సింగరేణి అభివృద్ధికి మరో అడుగు.. సర్పంచ్ టోనీకి ప్రత్యేక శిక్షణకు అవకాశం!

కారేపల్లి (సింగరేణి ), సెప్టెంబర్ 5, లోకల్ గైడ్ న్యూస్ : సింగరేణి గ్రామ ప్రజల ఆశీర్వాదంతో సర్పంచ్ మేదరి వీరప్రతాప్ (టోనీ)కు మరో అరుదైన అవకాశం లభించింది. సర్పంచ్‌లలో విలువలు, నాయకత్వ సామర్థ్యం, పరిపాలనా నైపుణ్యం, మానసిక శ్రేయస్సును పెంపొందించేందుకు హైదరాబాద్ గచ్చిబౌలిలోని శాంతి సరోవర్‌లో నిర్వహిస్తున్న ప్రత్యేక శిక్షణ కార్యక్రమానికి ఖమ్మం జిల్లా నుంచి ఎంపికైన పది మంది సర్పంచ్‌లలో మేదరి వీరప్రతాప్‌కు అవకాశం దక్కింది. ఈ సందర్భంగా సర్పంచ్ మేదరి వీరప్రతాప్ (టోనీ) మాట్లాడుతూ.. సింగరేణి గ్రామ ప్రజలు తనపై ఉంచిన నమ్మకం, ప్రేమ, ఆశీర్వాదాలే తనకు బలమని అన్నారు. ప్రత్యేక శిక్షణలో నేర్చుకునే మంచి అంశాలను సింగరేణి గ్రామ అభివృద్ధికి ఉపయోగించి ప్రజలకు మరింత మెరుగైన సేవలు అందించేందుకు కృషి చేస్తానని తెలిపారు. “పదవి బాధ్యత మాత్రమే కాదు.. ప్రజలకు సేవ చేసే గొప్ప అవకాశం” అనే లక్ష్యంతో ముందుకు సాగుతానని పేర్కొన్నారు. సింగరేణి గ్రామాన్ని మరింత అభివృద్ధి పథంలో ముందుకు తీసుకెళ్లడమే తన లక్ష్యమని, ప్రజాసేవే తన ధ్యేయమని సర్పంచ్ టోనీ స్పష్టం చేశారు. ఖమ్మం జిల్లా నుంచి ఎంపికైన పది మంది సర్పంచ్‌లలో సింగరేణి గ్రామపంచాయతీ సర్పంచ్‌కు అవకాశం లభించడం పట్ల గ్రామ ప్రజలు హర్షం వ్యక్తం చేస్తున్నారు.