ఖమ్మం జిల్లా, కారేపల్లి : ఆగస్టు 17(లోకల్ గైడ్ ) : కారేపల్లి మండలంలోని వెంకటయ్య తండా గ్రామానికి చెందిన కాంగ్రెస్ పార్టీ సీనియర్ నాయకులు, మాజీ ఎంపీపీ బానోత్ దేవుల నాయక్ కుమారుడు బానోత్ నవీన్ ఇటీవల విధి నిర్వహణలో విద్యుత్ షాక్కు గురై మృతి చెందిన విషయం తెలిసిందే. ఈ నేపథ్యంలో వైరా నియోజకవర్గ బీఆర్ఎస్ పార్టీ నాయకులు లకావత్ గిరిబాబు సోమవారం నవీన్ కుటుంబాన్ని పరామర్శించి తమ ప్రగాఢ సానుభూతిని వ్యక్తం చేశారు. వెంకటయ్య తండాలోని బానోత్ దేవుల నాయక్ నివాసానికి చేరుకున్న లకావత్ గిరిబాబు, నవీన్ చిత్రపటానికి పూలమాల వేసి ఘనంగా నివాళులర్పించారు. అనంతరం మాజీ ఎంపీపీ దేవుల నాయక్తో పాటు కుటుంబ సభ్యులను కలిసి ఓదార్చారు. నవీన్ అకాల మరణం కుటుంబానికి తీరని లోటని పేర్కొంటూ, ఈ క్లిష్ట సమయంలో కుటుంబ సభ్యులు ధైర్యంగా ఉండాలని సూచించారు. విధి నిర్వహణలో ప్రాణాలు కోల్పోయిన నవీన్ సేవలను గుర్తు చేసుకుంటూ ఆయన ఆత్మకు శాంతి చేకూరాలని ప్రార్థించారు. కుటుంబ సభ్యులకు ఎల్లప్పుడూ అండగా ఉంటామని, వారి బాధలో తాము భాగస్వాములమని గిరిబాబు తెలిపారు. నవీన్ మృతి పట్ల వైరా నియోజకవర్గ ప్రజలు తీవ్ర దిగ్భ్రాంతికి గురయ్యారని, ఈ ఘటన అందరినీ కలచివేసిందని అన్నారు. ఈ సందర్భంగా కుటుంబ సభ్యులకు ధైర్యం చెప్పిన నాయకులు, నవీన్ చేసిన సేవలు చిరస్మరణీయమని కొనియాడారు. బాధిత కుటుంబానికి సమాజంలోని ప్రతి ఒక్కరూ అండగా నిలవాలని పిలుపునిచ్చారు.
ఈ పరామర్శ కార్యక్రమంలో ముత్యాల సత్యనారాయణ, రావూరి శ్రీనివాసరావు, ఉన్నాం వీరేందర్, బత్తుల శ్రీనివాసరావు, అడ్డగోడ ఐలయ్య, ధరావత్ మంగీలాల్, బానోతు రూపుల, అజ్మీరా వీరన్న, భూక్యా రాంకిషోర్తో పాటు పలువురు బీఆర్ఎస్ పార్టీ నాయకులు, కార్యకర్తలు పాల్గొన్నారు.
About The Author
.jpeg)
