూ గ్రామాల్లో జరిగే అనుమానాస్పద కార్యకలాపాలను ఎప్పటికప్పుడు గుర్తించేందుకు, నేరాల నియంత్రణకు, నేరాల ఛేదనకు సీసీ కెమెరాలు ఎంతో ఉపయోగపడతాయని తెలిపారు. సీసీ కెమెరాల ఏర్పాటుతో ప్రజల భద్రతను మరింత బలోపేతం చేయడంతో పాటు శాంతిభద్రతల పరిరక్షణకు సమర్థవంతమైన చర్యలు చేపట్టవచ్చని పేర్కొన్నారు. సీసీ కెమెరాల ఏర్పాటుకు ఆర్థికంగా సహకరించిన వ్యాపారులను డీఎస్పీ సన్మానించి అభినందించారు. ప్రజలు, వ్యాపారులు పోలీసులకు సహకరిస్తూ గ్రామాల్లో నేరాల నివారణలో భాగస్వాములు కావాలని పిలుపునిచ్చారు. ప్రజల సహకారంతో గ్రామాల్లో నిఘా వ్యవస్థను మరింత బలోపేతం చేస్తామని తెలిపారు. అనంతరం దుమ్ముగూడెం పోలీస్ స్టేషన్‌లోని రికార్డులు, పరిసరాలను డీఎస్పీ పరిశీలించారు. విధులు నిర్వహిస్తున్న పోలీస్ అధికారులు, సిబ్బందితో మాట్లాడి వారి సమస్యలను అడిగి తెలుసుకున్నారు. సిబ్బంది సంక్షేమానికి ప్రాధాన్యతనిస్తూ సమస్యల పరిష్కారానికి కృషి చేస్తానని హామీ ఇచ్చారు. పోలీస్ స్టేషన్‌కు వచ్చే బాధితుల సమస్యలను బాధ్యతాయుతంగా పరిష్కరించి, ప్రజలకు మెరుగైన పోలీస్ సేవలు అందించాలని అధికారులకు, సిబ్బందికి సూచించారు. ఈ కార్యక్రమంలో దుమ్ముగూడెం సీఐ వెంకటప్పయ్య, ఎస్‌ఐ జగన్మోహన్ చారి, పోలీస్ అధికారులు, సిబ్బంది తదితరులు పాల్గొన్నారు.

నర్సంపేట క్రైమ్, అక్టోబర్ 14 - లోకల్ గైడ్ :

నర్సంపేటలో గోల్డ్ ఫైనాన్స్ కంపెనీ సేల్స్‌మెన్‌నే బోల్తా కొట్టించి రూ.5.50 లక్షలు ఎగవేసిన ఘటన సంచలనంగా మారింది. గుంటూరుకు చెందిన శ్రీ ఆంజనేయ గోల్డ్ ఫైనాన్స్ కంపెనీకి చెందిన సేల్స్‌మెన్ మోసపోవడంతో పోలీస్ స్టేషన్‌లో ఫిర్యాదు చేశాడు.

ఫిర్యాదులోని వివరాలు..

బాధితుడి కథనం ప్రకారం.. ఏపీ గుంటూరుకు చెందిన శ్రీ ఆంజనేయ గోల్డ్ ఫైనాన్స్ సంస్థ తాకట్టులో ఉన్న బంగారాన్ని విడిపించి కొనుగోలు చేస్తుంటుంది. ఈ మేరకు ఇన్‌స్టాగ్రామ్‌లో యాడ్స్ కూడా ఇస్తోంది.

అక్టోబర్ 12న వరంగల్ జిల్లా చెన్నారావుపేట మండలానికి చెందిన బోడ శ్రీకాంత్ అనే వ్యక్తి కంపెనీని సంప్రదించాడు. తన బంగారం నర్సంపేటలోని ఫెడ్ బ్యాంకులో తాకట్టులో ఉందని, వేలానికి వచ్చిందని, డబ్బు కడితే విడుదలవుతుందని నమ్మించాడు. దీంతో కంపెనీ యాజమాన్యం నిజమని నమ్మి బ్యాంకు స్లిప్పులు, ఆధార్ కార్డు చెక్ చేసి సేల్స్‌మెన్‌ను నర్సంపేటకు పంపింది.

అక్టోబర్ 13 ఉదయం 11 గంటలకు నర్సంపేట బస్టాండ్‌కు వచ్చిన సేల్స్‌మెన్‌ను అంగడి రోడ్‌లోని సెంట్రల్ బ్యాంక్ వద్దకు తీసుకెళ్లాడు శ్రీకాంత్. అక్కడ తన ఖాతాలో డబ్బు వేస్తే బంగారం విడుదలవుతుందని నమ్మించాడు.

దీంతో సేల్స్‌మెన్ కంపెనీ నుండి రూ.5 లక్షలు, తన సొంత ఫోన్‌పే నుండి రూ.50 వేలు కలిపి మొత్తం రూ.5.50 లక్షలు శ్రీకాంత్ ఖాతాలోకి బదిలీ చేశాడు.

డబ్బు పడగానే ఉడాయించాడు..

డబ్బు పడిన వెంటనే "బ్యాంకులోకి వెళ్లి బంగారం తెస్తా, ఇక్కడే ఉండు" అని సేల్స్‌మెన్‌ను బయట కూర్చోబెట్టి లోపలికి వెళ్లినట్లు నటించి అక్కడి నుండి పరారయ్యాడు. ఫోన్ చేస్తే "వస్తున్నా" అంటూ గంటల తరబడి తిప్పించుకుంటూ ఖాతాలోని డబ్బు మొత్తం ఖాళీ చేసి చివరకు ఫోన్ స్విచాఫ్ చేశాడు.
మోసపోయినట్లు గ్రహించిన సేల్స్‌మెన్ నర్సంపేట పోలీసులనుఆశ్రయించాడు
ప్రస్తుతం బాధిత సేల్స్‌మెన్ డబ్బులు పోగొట్టుకుని, గుంటూరు వెళ్లలేక నర్సంపేటలోనే ఉండిపోయాడు.

లోకల్ గైడ్,వికారాబాద్, వికారాబాద్ జిల్లా బ్యూరో :

వికారాబాద్ జిల్లాలోని పరిగి మరియు కొడంగల్ మున్సిపాలిటీల పరిధిలో నూతన బార్ & రెస్టారెంట్ల ఏర్పాటుకు ఎక్సైజ్ శాఖ నోటిఫికేషన్ జారీ చేసినట్లు జిల్లా అబ్కారీ శాఖ అధికారి శ్రీనివాస్ రెడ్డి తెలిపారు.
ఈ రెండు బార్ల లైసెన్సుల కోసం సెప్టెంబర్ 28 నుంచి అక్టోబర్ 12 వరకు దరఖాస్తులను స్వీకరించినట్లు ఆయన వెల్లడించారు. వచ్చిన దరఖాస్తుల వివరాలు క్రింది విధంగా ఉన్నాయి:
  పరిగి మున్సిపాలిటీ పరిధిలోని బార్‌కు: 36 దరఖాస్తులు
 కొడంగల్ మున్సిపాలిటీ పరిధిలోని బార్‌కు: 27 దరఖాస్తులు
ఈ దరఖాస్తుదారులకు లాటరీ విధానం ద్వారా బార్లను కేటాయించే ప్రక్రియ అక్టోబర్ 16, 2026  నిర్వహించనున్నట్లు తెలిపారు. వికారాబాద్ జిల్లా కలెక్టరేట్ ( ఐ డి ఓ సి ) సమావేశ హాలులో, జిల్లా కలెక్టర్ గారి ఆధ్వర్యంలో ఈ లాటరీ ప్రక్రియ జరగనుంది.
దరఖాస్తుదారులు గమనించవలసిన ముఖ్యాంశాలు:
  దరఖాస్తుదారులందరూ అక్టోబర్ 16వ తేదీ ఉదయం 9:30 గంటల కల్లా సమావేశ హాలుకు చేరుకోవాలి.
  దరఖాస్తుదారులు తమ వెంట తెచ్చిన మొబైల్ ఫోన్లను హాలు బయట డిపాజిట్ చేసి లోపలికి రావాలని కోరారు.
 ప్రతి ఒక్కరూ తప్పనిసరిగా తమ ఎంట్రీ పాస్‌ను వెంట తీసుకొని రావాలి.
ఈ ప్రక్రియకు సంబంధించి ఏవైనా సందేహాలు లేదా సమస్యలు ఉంటే 8712658729 నెంబర్‌ను సంప్రదించాలని జిల్లా అబ్కారీ శాఖ అధికారి తెలిపారు.

కారేపల్లి, అక్టోబర్ 14 (లోకల్ గైడ్ న్యూస్):

భక్తుల కొంగుబంగారంగా, కోరిన కోర్కెలు తీర్చే తల్లిగా పేరొందిన ఉసిరికాయలపల్లి శ్రీ కోటమైసమ్మ తల్లి జాతరకు అధికారులు సర్వం సిద్ధం చేస్తున్నారు. ఈ నెల 20వ తేదీ నుంచి మూడు రోజులపాటు నిర్వహించనున్న జాతరకు తెలంగాణలోని వివిధ ప్రాంతాలతోపాటు పొరుగు ప్రాంతాల నుంచి భారీ సంఖ్యలో భక్తులు తరలిరానున్నారు. ఈ నేపథ్యంలో భక్తులకు ఎలాంటి ఇబ్బందులు కలగకుండా భద్రత, ట్రాఫిక్ నియంత్రణ, వాహనాల పార్కింగ్, తాగునీరు, పారిశుద్ధ్యం, దర్శన ఏర్పాట్లపై అధికారులు ప్రత్యేక దృష్టి సారిస్తున్నారు.

*భద్రతా ఏర్పాట్లపై పోలీసుల పరిశీలన*

జాతర ఏర్పాట్లలో భాగంగా సింగరేణి పోలీస్ ఇన్‌స్పెక్టర్ నూనావత్ సాగర్, సబ్‌ఇన్‌స్పెక్టర్ బైరు గోపి ఆలయ పరిసరాలను పరిశీలించి భద్రతా చర్యలు, ట్రాఫిక్ నియంత్రణ, వాహనాల పార్కింగ్ ఏర్పాట్లపై సమీక్షించారు. భక్తుల రాకపోకలకు అంతరాయం కలగకుండా, వాహనాల రద్దీతో ట్రాఫిక్ సమస్యలు తలెత్తకుండా ముందస్తు చర్యలు చేపట్టాలని సూచించారు. జాతర సమయంలో భక్తుల రద్దీని క్రమబద్ధీకరించి, దర్శనాలు సజావుగా జరిగేలా చర్యలు తీసుకోనున్నారు.

