రాజ్ భవన్ హార్డ్ డిస్క్ దొంగతనం: దర్యాప్తులో షాకింగ్ సంఘటన |

లోకల్ గైడ్  హైదరాబాద్, మే 20:
తెలంగాణ రాజ్‌భవన్‌లో చోటుచేసుకున్న హార్డ్ డిస్కుల చోరీ సంఘటన రాష్ట్రవ్యాప్తంగా కలకలం రేపుతోంది. మే 13న రాత్రి రాజ్‌భవన్ పరిధిలోని సుధర్మ భవన్ లో జరిగిన ఈ ఘటన ఆలస్యంగా వెలుగులోకి వచ్చింది. సుదీర్ఘ సీసీటీవీ పరిశీలన అనంతరం, కంప్యూటర్ హార్డ్‌వేర్ ఇంజినీర్ శ్రీనివాస్ ఈ దొంగతనానికి పాల్పడ్డట్లు గుర్తించి, పోలీసులు మే 14న అతన్ని అరెస్ట్ చేశారు.

రాజ్‌భవన్ సిబ్బంది తెలిపిన వివరాల ప్రకారం, మొదటి అంతస్తులోని కంప్యూటర్ గదిలో నిల్వ ఉన్న నాలుగు హార్డ్ డిస్కులు గల్లంతయ్యాయి. ఈ విషయాన్ని గుర్తించిన సిబ్బంది వెంటనే పంజాగుట్ట పోలీస్ స్టేషన్ లో ఫిర్యాదు చేశారు. పోలీసులు కేసు నమోదు చేసి, సీసీ టీవీ ఫుటేజీని విశ్లేషించగా, హెల్మెట్ ధరించిన వ్యక్తి కంప్యూటర్ గదిలోకి ప్రవేశిస్తున్న దృశ్యాలు బయటపడ్డాయి. ఆ వ్యక్తి హార్డ్‌వేర్ ఇంజినీర్ శ్రీనివాస్‌గా నిర్ధారణ అయింది.

పోలీసుల దర్యాప్తు ప్రకారం, ఈ హార్డ్ డిస్కుల్లో రాజ్‌భవన్ కార్యకలాపాలకు సంబంధించి కీలక ఫైళ్ళు, రిపోర్టులు ఉన్నట్టు సిబ్బంది పేర్కొన్నారు. ఇది కేవలం ఒక సాధారణ చోరీ కాదు, భద్రతా పరంగా అత్యంత సున్నితమైన అంశమని అధికారులు భావిస్తున్నారు. ప్రస్తుతం ఈ కేసును మరింత లోతుగా పరిశీలిస్తున్న పోలీసులు, శ్రీనివాస్ ఈ చోరీ వెనుక ఉద్దేశ్యం ఏమిటి? ఎవరైనా సహకరించారా? అనే కోణాల్లో దర్యాప్తు కొనసాగిస్తున్నారు.

ఇదిలా ఉంటే, రాజ్‌భవన్ వంటి అత్యున్నత స్థాయి భద్రతా ప్రాంతంలో ఈ తరహా దొంగతనాన్ని చేపట్టడం, అక్కడి సెక్యూరిటీ వ్యవస్థలపై అనేక అనుమానాలు ఏర్పడేలా చేసింది. అధికార వర్గాలు ఈ ఘటనపై అంతర్గత విచారణకూ శ్రీకారం చుట్టాయి.