లోకల్ గైడ్/బంట్వారం:
మిలాద్-ఉన్-నబీ పర్వదినాన్ని పురస్కరించుకుని బంట్వారం మండలం తోర్మమిడి గ్రామంలో ముస్లిం సోదరుల ఆధ్వర్యంలో అన్నదాన కార్యక్రమాన్ని బుధవారం ఘనంగా నిర్వహించారు. ఈ సందర్భంగా గ్రామంలోని సోదర సోదరీమణులకు అన్నదానం చేసి మత సామరస్యం, సోదరభావాన్ని చాటుకున్నారు. ప్రవక్త మహమ్మద్ బోధించిన ప్రేమ, శాంతి, సోదరభావాన్ని ప్రతి ఒక్కరూ ఆచరించాలని నిర్వాహకులు పిలుపునిచ్చారు. మతాలకు అతీతంగా పరస్పరం గౌరవించుకుంటూ ఐక్యతతో ముందుకు సాగాలని, పేదలు, ఆపదలో ఉన్న వారికి అండగా నిలవడం సామాజిక బాధ్యతగా భావించాలని సూచించారు. అన్నదాన కార్యక్రమానికి గ్రామస్తులు పెద్ద సంఖ్యలో హాజరై భోజనం స్వీకరించారు. మిలాద్-ఉన్-నబీ సందర్భంగా నిర్వహించిన అన్నదాన కార్యక్రమం గ్రామంలో మత సామరస్యానికి ప్రతీకగా నిలిచిందని పలువురు పేర్కొన్నారు. ఈ కార్యక్రమంలో గ్రామస్తులు, ముస్లిం సోదరులు తదితరులు పాల్గొన్నారు.