*భక్తులకు మెరుగైన సౌకర్యాలు*

మూడు రోజులపాటు జరిగే జాతరకు భారీగా భక్తులు హాజరయ్యే అవకాశం ఉండటంతో తాగునీటి సరఫరా, పారిశుద్ధ్య నిర్వహణ, ఆలయ పరిసరాల పరిశుభ్రత, వాహనాల పార్కింగ్ వంటి అంశాలపై ప్రత్యేక దృష్టి సారిస్తున్నారు. భక్తులు సౌకర్యవంతంగా అమ్మవారిని దర్శించుకునేలా అవసరమైన ఏర్పాట్లు చేపడుతున్నారు. రద్దీ సమయాల్లో ఇబ్బందులు తలెత్తకుండా సంబంధిత శాఖలు సమన్వయంతో పనిచేయనున్నాయి.

*అన్ని శాఖల సమన్వయంతో జాతర నిర్వహణ*

జాతరకు వచ్చే భక్తులకు ఎలాంటి ఇబ్బందులు కలగకుండా అవసరమైన అన్ని సౌకర్యాలు కల్పిస్తామని ఆలయ ట్రస్ట్ చైర్మన్ డాక్టర్ పర్సా పట్టాభి రామారావు, ఆలయ కార్యనిర్వహణాధికారి కే. వెంకటయ్య తెలిపారు. వివిధ ప్రభుత్వ శాఖల అధికారులతో సమన్వయం చేసుకుంటూ జాతరను విజయవంతంగా నిర్వహించేందుకు కృషి చేస్తున్నట్లు వెల్లడించారు. ప్రతి ఏడాది దసరా సందర్భంగా నిర్వహించే కోటమైసమ్మ తల్లి జాతరకు ఉమ్మడి ఖమ్మం జిల్లాతోపాటు తెలంగాణలోని వివిధ ప్రాంతాల నుంచి భక్తులు కుటుంబ సమేతంగా తరలివచ్చి అమ్మవారిని దర్శించుకుని మొక్కులు చెల్లించుకుంటారు. ఈ ఏడాది కూడా భక్తుల రద్దీ అధికంగా ఉండే అవకాశం ఉండటంతో జాతర నిర్వహణకు అధికారులు ముందస్తు చర్యలు చేపడుతున్నారు. ఈ కార్యక్రమంలో ఆలయ ఉద్యోగులు పగడాల మోహన్ కృష్ణ, పర్సా లలిత్ సాయి, ప్రధాన అర్చకులు కొత్తలంక కైలాష్ శర్మ, భైరవభట్ల సాయిరాం శర్మ తదితరులు పాల్గొన్నారు.

కారేపల్లి, అక్టోబర్ 14 (లోకల్ గైడ్ న్యూస్):

సింగరేణి మండలం మంగలి తండాలో అక్రమ నాటుసారా తయారీ, విక్రయాలపై ఎక్సైజ్ అధికారులు మెరుపుదాడులు నిర్వహించారు. ఈ దాడుల్లో విక్రయానికి సిద్ధంగా ఉన్న 4 లీటర్ల నాటుసారాను స్వాధీనం చేసుకుని, తయారీకి సిద్ధంగా ఉంచిన 200 లీటర్ల బెల్లం పులుపు మిశ్రమాన్ని ధ్వంసం చేశారు. ఈ ఘటనకు సంబంధించి ఇద్దరిపై కేసులు నమోదు చేశారు. డీటీఎఫ్ సీఐ ఎన్. రంగస్వామి, సింగరేణి ఎక్సైజ్ సీఐ పి. లింగయ్య ఆధ్వర్యంలో అధికారులు తనిఖీలు చేపట్టారు. ఈ సందర్భంగా అక్రమ నాటుసారా తయారీ, విక్రయాలకు పాల్పడితే కఠిన చర్యలు తప్పవని హెచ్చరించారు.

నాటుసారాతో ఆరోగ్యానికి ముప్పు!

నాటుసారా సేవించడం ఆరోగ్యానికి తీవ్ర హాని కలిగించవచ్చు. కల్తీ పదార్థాలతో తయారైన మద్యం ప్రాణాపాయానికి కూడా దారితీయవచ్చు. ప్రజలు ఇలాంటి అక్రమ మద్యం జోలికి వెళ్లకుండా అప్రమత్తంగా ఉండాలని, గ్రామాల్లో ఎక్కడైనా నాటుసారా తయారీ లేదా విక్రయాలు గుర్తిస్తే సంబంధిత అధికారులకు సమాచారం అందించాలని సూచిస్తున్నారు. ప్రజల ఆరోగ్యం, కుటుంబాల భద్రత దృష్ట్యా అక్రమ మద్యం వ్యాపారాన్ని అరికట్టేందుకు ప్రతి ఒక్కరూ సహకరించాలని కోరుతున్నారు. ఈ దాడుల్లో హెడ్ కానిస్టేబుల్ డి. ప్రకాష్‌రావుతో పాటు ఇతర ఎక్సైజ్ సిబ్బంది పాల్గొన్నారు.

జిల్లేడు చౌదరిగూడెం.( లోకల్ గైడ్ )

పట్టభద్రుల ఎమ్మెల్సీ ఎన్నికలు రానున్న సందర్బంగా  అర్హత కలిగిన పట్టభద్రుడిని ఓటరుగా నమోదు చేసి, వారికి ఓటు హక్కు కల్పించే విదంగా బిజెపి కార్యకర్తలు పని చేయాలని జిల్లేడు చౌదరిగూడ బిజెపి మండల పార్టీ అధ్యక్షులు రాజు పిలుపు నిచ్చారు. ఎమ్మెల్సీ ఎన్నికల నేపథ్యంలో పార్టీ కార్యకర్తలతో మండల కేంద్రంలో సమీక్ష సమావేశాన్ని నిర్వహించారు.
ఈ కార్యక్రమానికి ముఖ్య అతిథిగా జిల్లా కార్యదర్శి ఇస్నాతి శ్రీనివాస్  హాజరయ్యారు. ఈ సందర్భంగా ఆయన మాట్లాడుతూ రాబోయే పట్టభద్రుల ఎమ్మెల్సీ ఎన్నికల్లో ప్రతి అర్హత కలిగిన పట్టభద్రుడికి ఓటు హక్కు కల్పించే విధంగా ప్రతి ఒక్కరూ కృషి చేయాలని కోరారు.పట్టభద్రుల ఓట్లను సమగ్రంగా నమోదు చేయించి, ఎమ్మెల్సీ ఎన్నికల్లో భారతీయ జనతా పార్టీ అభ్యర్థిని గెలిపించే లక్ష్యంతో నాయకులు, కార్యకర్తలు సమష్టిగా పనిచేయాలని కోరారు.
ఈ కార్యక్రమంలోఎమ్మెల్సీ మండల కన్వీనర్ బోయ కుర్మయ్య, జిల్లా సోషల్ మీడియా కన్వీనర్ నవీన్, కొందుర్గు అధ్యక్షులు లక్ష్మి కాంత్ రెడ్డి, ప్రధాన కార్యదర్శి గొల్ల రాజు,విట్టల్ నాయక్,,యాదయ్య,లింగం యాదగిరి నరేష్ శ్రీధర్ రాజు వెంకటేష్ తదితరులు పాల్గొన్నారు.

జిల్లేడు చౌదరిగూడెం (లోకల్ గైడ్ )

రాబోయే పట్టభద్రుల ఎమ్మెల్సీ ఎన్నికల్లో కాంగ్రెస్‌ అభ్యర్థుల విజయానికి పార్టీ శ్రేణులు సమష్టిగా కృషి చేయాలని కాంగ్రెస్‌ నాయకులు పిలుపునిచ్చారు. ఈ మేరకు చౌదరిగూడ మండల కాంగ్రెస్‌ పార్టీ అధ్యక్షుడు జకారం శేఖర్‌ ఆధ్వర్యంలో పట్టభద్రుల ఎమ్మెల్సీ ఎన్నికల సన్నాహక సమావేశంతో పాటు పట్టభద్రుల నమోదు కార్యక్రమాన్ని నిర్వహించారు. ఈ కార్యక్రమంలో మండల ఇన్‌చార్జి, సింగిల్‌ విండో చైర్మన్‌ శ్రీధర్‌ రెడ్డి, తాలూకా సమన్వయ కమిటీ సభ్యుడు, వ్యవసాయ మార్కెట్‌ కమిటీ వైస్‌ చైర్మన్‌ బాబర్‌ ఖాన్‌, రఘు నాయక్‌, ఇబ్రహీం, డైరెక్టర్‌ కరుణాకర్‌ పాల్గొన్నారు. ఈ సందర్భంగా నాయకులు మాట్లాడుతూ రాబోయే పట్టభద్రుల ఎమ్మెల్సీ ఎన్నికల్లో కాంగ్రెస్‌ అభ్యర్థులకు మద్దతు కూడగట్టేందుకు ప్రతి నాయకుడు, కార్యకర్త క్షేత్రస్థాయిలో పనిచేయాలని సూచించారు. కాంగ్రెస్‌ ప్రభుత్వం అధికారంలోకి వచ్చిన తర్వాత నిరుద్యోగులకు ఉపాధి అవకాశాలు కల్పించేందుకు చర్యలు చేపట్టిందని, ఇప్పటివరకు 70 వేల ఉద్యోగాలను భర్తీ చేసినట్లు తెలిపారు. త్వరలో మరిన్ని ఉద్యోగ నియామకాలకు సంబంధించి ప్రకటనలు వెలువడనున్నాయని పేర్కొన్నారు. నిరుద్యోగుల సమస్యల పరిష్కారానికి ప్రభుత్వం తీసుకుంటున్న చర్యలను పట్టభద్రులకు వివరించాలని సూచించారు.
ప్రభుత్వంపై ఆర్థిక భారం ఉన్నప్పటికీ ఉద్యోగుల సంక్షేమానికి ప్రాధాన్యమిస్తున్నామని సింగిల్‌ విండో చైర్మన్‌ శ్రీధర్‌ రెడ్డి తెలిపారు. పదవీ విరమణ చేసిన ఉద్యోగులకు సంబంధించిన బకాయిల చెల్లింపుల కోసం రూ.9 వేల కోట్లు వెచ్చించినట్లు వెల్లడించారు. ఉద్యోగ నియామకాలు, ఉద్యోగుల సంక్షేమానికి సంబంధించి ప్రభుత్వం తీసుకున్న నిర్ణయాలను పట్టభద్రులకు వివరించాల్సిన బాధ్యత పార్టీ నాయకులు, కార్యకర్తలపై ఉందన్నారు. పట్టభద్రుల నమోదు కార్యక్రమాన్ని విస్తృతంగా చేపట్టి అర్హులైన ప్రతి ఒక్కరూ తమ పేర్లు నమోదు చేసుకునేలా కృషి చేయాలని కోరారు. ఈ కార్యక్రమంలో మండల మాజీ అధ్యక్షుడు రాజు, మహిళా అధ్యక్షురాలు రజిత, సర్పంచులు శ్వేత, చంద్రబాబు, రామచంద్రయ్య, నర్సింలు, శివ, పార్టీ నాయకులు నర్సింహా, బాలరాజు, రవి, ఆంజనేయులు, అమృత, దామోదర్‌తో పాటు పలువురు కాంగ్రెస్‌ నాయకులు, కార్యకర్తలు తదితరులు పాల్గొన్నారు.

