నర్సంపేట మండలంలో పైపులైన్ లీకేజీతో మిషన్ భగీరథ వృథాగా పోతున్న నీరు

నర్సంపేట లోకల్ గైడ్ నవంబర్ 1:

ప్రభుత్వం ఒకవైపు నీటి పొదుపుపై పెద్ద మాటలు చెబుతుండగా, క్షేత్రస్థాయిలో మాత్రం పరిస్థితి అందుకు భిన్నంగా ఉంది. నర్సంపేట మండలం దాసరిపల్లి ఎక్స్ రోడ్ - బంజీపేట వద్ద మిషన్ భగీరథ వాటర్ పైప్ లైన్ పగిలి గత కొన్ని రోజులుగా నీరు వృథాగా పోతోంది.

ఫౌంటెన్ లా ఎగసిపడుతున్న నీరు:
ఫోటోలో కనిపిస్తున్నట్లుగా పొలం మధ్యలో ఉన్న పైపు నుంచి నీరు సుమారు 5 అడుగుల ఎత్తులో ఫౌంటెన్ లా ఎగసిపడుతోంది. పంట కోసిన పొలం మొత్తం జలమయమవుతోంది. రోజుకు వేల లీటర్ల మంచినీరు ఇలా వృథా అవుతున్నా సంబంధిత అధికారులు పట్టించుకోవడం లేదని స్థానిక రైతులు ఆగ్రహం వ్యక్తం చేస్తున్నారు.

ప్రభుత్వ ప్రచారానికి - వాస్తవానికి పొంతన లేదు:

ప్రస్తుత పరిస్థితి తాగునీటి ఎద్దడి, భూగర్భ జలాల పరిరక్షణపై ప్రభుత్వం అవగాహన సదస్సులు నిర్వహిస్తోంది. కానీ ఇక్కడ మాత్రం శుద్ధి చేసిన మంచినీరు ఇలా రోడ్డున పడుతోంది. ఈ లీకేజీ వల్ల ఆ ప్రాంతంలో తక్కువ ప్రెజర్ తో నీరు రావడం, మట్టి కొట్టుకుపోయి పైపుకు మరింత నష్టం వాటిల్లే ప్రమాదం ఉందని నిపుణులు చెబుతున్నారు.

మిషన్ భగీరథ అధికారులు స్పందించి, లీకేజీని అరికట్టి నీటి వృథాను నివారించాలని రైతులు, ప్రజలు డిమాండ్ చేస్తున్నారు.