వెంకీ అట్లూరీతో సూర్య సినిమా....

లోకల్ గైడ్:
తమిళ అగ్రనటుడు సూర్య, వివిధ పాత్రలతో వివిధ భాషల ప్రేక్షకులను ఆకట్టుకుంటూ వస్తున్నారు. ఇప్పుడు ఆయన తెలుగు, తమిళ భాషల్లో రూపొందనున్న ద్విభాషా చిత్రానికి దర్శకుడు వెంకీ అట్లూరితో కలిసి పనిచేయనున్నారు. ఇది సూర్య నటిస్తున్న 46వ చిత్రం (Suriya 46) కావడం విశేషం. సితార ఎంటర్‌టైన్‌మెంట్స్ నిర్మిస్తున్న ఈ చిత్రం హైదరాబాద్‌లో పూజా కార్యక్రమాలతో శుభారంభం అయింది.విభిన్న కథలతో ప్రేక్షకుల మనసు గెలుచుకున్న వెంకీ అట్లూరి, మరో వినూత్నమైన కథతో సూర్యతో చేతులు కలిపారు. ప్రేమలు చిత్రంతో పేరు తెచ్చుకున్న మమిత బైజు ఈ చిత్రంలో కథానాయికగా నటించనుండగా, ప్రముఖ బాలీవుడ్ నటి రవీనా టాండన్ తెలుగు సినిమాల్లోకి తిరిగి వస్తున్నారు. సీనియర్ నటి రాధిక శరత్‌కుమార్ కీలక పాత్రలో కనిపించనున్నారు.
ప్రఖ్యాత సంగీత దర్శకుడు జి.వి. ప్రకాష్ కుమార్ ఈ చిత్రానికి సంగీతం అందిస్తున్నారు. వెంకీ అట్లూరితో ఇప్పటికే "సార్", "లక్కీ భాస్కర్" చిత్రాల్లో కలిసి పనిచేసిన ప్రకాష్, ఈసారి భావోద్వేగంతో పాటు మాస్ అప్పీల్‌ను కలగలిపిన సంగీతాన్ని అందించేందుకు సిద్ధమవుతున్నారు.నిపుణుల బృందం ఈ చిత్రంపై పని చేస్తోంది — ఛాయాగ్రహణం నిమిష్ రవి, ఎడిటింగ్ నవీన్ నూలి (జాతీయ అవార్డు గ్రహీత), కళా దర్శకత్వం బంగ్లాన్‌ వహిస్తున్నారు. నిర్మాతలు సూర్యదేవర నాగవంశీ, సాయి సౌజన్య ఈ చిత్రాన్ని ప్రతిష్టాత్మకంగా నిర్మిస్తున్నారు. త్వరలో రెగ్యులర్ షూటింగ్ ప్రారంభం కానుండగా, భారీ అంచనాలకు తగిన విధంగా చిత్రాన్ని భారీ స్థాయిలో తెరకెక్కించేందుకు సన్నాహాలు జరుగుతున్నాయి.