జిల్లేడు చౌదరిగూడెం ( లోకల్ గైడ్)

 గ్రామీణ ప్రాంతాల్లో చేపట్టే అభివృద్ధి పనుల ప్రారంభోత్సవ కార్యక్రమంలో స్థాపించే శిలా పలకం పై సంబందిత మంత్రుల శాఖల స్థాయి నేతలు పేర్లు, అలాగే స్థానిక ప్రజా ప్రతినిధులైన పేర్లతో పాటు గ్రామ వార్డు మెంబర్ ల పేర్లను కూడ నమోదు చేయాలని మండల వార్డు మెంబర్ ఫోరం కమిటీ సభ్యులు, అలాగే మండల వార్డు మెంబర్ ల కమిటీ అధ్యక్షులు రాజు నాయక్ ఎంపిడిఓ పుష్పలత ను కోరారు. మంగళవారం మండల వార్డు మెంబర్ ల ఫోరం కమిటీ ఆధ్వర్యంలో 
 ఎంపిడిఓ కు వినతి పత్రాన్ని అందజేశారు.రాజ్యాంగం కల్పించిన హక్కు ప్రకారం వార్డు మెంబర్ లు ప్రజలు వేసిన ఓట్లతో గెలుపొందండం జరుగుతుందని గుర్తు చేశారు. స్థానిక ప్రజాప్రతి నిధులకు ఇచ్చే స్థాయి, వార్డు మెంబర్ లకు ఇవ్వడం లేదని వార్డు మొంబర్ ల కమిటీ ఆవేదన వ్యక్తం చేసింది. రాబోయే కాలంలో చేపట్టే అభివృద్ధి శిలా పలకాలపై వార్డు మెంబర్ ల పేర్లను నమోదు చేసేలా చర్యలు తీసుకోవాలని ఎంపిడిఓ కు విజ్ఞప్తి చేశారు. ఈ కార్యక్రమంలో వార్డు మెంబర్ ల మండల కమిటీ అధ్యక్షులు రాజు నాయక్,మండల వార్డు మెంబర్ ల కమిటీ సభ్యులు పాల్గొన్నారు.

కారేపల్లి, అక్టోబర్ 14 (లోకల్ గైడ్ న్యూస్ ) :

అనారోగ్యంతో బాధపడుతున్న కమ్యూనిస్టు నేత రావుల నాగయ్యకు మాదారం సర్పంచ్ ఉమా నరేష్ అండగా నిలిచారు. కుటుంబ సభ్యులు అందుబాటులో లేని సమయంలో బాధ్యతగా స్పందించి, మెరుగైన వైద్యం అందేలా తక్షణ చర్యలు చేపట్టారు. సింగరేణి మండలం మాదారం గ్రామానికి చెందిన రావుల నాగయ్య గత ఐదు రోజులుగా తీవ్ర జ్వరంతో బాధపడుతున్నారు. ఈ క్రమంలో ఆయన రక్త కణాల సంఖ్య 50 వేల స్థాయికి పడిపోవడంతో పరిస్థితి ఆందోళనకరంగా మారింది. ఈ విషయాన్ని ప్రభుత్వ వైద్యశాల వైద్యుడు డాక్టర్ సురేష్ సర్పంచ్ ఉమా నరేష్ దృష్టికి తీసుకెళ్లారు. వెంటనే స్పందించిన ఉమా నరేష్, కాంగ్రెస్ నేత నరేష్ కుమార్‌తో కలిసి అంబులెన్స్‌ను ఏర్పాటు చేయించి, వైద్యుల సూచన మేరకు నాగయ్యను ఖమ్మం ప్రభుత్వ ఆసుపత్రికి తరలించేలా చర్యలు తీసుకున్నారు. అక్కడ మెరుగైన వైద్యం అందేలా సంబంధిత అధికారులతో మాట్లాడి అవసరమైన సహకారం అందించారు. ఈ సహాయక కార్యక్రమంలో వార్డు సభ్యుడు పాయం మునీందర్, తిరుమలగిరి నరేష్, బానోత్ కోటేష్, ఏనుగు శివయ్య, అంబులెన్స్ డ్రైవర్ పోతనబోయిన సుధాకర్ తదితరులు పాల్గొన్నారు. ప్రజలకు ఆపద వచ్చినప్పుడు అండగా నిలవడమే తన బాధ్యతగా భావిస్తూ, సకాలంలో స్పందించి నాగయ్యకు సహాయం అందించిన సర్పంచ్ ఉమా నరేష్‌ను స్థానికులు అభినందిస్తున్నారు.

లోకల్ గైడ్ వికారాబాద్ జిల్లా ప్రతినిధి / కొడంగల్:

హకీంపేట్‌లో త్వరలో జరగనున్న వ్యవసాయ అనుబంధ శాఖల ఎక్స్‌పో ఏర్పాట్లను ఉన్నతాధికారులు పరిశీలించారు. అదేవిధంగా కొడంగల్‌లో నిర్మాణ దశలో ఉన్న నూతన పోలీస్ స్టేషన్ భవన పనులను జిల్లా ఎస్పీ తనిఖీ చేశారు.
ఎక్స్‌పో ఏర్పాట్ల పరిశీలన
హకీంపేట్‌లో ఘనంగా నిర్వహించనున్న వ్యవసాయ అనుబంధ శాఖల ఎక్స్‌పో వేదికతో పాటు ఇతర ఏర్పాట్లను అగ్రికల్చర్ ప్లానింగ్ కమిషన్ సెక్రటరీ శ్రీ సురేంద్ర మోహన్ (ఐఏఎస్ ), జిల్లా కలెక్టర్ శ్రీ దీపక్ తివారి (ఐఏఎస్ ), జిల్లా ఎస్పీ శ్రీమతి స్నేహ మెహ్రా (ఐపీస్ ) తదితర సంబంధిత శాఖల అధికారులతో కలిసి పరిశీలించారు.
ఈ సందర్భంగా ఎక్స్‌పోకు విచ్చేసే రైతులు, ప్రజలు మరియు వివిధ శాఖల ప్రతినిధులకు ఎలాంటి అసౌకర్యం కలగకుండా అన్ని రకాల ముందస్తు ఏర్పాట్లు చేయాలని అధికారులను ఆదేశించారు. ముఖ్యంగా కార్యక్రమానికి వచ్చే ప్రజల రాకపోకలకు ఎలాంటి అంతరాయం కలగకుండా చేపట్టాల్సిన ట్రాఫిక్ మళ్లింపులు, వాహనాల పార్కింగ్ వసతులు మరియు పటిష్టమైన భద్రతా చర్యలపై పోలీస్ శాఖ తీసుకోవాల్సిన విధివిధానాలపై చర్చించి తగిన సూచనలు చేశారు.
కొడంగల్ పోలీస్ స్టేషన్ భవన నిర్మాణ పనుల పరిశీలన
ఎక్స్‌పో ఏర్పాట్ల పరిశీలన అనంతరం జిల్లా ఎస్పీ శ్రీమతి స్నేహ మెహ్రా (ఐపీస్ ) కొడంగల్‌లో నిర్మాణ దశలో ఉన్న నూతన పోలీస్ స్టేషన్ భవనాన్ని సందర్శించారు.
ఈ సందర్భంగా భవన నిర్మాణ పనుల పురోగతిని క్షుణ్ణంగా పరిశీలించారు. పనులు జరుగుతున్న తీరుపై సంబంధిత కాంట్రాక్టర్లను అడిగి వివరాలు తెలుసుకున్నారు. ప్రస్తుతం భవనం ఏ దశలో ఉంది, ఇంకా ఏయే పనులు మిగిలి ఉన్నాయి అనే అంశాలపై ఆరా తీశారు. నిర్మాణ పనులను నిర్ణీత గడువులోగా, నాణ్యతా ప్రమాణాలతో పూర్తి చేయాలని కాంట్రాక్టర్లకు ఆదేశాలు జారీ చేశారు.

