తెలంగాణలో వచ్చే ఐదు రోజులపాటు వర్షాలు పడతాయని హైదరాబాద్ వాతావరణ కేంద్రం తెలిపింది. నైరుతి బంగ్లాదేశ్‌ ప్రాంతం నుంచి పశ్చిమ బెంగాల్ గంగా తీరం వరకు అల్పపీడనం కొనసాగుతుండటంతో వర్షాలు పడే అవకాశముందని పేర్కొంది. ఈ అల్పపీడనానికి అనుబంధంగా ఉపరితల ఆవర్తనం సముద్రమట్టానికి 7.6 కిలోమీటర్ల ఎత్తు వరకు విస్తరించి, పైకి ఎగిరే కొద్దీ దక్షిణ దిశగా వంగి ఉందని వివరించింది.
జిల్లాలవారీగా వర్షాల అంచనా:
మంగళవారం: భూపాలపల్లి, ములుగు, కొత్తగూడెం, ఖమ్మం, నల్గొండ, సూర్యాపేట జిల్లాల్లో ఉరుములు, మెరుపులతో పాటు గంటకు 30–40 కిమీ వేగంతో ఈదురుగాలులు వీచే అవకాశం.
బుధవారం: భూపాలపల్లి, ములుగు, కొత్తగూడెం, ఖమ్మం, నల్గొండ, సూర్యాపేట, మహబూబాబాద్ జిల్లాల్లో వర్షాలు.
గురువారం: ఆదిలాబాద్‌, ఆసిఫాబాద్‌, మంచిర్యాల, నిర్మల్‌, నిజామాబాద్‌, జగిత్యాల, రాజన్న సిరిసిల్ల, కరీంనగర్‌, పెద్దపల్లి, భూపాలపల్లి జిల్లాల్లో వర్షాలు.
శుక్రవారం: ఇవే జిల్లాలతో పాటు ములుగు, కొత్తగూడెం, ఖమ్మం, నల్గొండ, సూర్యాపేట, మహబూబాబాద్, వరంగల్‌, హన్మకొండ, జనగాం, సిద్దిపేట, యాదాద్రి భువనగిరి, రంగారెడ్డి, హైదరాబాద్, మల్కాజ్‌గిరి, సంగారెడ్డి, వికారాబాద్, మెదక్‌, కామారెడ్డి జిల్లాల్లో వర్షాలు పడనున్నట్లు వెల్లడించింది.
శనివారం: భూపాలపల్లి, ములుగు, కొత్తగూడెం, ఖమ్మం, నల్గొండ, సూర్యాపేట, మహబూబాబాద్, వరంగల్‌, హన్మకొండ, జనగాం, సిద్దిపేట, భువనగిరి, రంగారెడ్డి, హైదరాబాద్, మేడ్చల్‌ మల్కాజ్‌గిరి, వికారాబాద్, సంగారెడ్డి, మెదక్‌, కామారెడ్డి జిల్లాల్లో వర్షాలు కొనసాగుతాయని తెలిపింది.
వర్షాల కారణంగా ఈ జిల్లాలకు ఎల్లో అలెర్ట్ జారీ చేసినట్లు వాతావరణ కేంద్రం వెల్లడించింది. ఇప్పటికే గడచిన 24 గంటల్లో ఆదిలాబాద్‌, ఆసిఫాబాద్‌, మంచిర్యాల, భూపాలపల్లి, పెద్దపల్లి, రంగారెడ్డి, మహబూబ్‌నగర్‌, నిర్మల్‌ జిల్లాల్లో మోస్తరు వర్షాలు కురిశాయని పేర్కొంది.
