పట్టభద్రులందరూ ఎమ్మెల్సీ ఓటర్‌గా నమోదు చేసుకోవాలి: 

లోకల్ గైడ్ వికారాబాద్ జిల్లా బ్యూరో ప్రతినిధి :

పట్టభద్రుల శాసనమండలి (ఎమ్మెల్సీ) ఎన్నికలలో అర్హులైన ప్రతి ఒక్కరూ ఓటరుగా నమోదు చేసుకోవాలని వికారాబాద్ మాజీ శాసనసభ్యులు, డాక్టర్ మెతుకు ఆనంద్ పిలుపునిచ్చారు. భారతీయ వైద్యుల సంఘం ఆధ్వర్యంలో వికారాబాద్, పరిగి ప్రాంతాలకు చెందిన ఉన్నత చదువులు చదివిన వైద్యులతో నిర్వహించిన ప్రత్యేక సమావేశంలో ఆయన ముఖ్య అతిథిగా పాల్గొన్నారు.
ఈ సందర్భంగా డాక్టర్ మెతుకు ఆనంద్ మాట్లాడుతూ... పట్టభద్రుల ఎన్నికల ప్రాముఖ్యతను వివరించారు. గతంలో జరిగిన ఎన్నికల్లో ఓటరుగా నమోదై ఓటు వేసినప్పటికీ, ప్రస్తుతం మళ్లీ క్రొత్తగా ఓటరు నమోదు చేసుకోవాల్సిన అవసరం ఉందని ఆయన స్పష్టం చేశారు. సమాజంలో అత్యంత బాధ్యతాయుతమైన వృత్తిలో ఉన్న వైద్యులు ఎన్నికల ప్రక్రియలో చురుగ్గా పాల్గొని తమ ఓటు హక్కును వినియోగించుకోవాలని కోరారు.
మాజీ శాసనసభ్యులు చేసిన ఈ విజ్ఞప్తికి సమావేశంలో పాల్గొన్న వైద్యులందరూ సానుకూలంగా స్పందించారు. ఓటరు నమోదుకు కావలసిన తమ సంబంధిత పత్రాలను ఆయనకు అందజేశారు. అర్హత కలిగిన ప్రతి పట్టభద్రుడూ ఓటు హక్కు పొందేలా చూసేందుకు ఓటరు నమోదు ప్రక్రియను మరింత వేగవంతం చేయాలని డాక్టర్ మెతుకు ఆనంద్ ఈ సందర్భంగా పిలుపునిచ్చారు.