క్రేజీ కాంబోలో సినిమా... 

లోక‌ల్ గైడ్ :
యువ కథానాయకుడు శ్రీవిష్ణుకు విక్టరీ వెంకటేశ్ అభిమాన హీరో. ఈ విషయాన్ని అతను అనేకసార్లు మీడియాలో చెప్పారు. ఇటీవల విడుదలైన శ్రీవిష్ణు '#సింగిల్' మూవీలో పలువురు అగ్ర కథానాయకులను అతను ఇమిటేట్ చేశాడు. అందులో నూటికి నూరు శాతం దింపేసింది వెంకటేశ్‌ నే! '#సింగిల్' మూవీ క్లయిమాక్స్ లో శ్రీవిష్ణు వెంకటేశ్ తరహాలో నటించి, థియేటర్లలో నవ్వులు పూయించాడు. ఈ సినిమా ఫస్ట్ వీకెండ్ లో దాదాపు ఇరవై కోట్ల గ్రాస్ ను వసూలు చేసి, సక్సెస్ ట్రాక్ ఎక్కేసింది. ఈ మధ్య కాలంలో శ్రీవిష్ణు సినిమాలు ఈ మాత్రం గ్రాస్ వసూలు చేసిందే లేదు. అయితే '#సింగిల్' సినిమా విజయం వెనుక శ్రీవిష్ణుకు మరో సెంటిమెంట్ కలిసొచ్చింది. ఈ సినిమా మే 9న విడుదలైంది. విశేషం ఏమంటే... ఇదే రోజున వెంకటేశ్ నటించిన 'ప్రేమించుకుందాం రా' మూవీ వచ్చింది. 1997లో విడుదలైన 'ప్రేమించుకుందాం... రా' సూపర్ డూపర్ హిట్ అయ్యింది. వెంకటేశ్ కెరీర్ లో ఓ ల్యాండ్ మార్క్ మూవీగా నిలిచింది. ఆ రకంగా తన అభిమాన హీరో వెంకటేశ్ కు కలిసొచ్చిన మే 9వ తేదీనే శ్రీవిష్ణు సైతం '#సింగిల్' తో చక్కని విజయాన్ని తన ఖాతాలో వేసుకున్నాడు.