హైదరాబాద్‌లో సైబర్ మోసం: ఆన్‌లైన్ ట్రేడింగ్ యాప్ పేరిట డాక్టర్‌కు రూ. 2.30 కోట్ల టోపి! వాట్సాప్ గ్రూప్, ఫేక్ ఐపీఓ అలకేషన్లతో బురిడీ కొటించిన కేటుగాళ్లు

Published On 29 Aug 2026 11:02:31

By Ram Reddy

హైదరాబాద్‌లో సైబర్ మోసం: ఆన్‌లైన్ ట్రేడింగ్ యాప్ పేరిట డాక్టర్‌కు రూ. 2.30 కోట్ల టోపి! వాట్సాప్ గ్రూప్, ఫేక్ ఐపీఓ అలకేషన్లతో బురిడీ కొటించిన కేటుగాళ్లు

ఆగస్టు 29(లోకల్ గైడ్) హైదరాబాద్‌లోని బండ్లగూడ జగీర్‌కు చెందిన 49 ఏళ్ల సర్జన్‌ను ఆన్‌లైన్ ట్రేడింగ్ పేరుతో సైబర్ నేరగాళ్లు దారుణంగా మోసగించారు. జులై 2025లో అభిలాషా బిష్త్ అనే మహిళ బాధితుడిని "Grow Invest Tech Pvt Ltd.j9" అనే వాట్సాప్ గ్రూప్‌లో యాడ్ చేయడంతో ఈ మోసం మొదలైంది. మార్కెట్ అనలిస్ట్ లలిత్ కేష్రే నాయకత్వంలో పనిచేస్తున్న ఈ గ్రూప్, ఇండియన్ స్టాక్ మార్కెట్లో బ్లాక్ ట్రేడింగ్ మరియు ఐపీఓ (IPO) కేటాయింపుల ద్వారా అధిక లాభాలు ఇప్పిస్తామని నమ్మబలికింది. అనంతరం అతడితో ఒక వెబ్-బేస్డ్ ట్రేడింగ్ ప్లాట్‌ఫామ్‌లో క్వాలిఫైడ్ ఇన్‌స్టిట్యూషనల్ బైయర్ (QIB) ఖాతాను తెరిపించి, వివిధ బ్యాంకు ఖాతాలకు విడతలవారీగా డబ్బులు బదిలీ చేయించారు.

ఈ వాట్సాప్ గ్రూప్‌లోని సభ్యులు నకిలీ ప్రాఫిట్ స్క్రీన్‌షాట్లు, డబ్బులు విత్‌డ్రా చేసుకున్నట్లు ఉండే ఆధారాలు పోస్ట్ చేస్తూ బాధితుడికి నమ్మకం కుదిరేలా చేశారు. ఆన్‌లైన్ ప్లాట్‌ఫామ్‌లోని అతని ఖాతాలో భారీగా లాభాలు కనిపిస్తుండటంతో పాటు, ప్రారంభంలో రూ. 50,000 విత్‌డ్రా చేసుకోవడానికి అనుమతించడంతో డాక్టర్ నిజమేనని నమ్మారు. అయితే, ఆ తర్వాత పెద్ద మొత్తంలో లాభాలను విత్‌డ్రా చేసుకోవడానికి ప్రయత్నించగా, సైబర్ నేరగాళ్లు ఆ అభ్యర్థనలను తిరస్కరించి, ఖాతాను బ్లాక్ చేశారు. తాను మొత్తంగా రూ. 2,30,98,146 కోల్పోయినట్లు గుర్తించిన సదరు డాక్టర్, సైబరాబాద్ సైబర్ క్రైమ్ పోలీసులను ఆశ్రయించి ఫిర్యాదు చేశారు. కేసు నమోదు చేసుకున్న పోలీసులు విచారణ ప్రారంభించారు.