ఆమనగల్లు లో ఘనంగా సామూహిక శ్రీ వరలక్ష్మీ వ్రతాలు

లోకల్ గైడ్
ఆమనగల్లు, ఆగస్టు 21:

శ్రావణమాసంలోని పవిత్రమైన శ్రావణ శుక్రవారం సందర్భంగా శ్రీ సత్యసాయి బాబా దివ్య అనుగ్రహ ఆశీస్సులతో రంగారెడ్డి జిల్లా ఆమనగల్లు శ్రీ సత్యసాయి సేవా సమితి ఆధ్వర్యంలో స్థానిక సత్యసాయి మందిరంలో సామూహిక శ్రీ వరలక్ష్మీ వ్రతాలను భక్తిశ్రద్ధలతో ఘనంగా నిర్వహించారు. సుమారు 50కిపైగా వ్రతాలు నిర్వహించగా, స్థానిక మహిళలు, సత్యసాయి భక్తులు, పట్టణ ప్రజలు పెద్ద సంఖ్యలో పాల్గొన్నారు.
హిందూ సంప్రదాయంలో శ్రావణమాసాని కి ఎంతో విశిష్టమైన ఆధ్యాత్మిక ప్రాధాన్యత ఉంది. ముఖ్యంగా శ్రావణ శుక్రవారం రోజున శ్రీ వరలక్ష్మీ దేవి ని భక్తిశ్రద్ధలతో పూజించడం ద్వారా కుటుంబంలో సుఖశాంతులు, ఐశ్వర్యం, ఆరోగ్యం, సౌభాగ్యం కలుగుతాయని భక్తుల విశ్వాసం. కుటుంబ శ్రేయస్సు, సంతాన సౌభాగ్యం, ఇంటిల్లిపాదీ సుఖసంతోషాల కోసం మహిళలు వరలక్ష్మీ వ్రతాన్ని భక్తిశ్రద్ధలతో ఆచరిస్తారు.
ఈ సందర్భంగా సత్యసాయి మందిరాన్ని పుష్పాలు, తోరణాలతో సుందరంగా అలంకరించి ప్రత్యేక పూజా కార్యక్రమాలను నిర్వహించారు. వేద పండితుల ఆధ్వర్యంలో వేద మంత్రోచ్ఛారణలు, మంగళ వాయిద్యాల మధ్య సామూహిక వరలక్ష్మీ వ్రతాలు నిర్వహించారు. మహిళలు పెద్ద సంఖ్యలో పాల్గొని అమ్మవారికి ప్రత్యేక పూజలు, నైవేద్యాలు సమర్పించి ఆశీస్సులు పొందారు.
శ్రీ సత్యసాయి బాబా బోధించిన “ప్రేమించు – సేవచేయు” అనే సందేశానికి అనుగుణంగా ఆధ్యాత్మిక కార్యక్రమాలతో పాటు సేవా కార్యక్రమాలకు కూడా సత్యసాయి సేవా సమితి ప్రాధాన్యత ఇస్తోందని నిర్వాహకులు తెలిపారు. భక్తిలో సేవాభావాన్ని, సేవలో మానవత్వాన్ని పెంపొందించడమే సమితి లక్ష్యమని పేర్కొన్నారు.
వ్రత కార్యక్రమం అనంతరం నారాయణ సేవ నిర్వహించి భక్తులకు, పట్టణ ప్రజలకు అన్నప్రసాదాన్ని వితరణ చేశారు. కార్యక్రమానికి హాజరైన భక్తులకు ఎలాంటి ఇబ్బందులు కలగకుండా నిర్వాహకులు ప్రత్యేక ఏర్పాట్లు చేశారు.
ఈ కార్యక్రమంలో సత్యసాయి సేవా సమితి కన్వీనర్ దొంతు శ్రీనివాస్, డాక్టర్ దొంతు పుల్లయ్య, గోల్డ్ రాము, గోల్డ్ బ్రహ్మం, నాగిళ్ల లింగం, ఎన్.ఆర్. ప్రభాకర్, రామాచారి, అప్పం తిరుపతయ్య, ఆర్టీఏ శేఖర్, శంకర్, అల్లాజి, పోలిశెట్టి శ్రీనివాస్, ఉప్పు శ్రీశైలం, పోలిశెట్టి నందు, గందె శేఖర్, ఆలేటి నారాయణ, కృష్ణారెడ్డి, గాజుల శ్రీనివాస్, గంజి వెంకటేష్ తదితరులు పాల్గొన్నారు.
మహిళా భక్తుల్లో దొంతు విజయలక్ష్మి, దొంతు సంధ్య, అప్పం అలివేలమ్మ, దొంతు కృష్ణవేణి, శైలజ, అశ్వినీ, గందె కృష్ణవేణి, కృష్ణవేణి, పోలిశెట్టి సింధు, పోలిశెట్టి ధనలక్ష్మి తదితరులతో పాటు సత్యసాయి భక్తులు, స్థానిక మహిళలు, పట్టణ వాసులు పెద్ద సంఖ్యలో పాల్గొన్నారు.
ఈ సందర్భంగా సత్యసాయి సేవా సమితి ప్రతినిధులు మాట్లాడుతూ, ఆధ్యాత్మికతతో పాటు సామాజిక సేవా కార్యక్రమాలను కొనసాగిస్తూ సమాజంలో ప్రేమ, ఐక్యత, మానవత్వం, సేవాభావాన్ని పెంపొందించేందుకు కృషి చేస్తున్నామని తెలిపారు. భక్తుల సహకారంతో భవిష్యత్తులో మరిన్ని ఆధ్యాత్మిక, సామాజిక సేవా కార్యక్రమాలను నిర్వహిస్తామని పేర్కొన్నారు.