భద్రాచలం, లోకల్ గైడ్ న్యూస్ :

గోదావరి పుష్కరాలను దృష్టిలో ఉంచుకొని భద్రాచలం శ్రీ సీతారామచంద్రస్వామి ఆలయ అభివృద్ధి పనులు, పుష్కర ఘాట్ల నిర్మాణం, భక్తులకు అవసరమైన మౌలిక సదుపాయాల కల్పన పనులను యుద్ధ ప్రాతిపదికన పూర్తి చేయాలని జిల్లా కలెక్టర్ అంకిత్ అధికారులను ఆదేశించారు. మంగళవారం సబ్ కలెక్టర్ మృణాల్ శ్రేష్ఠ, సంబంధిత శాఖల అధికారులు, ఇంజినీర్లతో కలిసి వివిధ ప్రాంతాల్లో జరుగుతున్న అభివృద్ధి పనులను క్షేత్రస్థాయిలో పరిశీలించి పురోగతిని సమీక్షించారు. ముందుగా శ్రీ సీతారామచంద్రస్వామి ఆలయాన్ని సందర్శించిన కలెక్టర్, ఉత్తర ద్వారం వద్ద జరుగుతున్న అభివృద్ధి పనులను పరిశీలించారు. ఆలయ ఉత్తర, దక్షిణ ప్రాంతాల్లో చేపట్టిన స్లాబ్ నిర్మాణం, రక్షణ గోడలు, మట్టి నింపే పనులను నిర్దేశిత గడువులోగా పూర్తి చేయాలని సూచించారు. అనంతరం ఆలయం నుంచి గోదావరి స్నాన ఘాట్లకు వెళ్లే రహదారిని పరిశీలించి, భక్తుల రాకపోకలకు ఇబ్బందులు కలగకుండా ప్రస్తుతం సుమారు 25 అడుగుల వెడల్పు ఉన్న రహదారిని 30 అడుగులకు విస్తరించే ప్రతిపాదనపై అధికారులతో చర్చించారు. రహదారి విస్తరణకు అవసరమైన భూమి, అనుమతులు, నిధులు, బిల్లుల పరిష్కారానికి రెవెన్యూ, రోడ్లు భవనాల శాఖలు సమన్వయంతో పనిచేయాలని ఆదేశించారు. వైకుంఠధామానికి వెళ్లే మార్గాన్ని పరిశీలించిన కలెక్టర్, పుష్కరాల సమయంలో భక్తుల రద్దీని దృష్టిలో ఉంచుకొని ప్రత్యామ్నాయ రహదారి ఏర్పాటు కోసం ప్రణాళిక సిద్ధం చేయాలని సూచించారు. ట్రాఫిక్ నియంత్రణకు చర్యలు చేపట్టడంతో పాటు వైకుంఠధామం చుట్టూ ప్రహరీ నిర్మాణానికి ప్రతిపాదనలు రూపొందించాలని తెలిపారు. విద్యుత్ దహనవాటికకు సంబంధించిన అనుమతులు, ఇతర అభివృద్ధి పనుల టెండర్ ప్రక్రియను వేగవంతం చేయాలని ఆదేశించారు. అనంతరం గోదావరి పుష్కర ఘాట్ల నిర్మాణ పనులను పరిశీలించారు. ఉత్తర వైపు సుమారు 270 మీటర్లు, దక్షిణ వైపు 230 మీటర్ల పొడవున చేపడుతున్న ఘాట్ల నిర్మాణాలను నిర్ణీత గడువులోగా పూర్తి చేయాలని స్పష్టం చేశారు. ఘాట్ల వద్ద మెట్లు, దిగే ప్రాంతాలు, రక్షణ గోడలను పటిష్టంగా నిర్మించాలని, పాత గోడలకు పగుళ్లు ఏర్పడిన చోట మరమ్మతులు చేపట్టాలని సూచించారు. పర్ణశాల వద్ద టెండర్ ప్రక్రియను త్వరగా పూర్తి చేసి పనులు ప్రారంభించాలని ఆదేశించారు. పుష్కరాలకు వచ్చే భక్తుల వసతి కోసం దేవాదాయ శాఖ ఆధ్వర్యంలో నిర్మిస్తున్న వసతి గృహం, గోశాల అభివృద్ధి పనులను కూడా కలెక్టర్ సమీక్షించారు. భద్రాచలంతో పాటు చర్ల, అశ్వాపురం, దుమ్ముగూడెం, పర్ణశాల, కిన్నెరసాని పరిసర ప్రాంతాల్లో భక్తులకు అవసరమైన మౌలిక సదుపాయాలు కల్పించేందుకు రూపొందించిన ప్రతిపాదనలపై అధికారులతో చర్చించారు. సారపాక బ్రిడ్జి ప్రాంతాన్ని పరిశీలించిన కలెక్టర్, ఐటీసీ నుంచి భద్రాచలం బ్రిడ్జి వరకు సుమారు మూడు కిలోమీటర్ల మేర రహదారి సుందరీకరణ చేపట్టాలని సూచించారు. రహదారి మధ్య విభాజకాలతో పాటు ఇరువైపులా పుష్పించే మొక్కలు నాటేందుకు అనువైన ప్రాంతాలను గుర్తించాలని, బౌగెన్‌విల్లియా వంటి రంగురంగుల పూల మొక్కలతో సుందరీకరణ చేపట్టేందుకు సమగ్ర ప్రణాళికను వారం రోజుల్లో సిద్ధం చేయాలని ఆదేశించారు. ఈ సందర్భంగా కలెక్టర్ అంకిత్ మాట్లాడుతూ, గత మార్చిలో ముఖ్యమంత్రి చేతుల మీదుగా శంకుస్థాపన చేసిన అనంతరం ఇరిగేషన్, దేవాదాయ, రోడ్లు భవనాల శాఖల ఆధ్వర్యంలో ఆలయ అభివృద్ధి, పుష్కరాల ఏర్పాట్ల పనులు కొనసాగుతున్నాయని తెలిపారు. ముక్కోటి ఏకాదశి, శ్రీరామనవమి, గోదావరి పుష్కరాల గడువులను దృష్టిలో ఉంచుకొని పనులను వేగవంతం చేయాలని పేర్కొన్నారు. నిర్మాణ పనుల కోసం సుమారు 200 మంది కార్మికులతో పాటు 10 ప్రత్యేక బృందాలను ఏర్పాటు చేసి, ఉదయం 6 గంటల నుంచి రాత్రి 10 గంటల వరకు విద్యుత్ దీపాల వెలుగులో పనులు నిర్వహిస్తున్నట్లు వివరించారు. భద్రాచలం ప్రధాన పుష్కర క్షేత్రం కావడంతో తెలంగాణతో పాటు ఆంధ్రప్రదేశ్, ఛత్తీస్‌గఢ్, మహారాష్ట్ర రాష్ట్రాల నుంచి పెద్ద సంఖ్యలో భక్తులు వచ్చే అవకాశం ఉందని కలెక్టర్ తెలిపారు. భక్తులకు తాగునీరు, మరుగుదొడ్లు, రవాణా, పోలీసు భద్రత, వైద్య సేవలు తదితర సౌకర్యాలు కల్పించేందుకు ముందస్తు ప్రణాళికలు సిద్ధం చేయాలని సూచించారు. మార్చిలో జరిగే శ్రీరామనవమి ఉత్సవాలతో పాటు జూన్ 27 నుంచి జూలై 7 వరకు నిర్వహించనున్న గోదావరి పుష్కరాలను దృష్టిలో ఉంచుకొని నవంబర్, డిసెంబర్ నెలల నుంచే అవసరమైన ఏర్పాట్లను ప్రణాళికాబద్ధంగా ప్రారంభించాలని అధికారులకు దిశానిర్దేశం చేశారు. ఈ పర్యటనలో దేవస్థానం ఈవో దామోదర్ రావు, రోడ్లు భవనాల శాఖ ఈఈ నాగేశ్వరరావు, దేవస్థానం డీఈ రవీందర్ రావు, తహసీల్దార్ రవికుమార్, ఇన్‌చార్జి ఎంపీడీవో, జీపీ ఈవో శ్రీనివాస్, ఇంజినీరింగ్ శాఖ అధికారులు, సంబంధిత శాఖల సిబ్బంది పాల్గొన్నారు.

లోకల్ గైడ్, ధారూర్  వికారాబాద్ జిల్లా బ్యూరో (అక్టోబర్ 13 ): 

వికారాబాద్ జిల్లా ధారూర్ పోలీస్ స్టేషన్ నూతన సబ్ ఇన్ స్పెక్టర్ (ఎస్‌ఐ)గా సురేష్ సోమవారం సాయంత్రం బాధ్యతలు స్వీకరించారు.ఇప్పటివరకు ఇక్కడ ఎస్‌ఐగా విధులు నిర్వహించిన రాఘవేందర్ బదిలీ కాగా, ఆయన స్థానంలో సురేష్ బాధ్యతలు చేపట్టారు.
ఈ సందర్భంగా నూతన ఎస్‌ఐ సురేష్ మాట్లాడుతూ... మండలంలో శాంతిభద్రతల పరిరక్షణకు ప్రథమ ప్రాధాన్యత ఇస్తానని తెలిపారు. అక్రమ రవాణా, గంజాయి అమ్మకాలు, జూదం, చట్టవ్యతిరేక కార్యకలాపాలకు పాల్పడేవారిపై చట్టపరంగా కఠిన చర్యలు తీసుకుంటామని హెచ్చరించారు. ప్రజలకు పోలీస్ సేవలు ఎల్లవేళలా అందుబాటులో ఉంటాయని, ఏవైనా సమస్యలు ఉంటే ధైర్యంగా స్టేషన్‌కు వచ్చి ఫిర్యాదు చేయవచ్చని స్పష్టం చేశారు.
శాంతిభద్రతల పరిరక్షణలో పోలీస్ శాఖకు మండల ప్రజలు, ప్రజాప్రతినిధులు, విలేకరులు పూర్తి సహకారం అందించాలని ఆయన కోరారు. ముఖ్యంగా యువత చెడు వ్యసనాలకు దూరంగా ఉండి, ఉజ్వల భవిష్యత్తును నిర్మించుకోవాలని సూచించారు.
అనంతరం బాధ్యతలు స్వీకరించిన నూతన ఎస్‌ఐ సురేష్‌ను పోలీస్ స్టేషన్ సిబ్బంది, స్థానిక నాయకులు, పూలమాలలు, శాలువాలతో ఘనంగా సత్కరించి అభినందనలు తెలిపారు.ఈ కార్యక్రమంలో పోలీస్ స్టేషన్ ఏఎస్ఐలు, కానిస్టేబుళ్ళు, సిబ్బంది తదితరులు పాల్గొన్నారు.

