రగ్బీలో కారేపల్లి మైనార్టీ గురుకుల విద్యార్థుల సత్తా

కారేపల్లి, అక్టోబర్‌ 3 (లోకల్‌ గైడ్‌ న్యూస్‌):

ఖమ్మం పట్టణంలోని సర్దార్‌ పటేల్‌ స్టేడియంలో సెప్టెంబర్‌ 29న నిర్వహించిన అస్మిత సిటీ రగ్బీ లీగ్‌ పోటీల్లో కారేపల్లికి చెందిన వైరా మైనార్టీ గురుకుల పాఠశాల విద్యార్థులు సత్తా చాటారు. వివిధ విభాగాల్లో జరిగిన రగ్బీ పోటీల్లో విద్యార్థులు ఉత్సాహంగా పాల్గొని అద్భుతమైన క్రీడా నైపుణ్యాన్ని ప్రదర్శించారు. అండర్‌-15 విభాగంలో హోరాహోరీగా జరిగిన పోటీల్లో ప్రతిభ కనబరిచిన విద్యార్థులు రన్నరప్‌గా నిలిచి ద్వితీయ స్థానాన్ని సాధించారు. అదేవిధంగా అండర్‌-18 విభాగంలోనూ పోటీతత్వాన్ని ప్రదర్శించి మూడో స్థానాన్ని కైవసం చేసుకున్నారు. రెండు విభాగాల్లోనూ విద్యార్థులు పతకాలు సాధించడం పాఠశాలకు గర్వకారణంగా నిలిచింది. విద్యార్థులు సాధించిన విజయాలపై పాఠశాల ప్రిన్సిపాల్‌ డి. సావిత్రి హర్షం వ్యక్తం చేశారు. శనివారం పాఠశాలలో నిర్వహించిన అభినందన కార్యక్రమంలో విజేత విద్యార్థులను ప్రిన్సిపాల్‌తో పాటు ఉపాధ్యాయులు అభినందించారు. పోటీల్లో ప్రతిభ కనబరిచి పాఠశాలకు గుర్తింపు తీసుకొచ్చిన విద్యార్థులను ప్రత్యేకంగా అభినందిస్తూ, భవిష్యత్‌ పోటీల్లో మరిన్ని విజయాలు సాధించాలని ఆకాంక్షించారు. విద్యార్థులకు క్రమం తప్పకుండా రగ్బీ శిక్షణ అందిస్తూ, వారి ప్రతిభను మెరుగుపరిచేందుకు కృషి చేసిన పీఈటీ, పీడీలను ఈ సందర్భంగా ప్రత్యేకంగా అభినందించారు. క్రీడల్లో పాల్గొనడం ద్వారా విద్యార్థుల్లో క్రమశిక్షణ, ఆత్మవిశ్వాసం, పట్టుదల, జట్టు స్ఫూర్తి పెంపొందుతాయని పేర్కొన్నారు. చదువుతో పాటు క్రీడలకు సమాన ప్రాధాన్యత ఇవ్వడం ద్వారా విద్యార్థులలో దాగి ఉన్న ప్రతిభను వెలికితీసి, వారి సమగ్ర అభివృద్ధికి దోహదపడవచ్చని ప్రిన్సిపాల్‌ తెలిపారు.