హైదరాబాద్, మే 24, 2025:
తెలంగాణ ముఖ్యమంత్రి రేవంత్ రెడ్డి ఇటీవల కొన్ని నియోజకవర్గాల కాంగ్రెస్ ఎమ్మెల్యేలతో గోప్యంగా సమావేశాలు నిర్వహించడం పార్టీ లోపల తీవ్ర అసంతృప్తిని కలిగిస్తోంది. ఈ సమావేశాలకు జిల్లాల ఇన్‌చార్జ్ మంత్రులు, సీనియర్ నేతలు, టీపీసీసీ అధ్యక్షుడు మహేష్ కుమార్ గౌడ్‌లకు సమాచారం ఇవ్వకపోవడం, పార్టీ అంతర్గత సమన్వయంపై ప్రశ్నలు లేవనెత్తుతోంది.
ఈ సమావేశాలకు ఎమ్మెల్యేలకు కొన్ని గంటల ముందు మాత్రమే ఆహ్వానాలు పంపించబడినట్లు సమాచారం. ఇది జిల్లాల అభివృద్ధి కార్యక్రమాలు, ప్రజా పాలనపై సమీక్షల కోసం నిర్వహించబడినప్పటికీ, సీనియర్ నేతల అనుమతి లేకుండా జరగడం పార్టీ అంతర్గత విభేదాలకు దారితీస్తోంది.
గాంధీ భవన్‌కు చెందిన ఒక సీనియర్ నేత మాట్లాడుతూ, "పార్టీ బలోపేతానికి ఈ సమావేశాలు నిర్వహిస్తే, జిల్లాల ఇన్‌చార్జ్ మంత్రులు కూడా పాల్గొనాలి. వారిని పక్కన పెట్టడం సరైంది కాదు" అని వ్యాఖ్యానించారు.
ఇకపోతే, ఏఐసీసీ తెలంగాణ ఇన్‌చార్జ్ మీనాక్షి నాటరాజన్ గాంధీ భవన్‌లో నియోజకవర్గాల వారీగా సీనియర్ నేతలతో సమావేశాలు నిర్వహిస్తున్నారు. ఈ నేపథ్యంలో, ముఖ్యమంత్రి రేవంత్ రెడ్డి ప్రత్యేకంగా ఎమ్మెల్యేలతో సమావేశాలు నిర్వహించడం పార్టీ శ్రేణుల్లో సందేహాలు కలిగిస్తోంది.
పార్టీ లోపల ఈ విధమైన విభేదాలు, ముఖ్యంగా స్థానిక సంస్థల ఎన్నికల ముందు, కాంగ్రెస్ పార్టీకి ప్రతికూల ప్రభావం చూపవచ్చని విశ్లేషకులు హెచ్చరిస్తున్నారు.
Comment List