కారేపల్లి, సెప్టెంబర్ 17 (లోకల్ గైడ్ న్యూస్) : సెప్టెంబర్ 17 తెలంగాణ చరిత్రలో చెరగని ముద్ర వేసిన కీలక ఘట్టం. నిజాం పాలనలో కొనసాగిన ఫ్యూడల్ పెత్తనం, వెట్టిచాకిరీ, దొరల దోపిడీకి వ్యతిరేకంగా తెలంగాణ పల్లెల్లో ప్రజలు సాగించిన పోరాటం ఈ చరిత్రలో ప్రధాన భాగంగా నిలిచింది.1946లో ఉధృతమైన తెలంగాణ రైతాంగ సాయుధ పోరాటంలో రైతులు, కూలీలు, మహిళలు, పేద ప్రజలు పెద్ద సంఖ్యలో భాగస్వాములయ్యారు. భూమి, భుక్తి, హక్కుల కోసం ప్రజలు దొరల ఆధిపత్యాన్ని సవాల్ చేశారు. గ్రామాల్లో రైతు సంఘాలు, ప్రజా కమిటీలు, పోరాట దళాలు ఏర్పడి అణచివేతకు వ్యతిరేకంగా ప్రతిఘటనను కొనసాగించాయి.1947 ఆగస్టు 15న భారత్ స్వాతంత్ర్యం పొందినా హైదరాబాద్ సంస్థానం నిజాం పాలనలోనే కొనసాగింది. ఈ నేపథ్యంలో 1948 సెప్టెంబర్లో భారత ప్రభుత్వం చేపట్టిన ‘ఆపరేషన్ పోలో’ అనంతరం సెప్టెంబర్ 17న హైదరాబాద్ సంస్థానం భారత యూనియన్లో విలీనం అయింది.అయితే సెప్టెంబర్ 17ను కేవలం ఒక సైనిక చర్యకు సంబంధించిన తేదీగా మాత్రమే కాకుండా, దానికి ముందు సాగిన ప్రజా ఉద్యమాలు, రైతాంగ పోరాటాలు, త్యాగాలు, హైదరాబాద్ విలీనానికి దారితీసిన రాజకీయ పరిణామాల సమగ్ర నేపథ్యంలో చూడాల్సిన అవసరం ఉంది. ఈ చరిత్రకు వివిధ రాజకీయ వర్గాలు భిన్నమైన పేర్లు, వివరణలు ఇస్తున్నప్పటికీ, 1948 సెప్టెంబర్ 17న హైదరాబాద్ సంస్థానం భారత యూనియన్లో విలీనం కావడం చారిత్రక వాస్తవం.ప్రజా పోరాటాలు, త్యాగాలు, హైదరాబాద్ విలీనం.. ఇవన్నీ కలిసిన చారిత్రక మైలురాయిగా సెప్టెంబర్ 17 నిలిచిపోయింది.
About The Author
