తాండూర్ కాంగ్రెస్‌లో అంతర్గత కలహాలు.

లోకల్ గైడ్/ తాండూర్ 
తాండూర్ పట్టణ కాంగ్రెస్‌లో అంతర్గత విభేదాలు, నాయకుల మధ్య సమన్వయ లోపం మరోసారి చర్చనీయాంశంగా మారింది. పార్టీ కార్యక్రమాలు సజావుగా సాగాల్సిన సమయంలోనే నాయకుల మధ్య వివాదాలు చోటుచేసుకోవడం పార్టీ శ్రేణుల్లో ఆందోళనకు కారణమవుతోంది. తాజాగా రాజీవ్ గాంధీ జయంతి కార్యక్రమం అనంతరం రాజీవ్ కాలనీలో ఒకే పార్టీకి చెందిన ఇద్దరు సీనియర్ నాయకుల మధ్య తీవ్ర వాగ్వాదం చోటుచేసుకున్నట్లు సమాచారం.

సమస్యలకు పరిష్కారం చూపడంలో నాయకత్వ వైఫల్యమా?
పార్టీలో అంతర్గతంగా తలెత్తే చిన్నచిన్న సమస్యలను సకాలంలో పరిష్కరించి, అవి పెద్ద వివాదాలుగా మారకుండా చూడాల్సిన బాధ్యత పట్టణ అధ్యక్షుడిపై ఉంటుందని పార్టీ శ్రేణులు అభిప్రాయపడుతున్నాయి. అయితే సమస్యలు పరిష్కారం కాకుండా తరచూ నాయకుల మధ్య విభేదాలు బహిర్గతం కావడం టౌన్ అధ్యక్షుడి నాయకత్వంపై ప్రశ్నలు తలెత్తేలా చేస్తోందని పలువురు పేర్కొంటున్నారు.
పార్టీని బలోపేతం చేయాల్సిన సమయంలో నాయకుల మధ్య విభేదాలు, పరస్పర ఆరోపణలు చోటుచేసుకోవడం కార్యకర్తల్లో అయోమయానికి దారితీస్తోందనే అభిప్రాయాలు వ్యక్తమవుతున్నాయి. తక్షణమే అధిష్ఠానం జోక్యం చేసుకొని సమస్యను పరిష్కరించాలని పార్టీ శ్రేణులు కోరుతున్నాయి.