పాఠ‌శాల‌ల్లో హిందీ త‌ప్ప‌నిస‌రి కాదు......

మహారాష్ట్రలో 1వ తరగతి నుంచి 5వ తరగతి వరకు హిందీ బోధనను తప్పనిసరి చేస్తూ ఇటీవల తీసుకున్న నిర్ణయం నుంచి రాష్ట్ర ప్రభుత్వం ఇప్పుడు పూనకం తగ్గించింది. ఈ మేరకు బుధవారం పాఠశాల విద్యాశాఖ ఓ ప్రకటనను విడుదల చేసి ‘తప్పనిసరి’ అనే పదాన్ని నోటిఫికేషన్‌లో నుంచి తొలగించింది.ఈ నిర్ణయంపై వ్యతిరేకత పెరగడంతో ప్రభుత్వం ఈమేరకు వెనక్కి తగ్గినట్లు సమాచారం. ఇప్పుడు హిందీకి బదులుగా విద్యార్థులు మరొక భాషను కూడా ఎంచుకునే అవకాశం కల్పించారు. అయితే ఆ భాషకు సంబంధించి ఆ తరగతిలో కనీసం 20 మంది విద్యార్థులు ఉండాలి అని షరతు పెట్టారు. అవసరమైన ఉపాధ్యాయులు అందుబాటులో లేనిపక్షంలో ఆ సబ్జెక్టుకు ఆన్లైన్ క్లాసులు నిర్వహిస్తామని ప్రభుత్వం ప్రకటించింది.జాతీయ విద్యా విధానం (NEP) ప్రకారం విద్యార్థులు మూడు భాషలు — హిందీ, ఇంగ్లిష్, స్థానిక భాష — నేర్చుకోవాలని కేంద్రం సూచిస్తుంది. కానీ కొన్ని రాష్ట్రాలు, ముఖ్యంగా తమిళనాడు, దీనికి తీవ్రంగా వ్యతిరేకతను వ్యక్తం చేస్తున్నాయి. తమిళనాడు ద్విభాషా విధానానికి కట్టుబడి ఉంటామని స్పష్టం చేస్తోంది.మహారాష్ట్రలో కూడా ఈ నిర్ణయం తీసుకున్న వెంటనే మహారాష్ట్ర నవ నిర్మాణ్ సేన (MNS) అధినేత రాజ్ ఠాక్రే, ఉద్ధవ్ ఠాక్రే లాంటి నేతలు తీవ్ర అభ్యంతరం తెలిపారు. దీనిపై రాష్ట్ర రాజకీయాల్లో చర్చలు వేడెక్కాయి. ఈ వ్యతిరేకతల మధ్య ప్రభుత్వం చివరకు నిర్ణయాన్ని సవరించి, తప్పనిసరి అనే పదాన్ని తొలగించడం కీలకంగా మారింది.