భద్రాచలం, లోకల్ గైడ్ న్యూస్ :

భద్రాచలం ఐటీడీఏ ఆధ్వర్యంలో ఎస్సై, పోలీస్ ఉద్యోగాల ఉచిత శిక్షణకు గిరిజన అభ్యర్థుల ఎంపిక ప్రక్రియను విజయవంతంగా పూర్తి చేసినట్లు డిప్యూటీ డైరెక్టర్‌ ట్రైబల్ వెల్ఫేర్ చందన తెలిపారు. ఐటీడీఏ ప్రాజెక్టు అధికారి బి. రాహుల్ ఆదేశాల మేరకు పీఈటీసీ ప్రిన్సిపాల్ డాక్టర్ వీరు నాయక్ ఆధ్వర్యంలో సర్టిఫికెట్ల పరిశీలన, శారీరక దారుఢ్య పరీక్షలను ఎలాంటి పొరపాట్లకు తావులేకుండా నిర్వహించినట్లు పేర్కొన్నారు. మంగళవారం భద్రాచలం ఐటీడీఏ ప్రాంగణంలోని పీఎంఆర్సీ భవనంలో అధికారుల పర్యవేక్షణలో అభ్యర్థుల సర్టిఫికెట్ల పరిశీలన, శారీరక దారుఢ్య పరీక్షలు నిర్వహించారు. ఈ ఎంపిక ప్రక్రియలో భాగంగా మొత్తం 100 మంది గిరిజన అభ్యర్థులను ఎంపిక చేసినట్లు చందన వెల్లడించారు. వీరిలో 67 మంది బాలురు, 33 మంది బాలికలు ఉన్నారని తెలిపారు. సర్టిఫికెట్ల పరిశీలన, శారీరక దారుఢ్య పరీక్షల్లో ప్రతిభ, మెరిట్‌ ఆధారంగా అభ్యర్థులను ఎంపిక చేసినట్లు ఆమె వివరించారు. ఎంపికైన అభ్యర్థులకు ఎస్సై, పోలీస్ ఉద్యోగాల ఉచిత శిక్షణ అందించనున్నారు. ఈ కార్యక్రమంలో ఏసీఎంఓ రమేష్, పీజీహెచ్ఎం మోతేరు, క్రీడల అధికారి గోపాలరావు, శారీరక విద్యా దర్శకులు రాంబాబు, నాగేశ్వరరావు, పార్వతి, కృష్ణారావు, పీఎంఆర్సీ సిబ్బంది తదితరులు పాల్గొన్నారు.

కారేపల్లి (సింగరేణి ), అక్టోబర్ 13 (లోకల్ గైడ్ న్యూస్ ) : పేదలు, దివ్యాంగులు, పక్షవాతం, బ్రెయిన్ స్ట్రోక్ బాధితులకు మెరుగైన పునరావాస సేవలు అందించాలనే లక్ష్యంతో మిషన్ వాక్ ఫౌండేషన్ వ్యవస్థాపకులు డాక్టర్ బాదావత్ రవి చేపట్టిన సేవా సంకల్పం కార్యరూపం దాల్చింది. ఖమ్మంలోని కపిల్ భవన్‌లో ఏర్పాటు చేసిన మిషన్ వాక్ రిహాబిలిటేషన్ సెంటర్ నవంబర్‌లో ప్రారంభానికి సిద్ధమైంది.

మూడు విభాగాలు.. ప్రత్యేక పునరావాస సేవలు!

🔹 న్యూరో రిహాబిలిటేషన్: పక్షవాతం, బ్రెయిన్ స్ట్రోక్, నరాల సమస్యలతో బాధపడేవారికి నడక, చేతులు–కాళ్ల కదలికలు, కండరాల బలాన్ని మెరుగుపరిచే పునరావాస చికిత్సలు.

🔹 ఆర్థో రిహాబిలిటేషన్: ఎముకలు, కీళ్ల సమస్యలు, ప్రమాదాలు, శస్త్రచికిత్సల అనంతరం కదలికలు మెరుగుపరుచుకోవడానికి, కండరాల బలాన్ని పెంపొందించుకోవడానికి అవసరమైన ఫిజియోథెరపీ సేవలు.

🔹 పీడియాట్రిక్ రిహాబిలిటేషన్: ఎదుగుదలలో ఆలస్యం, కూర్చోవడం, నిలబడటం, నడవడంలో ఇబ్బందులున్న చిన్నారులకు శారీరక కదలికలు, సమతుల్యత మెరుగుపరిచే పునరావాస సేవలు.

గ్రామీణ, గిరిజన ప్రజలకు చేరువలో వైద్యం!

ఇల్లందు, వైరా, సింగరేణి, కారేపల్లి, గార్ల, కామేపల్లి తదితర ప్రాంతాల ప్రజలు పునరావాస చికిత్సల కోసం హైదరాబాద్ వంటి నగరాలకు వెళ్లాల్సిన అవసరాన్ని తగ్గించడంలో ఈ కేంద్రం కీలకంగా నిలవనుంది. పేదలకు అందుబాటులో వైద్యం.. బాధితులకు ఆత్మవిశ్వాసం.. తిరిగి సాధారణ జీవనానికి చేరేందుకు తోడ్పాటు అందించాలనే లక్ష్యంతో డాక్టర్ బాదావత్ రవి చేపట్టిన ఈ ప్రయత్నం ఖమ్మం ప్రాంతంలో వైద్య పునరావాస సేవలకు కొత్త దిశ చూపనుంది.

కారేపల్లి, అక్టోబర్ 13 (లోకల్ గైడ్ న్యూస్):

సింగరేణి మండలంలో ఎమ్మార్పీఎస్, ఎంఎస్పీ నూతన మండల కమిటీలను ఎన్నుకున్నారు. మాదిగ సామాజిక వర్గ అభ్యున్నతి, సామాజిక న్యాయం, హక్కుల సాధన, ప్రజా సమస్యల పరిష్కారమే లక్ష్యంగా నూతన కమిటీలను ఏర్పాటు చేశారు. ఈ ఎన్నికల్లో ఎమ్మార్పీఎస్ మండల అధ్యక్షుడిగా కాంపాటి రవి, ఎంఎస్పీ మండల అధ్యక్షుడిగా రాయల నరేందర్ ఎన్నికయ్యారు.

ఎమ్మార్పీఎస్ కమిటీ ఎన్నిక

మండల ప్రధాన కార్యదర్శులుగా రాయల శ్రీనివాస్, ఆదేర్ల నాగరాజు, ఉపాధ్యక్షులుగా లింగపోగు బసవరాజు, కనకమ పవన్ కుమార్, కార్యదర్శులుగా ఎర్రబెల్లి పవన్, ఆదేర్ల నాగార్జున, సహాయ కార్యదర్శులుగా రాయల అంజి, మెరిగ రాజు ఎన్నికయ్యారు.

ఎంఎస్పీ కమిటీ ఎన్నిక

మండల అధ్యక్షుడిగా రాయల నరేందర్, అధికార ప్రతినిధిగా దండు ప్రసాద్, ఉపాధ్యక్షుడిగా సరికొండ రాములు, కార్యదర్శిగా చిగురుతి అంజయ్య ఎన్నికయ్యారు. జిల్లా కమిటీలోకి మాజీ మండల నాయకులు: గతంలో మండల స్థాయిలో బాధ్యతలు నిర్వహించిన నాగేంద్రబాబు, ఆదేర్ల రామారావులను జిల్లా కమిటీలోకి ఎన్నుకున్నారు. నూతన నాయకత్వం సంఘాలను గ్రామస్థాయి నుంచి మండల స్థాయి వరకు బలోపేతం చేస్తూ, మాదిగ సామాజిక వర్గ హక్కుల పరిరక్షణకు కృషి చేయాలని నాయకులు ఆకాంక్షించారు. ఈ సందర్భంగా ఎమ్మార్పీఎస్ మండల అధ్యక్షుడు కాంపాటి రవి మాట్లాడుతూ, తమపై నమ్మకంతో బాధ్యతలు అప్పగించిన నాయకులకు, కార్యకర్తలకు కృతజ్ఞతలు తెలిపారు. సంఘాల అభివృద్ధికి, సామాజిక న్యాయం సాధనకు, అణగారిన వర్గాల హక్కుల పరిరక్షణకు అంకితభావంతో పనిచేస్తామని పేర్కొన్నారు. ఈ కార్యక్రమంలో జిల్లా మాజీ ఎంఎస్పీ నాయకులు తూరుగంటి అంజయ్య, ఇన్‌చార్జి నాయకులు కనకప్పుడి జనార్దన్, మండల ఇన్‌చార్జి ఆదేర్ల అంజయ్య, మాజీ మండల అధ్యక్షులు తిప్పారపు నాగేందర్, కేశగాని బాలకృష్ణ తదితరులు పాల్గొన్నారు.

