సింగరేణి మండల కేంద్రంలో ముత్యాలమ్మ బోనాల వేడుకలు భక్తి పారవశ్యంతో, సంప్రదాయబద్ధంగా, అంగరంగ వైభవంగా జరిగాయి. స్థానిక సర్పంచ్ మేదరి వీరప్రతాప్ (టోనీ) ఆధ్వర్యంలో నిర్వహించిన ఈ వేడుకలకు గ్రామ ప్రజలు పెద్ద ఎత్తున తరలివచ్చారు. డప్పు వాయిద్యాల మోత, డీజే సౌండ్స్తో గ్రామమంతా పండుగ వాతావరణం నెలకొంది. ముత్యాలమ్మ తల్లిని కొలిచే సంప్రదాయంలో భాగంగా గ్రామ ఆడపడుచులు భక్తిశ్రద్ధలతో బోనాలు ఎత్తుకుని ఆలయం వైపు ఊరేగింపుగా తరలివచ్చారు. మహిళలు, యువతులు సంప్రదాయ వస్త్రధారణలో పాల్గొనగా, చిన్నారులు నూతన వస్త్రాలతో వేడుకలకు ప్రత్యేక ఆకర్షణగా నిలిచారు. అమ్మవారికి బోనాలు సమర్పించి, మొక్కులు చెల్లించుకుంటూ కుటుంబాల సుఖశాంతులు, ఆయురారోగ్యాలు, పాడిపంటల అభివృద్ధి కోసం ప్రార్థించారు.
బోనం ఎత్తిన ఎమ్మెల్యే రాందాస్ నాయక్
వేడుకలకు ముఖ్య అతిథిగా వైరా నియోజకవర్గ ఎమ్మెల్యే మాలోత్ రాందాస్ నాయక్ హాజరై భక్తులతో మమేకమయ్యారు. స్వయంగా బోనం ఎత్తుకుని ముత్యాలమ్మ తల్లికి బోనం సమర్పించి ప్రత్యేక పూజలు నిర్వహించారు. ఈ సందర్భంగా ఎమ్మెల్యే పాల్గొనడంతో భక్తుల్లో మరింత ఉత్సాహం నెలకొంది. ముత్యాలమ్మ బోనాలు కేవలం పూజా కార్యక్రమం మాత్రమే కాకుండా గ్రామ ప్రజల ఐక్యతకు, తరతరాలుగా వస్తున్న సాంస్కృతిక సంప్రదాయాలకు ప్రతీకగా నిలిచాయి. పెద్దలు, యువత, మహిళలు, చిన్నారులు ఒకే వేదికపై కలిసి వేడుకల్లో పాల్గొనడం ప్రత్యేకంగా ఆకట్టుకుంది. డప్పు కళాకారుల వాయిద్యాలు, యువత నృత్యాలు, మహిళల బోనాల ఊరేగింపుతో వేడుకలు ఉత్సాహభరితంగా సాగాయి. అమ్మవారి నామస్మరణతో పరిసర ప్రాంతాలు మార్మోగాయి. ఈ కార్యక్రమంలో సింగరేణి మండల సర్పంచులు, ప్రజాప్రతినిధులు, గ్రామ పెద్దలు, వివిధ రాజకీయ పార్టీల నాయకులు, కార్యకర్తలు, మహిళలు, యువత, భక్తులు అధిక సంఖ్యలో పాల్గొని ముత్యాలమ్మ బోనాల వేడుకలను విజయవంతం చేశారు. గ్రామ ప్రజల సహకారంతో వేడుకలు ప్రశాంతంగా, వైభవంగా ముగిశాయి.
About The Author
