ప్రజావాణిలో ప్రజా సమస్యలకు పరిష్కార బాట

ఖమ్మం జిల్లా, కారేపల్లి : ఆగస్టు 17 (లోకల్ గైడ్) :

ప్రజా సమస్యలను నేరుగా తెలుసుకొని వాటికి పరిష్కారం చూపించేందుకే ప్రభుత్వం ప్రతిష్టాత్మకంగా ప్రజావాణి కార్యక్రమాన్ని ఏర్పాటు చేసిందని సింగరేణి ఎంపీడీవో బి. పద్మ అన్నారు. మండల పరిషత్ కార్యాలయంలో సోమవారం తొలిసారిగా నిర్వహించిన ప్రజావాణి కార్యక్రమం విజయవంతమైందని ఆమె తెలిపారు. ప్రజావాణి కార్యక్రమంలో మండలంలోని వివిధ గ్రామాలకు చెందిన ప్రజలు తమ సమస్యలను అధికారుల దృష్టికి తీసుకువచ్చారు. మొత్తం 9 రకాల సమస్యలకు సంబంధించిన దరఖాస్తులు అధికారులకు అందినట్లు ఎంపీడీవో తెలిపారు. ప్రజలు తమ సమస్యలను నేరుగా అధికారులకు వివరించి, పరిష్కారం కోసం దరఖాస్తులు సమర్పించారు.  సింగరేణి గ్రామానికి చెందిన ప్రజలు సుబ్బయ్య కుంట శిఖం భూమిని సర్వే చేయించాలని కోరుతూ దరఖాస్తు అందజేశారు. అలాగే గాదెపాడు గ్రామంలో నెలకొన్న డ్రైనేజీ సమస్యను పరిష్కరించాలని, గ్రామానికి బస్సు సౌకర్యం కల్పించాలని కోరుతూ ప్రజలు అధికారులకు వినతిపత్రాలు సమర్పించారు. ప్రజావాణిలో అందిన ప్రతి దరఖాస్తును సంబంధిత అధికారులు పరిశీలించి, సమస్యల పరిష్కారానికి అవసరమైన చర్యలు తీసుకుంటారని ఎంపీడీవో బి. పద్మ స్పష్టం చేశారు. ప్రజలు తమ సమస్యల పరిష్కారం కోసం కార్యాలయాల చుట్టూ తిరగకుండా ప్రజావాణి కార్యక్రమాన్ని వినియోగించుకోవాలని సూచించారు.  ప్రతి సోమవారం మండల పరిషత్ కార్యాలయంలో ప్రజావాణి కార్యక్రమం నిర్వహిస్తామని, ఈ కార్యక్రమానికి మండలంలోని 17 శాఖలకు చెందిన అధికారులు హాజరవుతారని ఎంపీడీవో తెలిపారు. ప్రజల నుంచి వచ్చే సమస్యలను సంబంధిత శాఖల అధికారుల సమక్షంలో స్వీకరించి, వాటి పరిష్కారానికి కృషి చేస్తామని చెప్పారు.  ప్రభుత్వం ప్రతిష్టాత్మకంగా చేపట్టిన ప్రజావాణి కార్యక్రమం ద్వారా ప్రజలకు అధికారులు మరింత చేరువయ్యే అవకాశం ఉందని ఆమె పేర్కొన్నారు. గ్రామాల్లోని ప్రజలు తమ సమస్యలను అధికారుల దృష్టికి తీసుకువచ్చి, ప్రజావాణి కార్యక్రమాన్ని సద్వినియోగం చేసుకోవాలని ఎంపీడీవో బి. పద్మ కోరారు.