భద్రాచలం, లోకల్ గైడ్ న్యూస్ : 
 గిరిజన, గిరిజనేతర ప్రాంతాల ప్రజలకు మెరుగైన వైద్య సేవలు అందించడమే లక్ష్యంగా ఐటీడీఏ నిధులతో చర్ల సామాజిక ఆరోగ్య కేంద్రానికి (సీహెచ్‌సీ) రూ.5.60 లక్షల విలువైన వైద్య పరికరాలు, దుమ్ముగూడెం మండలం ములకలపాడు ప్రాథమిక ఆరోగ్య కేంద్రానికి (పీహెచ్‌సీ) రూ.70 వేల విలువైన వైద్య పరికరాలను అందించినట్లు భద్రాచలం ఎమ్మెల్యే డాక్టర్ తెల్లం వెంకట్రావు, ఐటీడీఏ ప్రాజెక్టు అధికారి బి.రాహుల్ తెలిపారు. మంగళవారం చర్ల సీహెచ్‌సీలో ఆసుపత్రి పర్యవేక్షకుడు సాయి వర్ధన్‌కు పరీక్షల పడకలు, పరీక్షల కోసం ఫోకస్ లైట్లు, ఆక్సిజన్ సిలిండర్లు, ప్రసూతి గదికి ఎయిర్ కండిషనర్ తదితర వైద్య పరికరాలను అందజేశారు. ఈ సందర్భంగా ఎమ్మెల్యే డాక్టర్ తెల్లం వెంకట్రావు మాట్లాడుతూ.. ప్రభుత్వ ఆసుపత్రుల్లో ఆధునిక వైద్య పరికరాలను అందుబాటులోకి తీసుకురావడం ద్వారా పేద, మధ్యతరగతి ప్రజలకు నాణ్యమైన వైద్య సేవలు అందుతాయని తెలిపారు. చర్ల ప్రభుత్వ ఆసుపత్రిని మరింత అభివృద్ధి చేసి, ప్రజలకు మెరుగైన వైద్యం అందించేందుకు చర్యలు తీసుకుంటున్నామని పేర్కొన్నారు. అందుబాటులోకి వచ్చిన పరికరాలను సద్వినియోగం చేసుకుని రోగులకు మెరుగైన సేవలు అందించాలని వైద్యులు, సిబ్బందికి సూచించారు. చర్ల ప్రభుత్వ ఆసుపత్రిలో ఆపరేషన్లు ప్రారంభం కావడంతో చుట్టుపక్కల ప్రాంతాల ప్రజలు స్థానికంగానే వైద్య సేవలు పొందే అవకాశం కలిగిందన్నారు. భద్రాచలం నియోజకవర్గంలో అభివృద్ధి పనులను మరింత ముందుకు తీసుకెళ్తామని, ఆసుపత్రిని మరింత అభివృద్ధి చేయడంతో పాటు త్వరలో రోడ్డు నిర్మాణ పనులు కూడా ప్రారంభిస్తామని తెలిపారు. అనంతరం దుమ్ముగూడెం మండలం ములకలపాడు పీహెచ్‌సీకి రూ.70 వేల విలువైన వైద్య పరికరాలను ఎమ్మెల్యే తెల్లం వెంకట్రావు, ఐటీడీఏ పీవో బి.రాహుల్ అందజేశారు. ఐదు రకాల వైద్య పరికరాలతో పాటు ప్రసూతి సంబంధిత కిట్, బరువు కొలిచే యంత్రం, రక్తపోటు పరీక్షించే యంత్రాన్ని పీహెచ్‌సీ వైద్యుడు డాక్టర్ రుక్మాకర్ రెడ్డికి అందించారు. ఈ సందర్భంగా ఐటీడీఏ పీవో రాహుల్ మాట్లాడుతూ.. ప్రభుత్వ ఆసుపత్రుల్లో మౌలిక వసతులు, వైద్య సదుపాయాలను మెరుగుపరచడంపై ప్రభుత్వం ప్రత్యేక దృష్టి సారించిందన్నారు. మారుమూల ప్రాంతాల్లోని ప్రాథమిక ఆరోగ్య కేంద్రాలకు అవసరమైన వైద్య పరికరాలను అందించడం ద్వారా ప్రజలకు మరింత మెరుగైన వైద్య సేవలు అందించవచ్చని పేర్కొన్నారు. ఈ కార్యక్రమంలో అదనపు జిల్లా వైద్య ఆరోగ్యశాఖ అధికారి సైదులు, డీసీహెచ్ రవిబాబు, ఆసుపత్రుల వైద్యులు, సిబ్బంది తదితరులు పాల్గొన్నారు.

కారేపల్లి (సింగరేణి ), అక్టోబర్ 13 (లోకల్ గైడ్ న్యూస్ ) : కష్టసుఖాల్లో తోడుగా ఉంటూ, ఆపదలో ఒకరికొకరు అండగా నిలుస్తూ సింగరేణి మండల సర్పంచులు ఐక్యతను చాటుకున్నారు. గాదెపాడు గ్రామపంచాయతీ సర్పంచ్, సింగరేణి మండల సర్పంచుల సంఘం అధ్యక్షుడు భూక్యా రంజిత్ కుమార్ ఆధ్వర్యంలో పాటిమీద గుంపు సర్పంచ్ గుగులోత్ సుజాత–సంతోష్ దంపతులను పలువురు సర్పంచులు పరామర్శించారు. వారి ఆరోగ్య పరిస్థితిని అడిగి తెలుసుకుని, కుటుంబ సభ్యులకు మనోధైర్యాన్ని కల్పించారు.

సర్పంచులంతా ఒక్కటే.. కష్టంలో ఎవరికైనా మేమున్నామనే భరోసా!

సర్పంచుల సంఘం అధ్యక్షుడు భూక్యా రంజిత్ కుమార్ చొరవతో నిర్వహించిన ఈ పరామర్శ కార్యక్రమం సర్పంచుల మధ్య ఉన్న ఐక్యతకు, పరస్పర సహకారానికి నిదర్శనంగా నిలిచింది. పదవులు, గ్రామాల సరిహద్దులకు అతీతంగా సర్పంచులంతా ఒక కుటుంబంలా కలిసి ఉండాలనే సందేశాన్ని ఈ కార్యక్రమం చాటిచెప్పింది. తోటి సర్పంచ్ కుటుంబానికి కష్ట సమయంలో అండగా నిలవడం ప్రతి ప్రజాప్రతినిధి బాధ్యతని, ఐకమత్యంతో ముందుకు సాగినప్పుడే పరస్పర సహకారం మరింత బలోపేతం అవుతుందని ఈ సందర్భంగా పలువురు పేర్కొన్నారు.

ఎమ్మెల్యే వీడియో కాల్‌లో పరామర్శ

వైరా శాసనసభ్యులు మాలోత్ రాందాస్ నాయక్ వీడియో కాల్ ద్వారా గుగులోత్ సుజాత ఆరోగ్య పరిస్థితిని అడిగి తెలుసుకున్నారు. త్వరలోనే స్వయంగా వచ్చి పరామర్శిస్తానని చెబుతూ ఆమెకు ధైర్యం చెప్పారు. ప్రతి సర్పంచ్ ఆమె కుటుంబానికి వెన్నుదన్నుగా నిలవాలని సూచించారు.

పరామర్శలో పాల్గొన్న సర్పంచులు

ఈ కార్యక్రమంలో సూర్యతండా సర్పంచ్ బానోత్ రాందాస్ నాయక్, సర్పంచుల సంఘం ఉపాధ్యక్షుడు రేగులగూడెం సర్పంచ్ వీసాం మోతి వీరస్వామి, పేరుపల్లి సర్పంచ్ బానోత్ పద్మ వీరభద్రం , గేట్ కారేపల్లి సర్పంచ్ పూసం ఎల్లయ్య తదితరులు పాల్గొన్నారు.

ఐక్యతే బలం.. పరస్పర సహకారమే లక్ష్యం!

తోటి సర్పంచ్ కుటుంబానికి అండగా నిలిచిన సింగరేణి మండల సర్పంచులు, ఐకమత్యంతో ముందుకు సాగుతామనే సందేశాన్ని ఇచ్చారు. సర్పంచుల సంఘం అధ్యక్షుడు భూక్యా రంజిత్ కుమార్ ఆధ్వర్యంలో జరిగిన ఈ కార్యక్రమం ప్రజాప్రతినిధుల మధ్య సోదరభావానికి, మానవీయ విలువలకు ప్రతీకగా నిలిచింది.

నల్లగొండ ఉమ్మడి జిల్లా ప్రతినిధి. లోకల్ గైడ్.

నల్గొండ నగర అభివృద్ధిలో భాగంగా ప్రతిపాదించిన క్లాక్‌టవర్ జంక్షన్ అభివృద్ధి ప్రాజెక్టును మేయర్  బుర్రి చైతన్య శ్రీనివాస్ రెడ్డి, డిప్యూటీ మేయర్  మహమ్మద్ అష్రఫ్ అలీ వరల్డ్ బ్యాంక్ బృందంతో కలిసి క్షేత్రస్థాయిలో పరిశీలించారు. ఈ సందర్భంగా ప్రతిపాదిత స్కైవాక్, కమర్షియల్ కాంప్లెక్స్, అర్బన్ ప్లాజా, రీచార్జ్ వెల్స్ తదితర అభివృద్ధి పనులపై చర్చించారు. నగర అభివృద్ధితో పాటు పర్యావరణ పరిరక్షణ, ప్రజల భద్రతకు ప్రాధాన్యత ఇవ్వాలని చర్చించారు.ప్రాజెక్టుకు సంబంధించిన పర్యావరణ అనుమతులు, భూసంబంధిత అంశాలు, ప్రజల అభిప్రాయాల సేకరణ, నిర్మాణ సమయంలో తీసుకోవాల్సిన భద్రతా చర్యలు, ఫిర్యాదుల పరిష్కార విధానాలపై వరల్డ్ బ్యాంక్ బృందం పలు సూచనలు చేసింది.ఈ కార్యక్రమంలో మున్సిపల్ కమిషనర్  బి. వంశీకృష్ణ, మాజీ మున్సిపల్ చైర్‌పర్సన్  బుర్రి శ్రీనివాస్ రెడ్డి, మాజీ మున్సిపల్ వైస్ చైర్‌పర్సన్ అబ్బగోని రమేష్,      ఎగ్జిక్యూటివ్ ఇంజనీర్ శ్రీమతి బి. మనోహర, డిప్యూటీ ఎగ్జిక్యూటివ్ ఇంజనీర్  పి. అశోక్ కుమార్, అసిస్టెంట్ ఇంజనీర్  వి. దిలీప్ భర్గవ, , మున్సిపల్ సిబ్బంది తదితరులు పాల్గొన్నారు.

నల్లగొండ ఉమ్మడి జిల్లా ప్రతినిధి. లోకల్ గైడ్.

పట్టణంలో నూతనంగా ఏర్పాటు చేసిన మనోరమ హోటల్ నేడు ప్రారంభమైంది. వినియోగదారులకు నాణ్యమైన ఆహార పదార్థాలను అందించాలనే లక్ష్యంతో హోటల్‌ను ప్రారంభించినట్లు నిర్వాహకులు తెలిపారు.నగర ప్రజలతో పాటు వివిధ ప్రాంతాల నుంచి నల్లగొండకు వచ్చే సందర్శకులకు రుచికరమైన ఆహారాన్ని అందుబాటులో ఉంచేందుకు మనోరమ హోటల్‌ను ఏర్పాటు చేశారు. నాణ్యత, రుచి, పరిశుభ్రతకు ప్రాధాన్యమిస్తూ వినియోగదారులకు మెరుగైన సేవలు అందించడమే తమ లక్ష్యమని నిర్వాహకులు పేర్కొన్నారు.హోటల్ ప్రారంభంతో స్థానికులకు మరో మంచి ఆహార కేంద్రం అందుబాటులోకి వచ్చింది. ఈ సందర్భంగా హోటల్ నిర్వాహకులకు పలువురు శుభాకాంక్షలు తెలిపారు. మనోరమ హోటల్ ప్రజల ఆదరణ పొందుతూ మరింత అభివృద్ధి చెందాలని ఆకాంక్షించారు.

