కారేపల్లి (సింగరేణి), అక్టోబర్ 1 (లోకల్ గైడ్ న్యూస్): గ్రాడ్యుయేట్ ఎమ్మెల్సీ ఎన్నికల్లో ఓటు హక్కు వినియోగించుకునేందుకు అర్హత కలిగిన ప్రతి పట్టభద్రుడు గ్రాడ్యుయేట్ ఓటరుగా నమోదు చేసుకోవాలని కాంగ్రెస్ పార్టీ నాయకులు గుడిపూడి తిరుమల రావు కోరారు. అర్హులైన పట్టభద్రులు ఫారం–18 ద్వారా తమ పేర్లను సంబంధిత గ్రాడ్యుయేట్ నియోజకవర్గ ఓటరు జాబితాలో నమోదు చేసుకోవాలని సూచించారు.
ఎన్నికల సంఘం ఓటర్ సర్వీస్ పోర్టల్ ద్వారా ఫారం–18ను సమర్పించవచ్చని తెలిపారు. దరఖాస్తు సమయంలో వ్యక్తిగత వివరాలు, చిరునామా, విద్యార్హతలకు సంబంధించిన వివరాలను తప్పులు లేకుండా నమోదు చేయడంతో పాటు అవసరమైన ధ్రువపత్రాలను స్పష్టంగా సమర్పించాలని సూచించారు. దరఖాస్తును సమర్పించే ముందు నమోదు చేసిన వివరాలను మరోసారి పరిశీలించుకోవాలని పేర్కొన్నారు.
దరఖాస్తు అనంతరం లభించే అంగీకార సంఖ్యను భద్రపరుచుకుని, దరఖాస్తు స్థితిని ఎప్పటికప్పుడు పరిశీలించుకోవాలని తెలిపారు. అర్హత ఉన్నప్పటికీ గ్రాడ్యుయేట్ ఓటరుగా నమోదు చేసుకోని వారు నిర్లక్ష్యం చేయకుండా నమోదు ప్రక్రియను పూర్తి చేసుకోవాలని గుడిపూడి తిరుమల రావు కోరారు.
ప్రజాస్వామ్య ప్రక్రియలో ఓటు హక్కు కీలకమని, అర్హత కలిగిన ప్రతి పట్టభద్రుడు తమ పేరును ఓటరు జాబితాలో నమోదు చేసుకుని గ్రాడ్యుయేట్ ఎమ్మెల్సీ ఎన్నికల్లో తమ ఓటు హక్కును వినియోగించుకోవాలని ఆయన పిలుపునిచ్చారు.
About The Author
