ప్రభుత్వ సేవలు ప్రజలకు మరింత సులభతరం..

మంచిర్యాల జిల్లా ప్రతినిధి (లోకల్ గైడ్)

ప్రభుత్వ సేవలను ప్రజలకు మరింత చేరువ చేయడంతో పాటు,ప్రజా సమస్యలను సత్వరమే పరిష్కరించే లక్ష్యంతో రాష్ట్ర ఆబ్కారీ మద్యనిషేధ,పర్యాటక,సాంస్కృతిక,పురావస్తు శాఖ మంత్రి,జిల్లా ఇంఛార్జి మంత్రి జూపల్లి కృష్ణారావు ఆదేశాల మేరకు జిల్లా సమీకృత కలెక్టరేట్ భవన సముదాయంలో ప్రత్యేక వాట్సాప్ నంబర్ ఏర్పాటు చేయడం జరిగిందని జిల్లా కలెక్టర్ కుమార్ దీపక్ ఒక ప్రకటనలో తెలిపారు.ప్రజలు తమ ఫిర్యాదులు,వినతులను నేరుగా వాట్సాప్‌ ద్వారా అధికారుల దృష్టికి తీసుక వెళ్లడం జరుగుతుందని తెలిపారు.ఇకపై ప్రభుత్వ సేవలకు సంబంధించిన ఫిర్యాదులు,సమస్యల పరిష్కారం కోసం ప్రజలు కార్యాలయాల చుట్టు తిరగవలసిన అవసరం లేకుండా ఇంటి నుండే వాట్సాప్‌ ద్వారా తమ సమస్యలను సంబంధిత అధికారులకు తెలియజేయవచ్చని తెలిపారు.హైదరాబాద్‌లోని జిల్లా ఇంఛార్జి మంత్రి పేషీలోను ఈ సదుపాయాన్ని అందుబాటులోకి తీసుకురావడం జరిగిందని తెలిపారు.ప్రజల నుండి అందే ప్రతి ఫిర్యాదును సంబంధిత అధికారులు క్షుణ్ణంగా పరిశీలించి,సమస్యల పరిష్కారానికి సత్వర చర్యలు తీసుకోవాలని,ఫిర్యాదులను సంబంధిత శాఖలకు పంపించడంతో పాటు,వాటి పరిష్కారంలో జాప్యం జరగకుండా నిరంతరం పర్యవేక్షించాలని తెలిపారు.ఇంచార్జి జిల్లా మంత్రి జూపల్లి కృష్ణారావు పేషీ సెల్ నంబర్ 8500689596,మంచిర్యాల కలెక్టరేట్‌ సెల్ నంబర్ 9492123642 లకు కాల్ చేయవద్దని,కేవలం వాట్సాప్‌ నంబర్ కు తమ ఫిర్యాదులను మెసేజ్‌ రూపంలో పంపవచ్చని,ఫిర్యాదులో సమస్యకు సంబంధించిన పూర్తి వివరాలు,సమస్య ఉన్న ప్రదేశం,చిరునామా,అవసరమైన ఆధారాలు,సంబంధిత ఫొటోలను జత చేయాలని కోరారు.తద్వారా సమస్యను గుర్తించి,సంబంధిత శాఖకు ఫిర్యాదును పంపించి పరిష్కారానికి చర్యలు తీసుకోవడం సులభతరం అవుతుందని తెలిపారు.ప్రజలకు ప్రభుత్వ సేవలను మరింత పారదర్శకంగా,సులభంగా అందించడంతో పాటు,వారి సమస్యలకు త్వరితగతిన పరిష్కారం చూపడమే ఈ ప్రత్యేక గ్రీవెన్స్‌ సెల్‌ల ప్రధాన ఉద్దేశమని తెలిపారు.ప్రజలు ఈ అవకాశాన్ని సద్వినియోగం చేసుకోవాలని తెలిపారు.