నల్లగొండ ఉమ్మడి జిల్లా ప్రతినిధి . లోకల్ గైడ్.

 నల్గొండ ఇండియన్ రెడ్‌క్రాస్ సొసైటీలో నూతన నాయకత్వం కొలువుదీరింది. సుమారు 12 ఏళ్లుగా ఎన్నికలు లేకుండా కొనసాగుతున్న నిర్వహణ వ్యవస్థకు ఈసారి ఎన్నికలతో మార్పు వచ్చింది. ఆదివారం నిర్వహణ కమిటీ సభ్యుల ఎన్నికలు జరగ్గా, సోమవారం కీలక పదవుల ఎంపిక ప్రక్రియ పూర్తయింది. సొసైటీ చైర్‌పర్సన్‌గా డాక్టర్ హేమలత ఎన్నికై చరిత్ర సృష్టించారు. నల్గొండ రెడ్‌క్రాస్ సొసైటీకి తొలి మహిళా చైర్‌పర్సన్‌గా ఆమె బాధ్యతలు చేపట్టనున్నారు.

రెండు ప్యానళ్ల మధ్య హోరాహోరీ పోటీ.

రెడ్‌క్రాస్ సొసైటీ నిర్వహణ కమిటీ ఎన్నికల్లో డాక్టర్ హేమలత నేతృత్వంలోని నల్గొండ సేవా సమితి ప్యానెల్, గోలి అమరేందర్ రెడ్డి ప్యానెల్ పోటీ పడ్డాయి. మొత్తం 1,385 30 ఓట్లు ఇన్వాయిడ్ అయ్యాయి. మంది ఓటర్లు ఉండగా, 32 మంది అభ్యర్థులు బరిలో నిలిచారు. అక్టోబర్ 11న నిర్వహించిన పోలింగ్‌లో 1,003 మంది ఓటు హక్కును వినియోగించుకున్నారు. అనంతరం చేపట్టిన ఓట్ల లెక్కింపులో 15 మంది నిర్వహణ కమిటీ సభ్యులు ఎన్నికయ్యారు.ఫలితాల్లో డాక్టర్ హేమలత నేతృత్వంలోని నల్గొండ సేవా సమితి ప్యానెల్‌కు 8 స్థానాలు దక్కగా, గోలి అమరేందర్ రెడ్డి ప్యానెల్‌కు 7 స్థానాలు లభించాయి. దీంతో రెండు ప్యానళ్ల మధ్య పోటీ ఆసక్తికరంగా సాగింది. ఒక్కో విడత ఓట్ల లెక్కింపు వెలువడుతున్న కొద్దీ అభ్యర్థులు, వారి మద్దతుదారుల్లో ఉత్కంఠ నెలకొంది.

పది నిమిషాల్లోనే ఏకగ్రీవ ఎంపిక.

నిర్వహణ కమిటీ సభ్యుల ఎన్నికల అనంతరం చైర్‌పర్సన్, వైస్ చైర్‌పర్సన్, ట్రెజరర్ తదితర కీలక పదవుల ఎంపికపై అందరి దృష్టి కేంద్రీకృతమైంది. సోమవారం నిర్వహించిన ఈ ప్రక్రియలో నామినేషన్ల దాఖలుకు పది నిమిషాల గడువు కేటాయించారు. ఆయా పదవులకు పోటీగా ఎవరూ నామినేషన్లు దాఖలు చేయకపోవడంతో అభ్యర్థులు ఏకగ్రీవంగా ఎంపికయ్యారు.

చైర్‌పర్సన్‌గా డాక్టర్ హేమలత, వైస్ చైర్‌పర్సన్‌గా భీమనపల్లి శ్రీకాంత్, ట్రెజరర్‌గా కుంభం జ్యోతి రెడ్డి, ఎగ్జిక్యూటివ్ సభ్యుడిగా మంచుకొండ చిన్న బిక్షమయ్య ఎంపికయ్యారు.

_సేవల విస్తరణపై ఆశలు.!_

కొత్త కార్యవర్గం ఏర్పాటుతో నల్గొండ రెడ్‌క్రాస్ సొసైటీలో సేవా కార్యక్రమాలు మరింత విస్తరిస్తాయనే ఆశలు వ్యక్తమవుతున్నాయి. రక్తదాన శిబిరాల నిర్వహణ, రక్తనిధి సేవలు, పేదలకు వైద్య సహాయం, అత్యవసర పరిస్థితుల్లో సహాయక చర్యలను బలోపేతం చేయాల్సిన బాధ్యత కొత్త కమిటీపై ఉంది.ఎన్నికల ప్రక్రియ ద్వారా ఏర్పడిన నూతన కార్యవర్గం పారదర్శకతకు ప్రాధాన్యమిస్తూ, సభ్యుల సహకారంతో సంస్థ అభివృద్ధికి కృషి చేయాలని సేవాభిమానులు ఆకాంక్షిస్తున్నారు.
 తొలి మహిళా చైర్‌పర్సన్‌గా డాక్టర్ హేమలత ఎన్నిక కావడం ఈసారి ఎన్నికల్లో ప్రత్యేక ఆకర్షణగా నిలిచింది...
రెడ్‌క్రాస్ సొసైటీ ఎన్నికల ప్రక్రియను ప్రశాంతంగా, పారదర్శకంగా నిర్వహించినట్లు అదనపు కలెక్టర్ ప్రేమ్ కుమార్, జిల్లా సహకార అధికారి మమత తెలిపారు. నిర్వహణ కమిటీ సభ్యుల ఎన్నికలతో పాటు కీలక పదవుల ఎంపిక ప్రక్రియను నిబంధనల ప్రకారం పూర్తి చేసినట్లు వెల్లడించారు. నూతన కార్యవర్గం రెడ్‌క్రాస్ సొసైటీ సేవలను మరింత విస్తరించి, సంస్థ అభివృద్ధికి కృషి చేయాలని ఆకాంక్షించారు.

కారేపల్లి, అక్టోబర్ 12 (లోకల్ గైడ్ న్యూస్):

దేవి శరన్నవరాత్రి ఉత్సవాల సందర్భంగా అమ్మవారిపై భక్తిని చాటుకుంటూ గోవిందుతండాకు చెందిన బానోత్ లచ్చిరామ్–బుజ్జి దంపతులు, వారి కుమారుడు అశోక్‌ శ్రీ గాయత్రి దేవి అమ్మవారి అలంకరణ కోసం 10 చీరలను విరాళంగా అందజేశారు. అమ్మవారి పది రోజుల అలంకరణకు సరిపడా చీరలను సమర్పించి తమ భక్తిభావాన్ని చాటుకున్నారు. కారేపల్లి మండలం మాదారం గ్రామపంచాయతీ పరిధిలోని గోవిందుతండాలో కొలువైన శ్రీ గాయత్రి దేవి అమ్మవారి ఆలయంలో నవరాత్రి ఉత్సవాలు భక్తిశ్రద్ధలతో కొనసాగుతున్నాయి. ఉత్సవాల్లో భాగంగా రెండో రోజు అమ్మవారిని విశేషంగా అలంకరించి ప్రత్యేక పూజలు నిర్వహించారు. ఈ సందర్భంగా బానోత్ లచ్చిరామ్–బుజ్జి దంపతులు, వారి కుమారుడు అశోక్‌ అమ్మవారికి 10 చీరలను భక్తిపూర్వకంగా సమర్పించారు. పది రోజుల అలంకరణకు 10 చీరలను విరాళంగా అందించడం అమ్మవారిపై వారి భక్తికి నిదర్శనంగా నిలిచింది. నవరాత్రి ఉత్సవాల్లో భాగంగా అమ్మవారి అలంకరణకు సహకరించిన దాతల కుటుంబంపై గ్రామస్థులు, భక్తులు హర్షం వ్యక్తం చేశారు. ఈ సందర్భంగా బానోత్ లచ్చిరామ్–బుజ్జి దంపతులు, వారి కుమారుడు అశోక్‌ కుటుంబానికి శ్రీ గాయత్రి దేవి అమ్మవారి ఆశీస్సులు ఎల్లప్పుడూ ఉండాలని, ఆ కుటుంబం సుఖసంతోషాలతో, ఆయురారోగ్యాలతో వర్ధిల్లాలని గోవిందుతండా అమ్మ భవాని యూత్ సభ్యులు ఆకాంక్షించారు.

- 

ముఖ్యమంత్రి రేవంత్ రెడ్డి ప్రాతినిధ్యం వహిస్తున్న కొడంగల్ నియోజకవర్గంలో తీవ్ర ఉద్రిక్తత చోటుచేసుకుంది. తన భూమిని ప్రభుత్వం బలవంతంగా స్వాధీనం చేసుకుంటోందనే తీవ్ర మనోవేదనతో హకీంపేట్ గ్రామానికి చెందిన వెంకటయ్య (47) అనే రైతు పురుగుల మందు సేవించి ఆత్మహత్యాయత్నానికి పాల్పడ్డాడు.
ఈ విషయం తెలుసుకున్న మాజీ మంత్రి, ప్రస్తుత మహేశ్వరం ఎమ్మెల్యే సబితా ఇంద్రారెడ్డి వికారాబాద్ జిల్లా కేంద్రంలోని మిషన్ ఆసుపత్రికి వెళ్లి, చికిత్స పొందుతున్న రైతు వెంకటయ్యను పరామర్శించారు. డాక్టర్ అవినాష్  ఆయన ఆరోగ్య పరిస్థితిని అడిగి ఎప్పటికప్పుడు తెలుసుకున్నారు.
ఈ సందర్భంగా బాధితుడి కుటుంబ సభ్యులు మాట్లాడుతూ.. తమకు చెందిన 6 ఎకరాల 19 గుంటల భూమిని ప్రభుత్వం స్వాధీనం చేసుకుంటోందని, అయితే ఇప్పటివరకు తగిన నష్టపరిహారం అందించలేదని ఆవేదన వ్యక్తం చేశారు. చేతికి వచ్చిన పంట సాగులో ఉన్న పొలాన్ని రాత్రికి రాత్రే జేసీబీలతో చదును చేయడంతో మనస్తాపం చెంది ఈ అఘాయిత్యానికి పాల్పడినట్లు తెలిపారు.
 ప్రభుత్వాన్ని నిలదీసిన సబితా ఇంద్రారెడ్డి
ఈ ఘటనపై స్పందించిన మాజీ మంత్రి సబితా ఇంద్రారెడ్డి ప్రభుత్వంపై తీవ్ర విమర్శలు గుప్పించారు. "రైతులకు ఏవైనా సమస్యలు వస్తే వాటిని ప్రభుత్వం దృష్టికి తీసుకెళ్లి పరిష్కరించుకోవచ్చు. కానీ, ప్రభుత్వమే స్వయంగా రైతుల పొలాలను లాక్కుని అన్యాయం చేస్తే.. అన్నదాతలు ఎవరిని ఆశ్రయించాలి?" అని ప్రశ్నించారు. వెంటనే స్పందించి బాధిత రైతుకు మెరుగైన వైద్యం అందించాలని, వికారాబాద్ జిల్లా కలెక్టర్ దీపక్ తివారి ఫోన్ చేసి రైతుల భూమి సమస్య ఏమైనా ఉంటే పరిష్కరించాలని కోరారు ఆయన కుటుంబానికి ప్రభుత్వం తగిన న్యాయం చేసి ఆసరాగా నిలవాలని డిమాండ్ చేశారు. కార్యక్రమంలో పరిగి శాసనసభ మాజీ ఎమ్మెల్యే మహేశ్వర్ రెడ్డి, తాండూర్ మాజీ ఎమ్మెల్యే నరేందర్ రెడ్డి, మాజీ బీసీ కమిషన్ శుభ ప్రద్ పటేల్ సీనియర్ బిఆర్ఎస్ పార్టీ నాయకులు నాగేందర్ గౌడ్ వికారాబాద్ మునిసిపల్ మాజీ కౌన్సిలర్లు బిఆర్ఎస్ పార్టీ నాయకులు తదితరులు పాల్గొన్నారు.

చర్ల, లోకల్ గైడ్ న్యూస్ :

భద్రాచలం నియోజకవర్గ శాసనసభ్యులు తెల్లం వెంకట్రావు మంగళవారం చర్ల మండలంలో పర్యటించనున్నారు. ఈ పర్యటనలో భాగంగా ఉదయం 9:30 గంటలకు చర్ల మండల కేంద్రంలోని రైతు వేదిక వద్ద కల్యాణలక్ష్మి లబ్ధిదారులకు చెక్కుల పంపిణీ కార్యక్రమం నిర్వహించనున్నారు. ఈ కార్యక్రమానికి ప్రజాప్రతినిధులు, కాంగ్రెస్ పార్టీ సీనియర్ నాయకులు, మండల నాయకులు, కార్యకర్తలు, ముద్రణ, ఎలక్ట్రానిక్ మీడియా ప్రతినిధులు హాజరై కార్యక్రమాన్ని విజయవంతం చేయాలని నిర్వాహకులు కోరారు.

భద్రాచలం, లోకల్ గైడ్ న్యూస్ :

భద్రాచలం, కృష్ణసాగర్‌లోని ప్రభుత్వ ప్రాంతీయ పారిశ్రామిక శిక్షణ సంస్థ (ఆర్‌ఐటీఐ), అధునాతన శిక్షణ కేంద్రం (ఏటీసీ)లో 2026 ఆగస్టు సెషన్‌కు సంబంధించి మిగిలిన సీట్ల భర్తీ కోసం వాక్‌ ఇన్‌ అడ్మిషన్ల ప్రక్రియ నిర్వహించనున్నట్లు కృష్ణసాగర్ ఆర్‌ఐటీఐ ప్రిన్సిపాల్ వెంకటేశ్వరరావు తెలిపారు. ఎన్‌సీవీటీ విధానంలో ఐటీఐ, ఏటీసీ కోర్సుల్లో శిక్షణ పొందాలనుకునే అభ్యర్థులు ఈ అవకాశాన్ని సద్వినియోగం చేసుకోవాలని సూచించారు. అక్టోబర్ 13 నుంచి 15వ తేదీ వరకు ప్రతిరోజూ ఉదయం 9 గంటల నుంచి మధ్యాహ్నం ఒంటి గంట వరకు ప్రవేశాల కౌన్సెలింగ్ నిర్వహించనున్నట్లు పేర్కొన్నారు. ఆసక్తి గల అభ్యర్థులు అధికారిక వెబ్‌సైట్ [https://iti.telangana.gov.in](https://iti.telangana.gov.in) ద్వారా అక్టోబర్ 15వ తేదీ మధ్యాహ్నం ఒంటి గంటలోపు దరఖాస్తు చేసుకోవాలని సూచించారు. ప్రతి రోజు కౌన్సెలింగ్‌కు హాజరైన అభ్యర్థులకు మెరిట్‌ ఆధారంగా మాత్రమే సీట్లు కేటాయిస్తామని స్పష్టం చేశారు. కౌన్సెలింగ్‌కు హాజరయ్యే అభ్యర్థులు ఎస్‌ఎస్‌సీ లాంగ్‌ మెమో, కుల ధ్రువీకరణ పత్రం, ఒకటి నుంచి పదో తరగతి వరకు చదివినట్లు తెలిపే బోనఫైడ్‌ ధ్రువపత్రాలు, ఐటీఐ సంబంధిత సర్టిఫికెట్లు, బదిలీ ధ్రువపత్రం (టీసీ), ఇతర అవసరమైన ధ్రువపత్రాలను వెంట తీసుకురావాలని సూచించారు. ఇప్పటికే ఆన్‌లైన్‌లో దరఖాస్తు చేసుకున్నవారు మళ్లీ నమోదు చేసుకోవాల్సిన అవసరం లేదని, గతంలో దరఖాస్తు చేసుకోని అభ్యర్థులు కొత్తగా ఆన్‌లైన్‌లో నమోదు చేసుకోవాలని తెలిపారు.
ఖాళీల వివరాలు:
1) మ్యానుఫ్యాక్చరింగ్ ప్రాసెస్ కంట్రోల్ అండ్ ఆటోమేషన్ – ఏడాది వ్యవధి, 13 సీట్లు.
2) బేసిక్ డిజైనర్ వర్చువల్ వెరిఫైయర్ – రెండేళ్ల వ్యవధి, 12 సీట్లు.
3) ఇండస్ట్రియల్ రోబోటిక్స్ అండ్ డిజిటల్ మ్యానుఫ్యాక్చరింగ్ టెక్నీషియన్ – ఏడాది వ్యవధి, 16 సీట్లు.
4) ఇంజనీరింగ్ డిజైన్ టెక్నీషియన్ – ఏడాది వ్యవధి, 3 సీట్లు.
అర్హత కలిగిన అభ్యర్థులు నిర్ణీత గడువులో దరఖాస్తు చేసుకొని, అవసరమైన ధ్రువపత్రాలతో కౌన్సెలింగ్‌కు హాజరై ఈ అవకాశాన్ని వినియోగించుకోవాలని ప్రిన్సిపాల్ వెంకటేశ్వరరావు కోరారు.

( లోకల్ గైడ్ షాద్ నగర్ )

 రవీందర్ నాయక్ నగర్, ఫలక్ నామా, హైదరాబాద్ ఠాను నాయక్ బంగారం ఉత్సవాల పేరుతో జరిగిన రాష్ట్ర మహా సభలులో జయప్రదంగా ముగిశాయి. ఈ సందర్భంగా రాష్ట్ర అధ్యక్షులు కార్యదర్శి ఎం ధర్మనాయక్ శ్రీరామ్ నాయక్ మాట్లాడుతూ
కేంద్ర బిజెపి ప్రభుత్వం అనుసరిస్తున్న గిరిజన వ్యతిరేక విధానాలపై పోరాడాలి తీర్మానాన్ని ఆమోదించారు. 
-కాంగ్రెస్ పార్టీ చేవెళ్ల డిక్లరేషన్ గిరిజనులకు ఇచ్చిన హామీలను తక్షణం అమలుకు కార్యాచరణ ప్రకటించాలని లేకపోతే రాష్ట్ర వ్యాపిత ఐక్య ఉద్యమాన్ని చేపడతామని హెచ్చరిస్తూ తీర్మానాన్ని ఆమోదించారు.- పోడు భూములకు హక్కు పత్రాలు ఇవ్వాలని, మైదాన ప్రాంత గిరిజనులకు ఐదు ఐ టి డి ఏ లను ఏర్పాటు చేయాలని, మూడు గిరిజన కార్పొరేషన్ ఏర్పాటు చేసి 1500 కోట్లను కేటాయించాలని,ఠానూ నాయక్ విగ్రహాన్ని ట్యాంక్ బండ్ పై పెట్టాలని, గిరిజన బ్యాక్ లాగ్ పోస్టులను భర్తీ చేయాలని, లంబాడి భాషకు గుర్తించి ఎనిమిదవ షెడ్యూల్లో చేర్చాలని మరో 6 గిరిజన సమస్యలపై తీర్మానాలను ఏకగ్రీవంగా ఆమోదించారు. 

50 మంది తో నూతన రాష్ట్ర కమిటీ ఏకగ్రీవంగా ఎన్నిక

రాష్ట్ర అధ్యక్షునిగా ఎం ధర్మనాయక్ రాస కార్యదర్శిగా శ్రీరామ్ నాయకులు ఎన్నుకున్నారు 
రాష్ట్ర మహాసభలో సంఘీభావంగా రైతు సంఘం రాష్ట్ర ప్రధాన కార్యదర్శి తీగల సాగర్, వ్యవసాయ కార్మిక సంఘం రాష్ట్ర ప్రధాన కార్యదర్శి ఆర్ వెంకట్ రాములు, ఆవాజ్ రాష్ట్ర ప్రధాన కార్యదర్శి ఎండి అబ్బాస్, రైతు సంఘం రాష్ట్ర సహాయ కార్యదర్శి మూడు శోభన్, డివైఎఫ్ఐ రాష్ట్ర అధ్యక్షులు కోటా రమేష్ మహాసభలో స్వభారత సందేశాన్ని ఇచ్చారు.