తెలంగాణ ప్రభుత్వం ప్రతిష్టాత్మకంగా చేపట్టిన ఇందిరమ్మ ఇళ్ల పథకం క్షేత్రస్థాయిలో రాజకీయ వివాదాలకు కేంద్రబిందువుగా మారుతోంది. మధిర మండలం ఆత్కూరు గ్రామంలో ఇందిరమ్మ ఇళ్ల ఎంపిక ప్రక్రియ తీవ్ర వివాదాస్పదమైంది.
అర్హులకు ఇళ్లు కేటాయించాలన్న లక్ష్యం పక్కదారి పట్టి, గ్రామ సర్పంచ్ వర్గానికి, కాంగ్రెస్ గ్రామ శాఖ నాయకత్వానికి మధ్య జరుగుతున్న ఆధిపత్య పోరు గ్రామంలో రాజకీయ వేడిని రాజేసింది.
గ్రామంలోని నిరుపేదలు, అర్హులైన ప్రతి ఒక్కరికీ న్యాయం జరగాలనే ఉద్దేశంతో గ్రామ సర్పంచ్ నేతృత్వంలో గ్రామ కమిటీ సమావేశమై లబ్ధిదారుల జాబితాను సిద్ధం చేసింది.
నియమనిబంధనల ప్రకారం అర్హులను గుర్తించి, గ్రామ కమిటీ తీర్మానం ద్వారా ఒక జాబితాను ఫైనల్ చేసి అధికారులకు నివేదించేందుకు సిద్ధం చేశారు.గ్రామ కమిటీ ఆమోదించిన జాబితాను పూర్తిగా పక్కనబెట్టే ప్రయత్నాలు మొదలయ్యాయి.
కాంగ్రెస్ పార్టీ గ్రామ శాఖ అధ్యక్షుడు ఇందులో జోక్యం చేసుకుని, సర్పంచ్ రూపొందించిన జాబితాలో గత బీఆర్ఎస్ పార్టీకి చెందిన వారి పేర్లే ఎక్కువగా ఉన్నాయని ఆరోపిస్తున్నారు. గ్రామ కమిటీ జాబితాను కాదని, తాము ప్రతిపాదించిన వ్యక్తులకే ఇందిరమ్మ ఇళ్లు మంజూరు చేయాలంటూ మండల స్థాయి అధికారులపై ఒత్తిడి తెస్తూ చక్రం తిప్పుతున్నట్లు సమాచారం.
అధికార పార్టీ నేత తీరుపై సర్పంచ్, గ్రామ కమిటీ వర్గాలు తీవ్ర ఆగ్రహం వ్యక్తం చేస్తున్నాయి. రాజకీయం చూడకుండా గ్రామంలో నిజమైన నిరుపేదలను గుర్తించి లిస్టు తయారు చేస్తే, పార్టీల రంగు పులిమి అర్హులకు అన్యాయం చేయడం తగదని సర్పంచ్ వర్గం వాదిస్తోంది.
ఎవరికి ఇళ్లు వస్తాయో తెలియక అసలైన పేదలు, గుడిసెల్లో కాలం వెళ్లదీస్తున్న లబ్ధిదారులు లబోదిబోమంటున్నారు. స్థానిక ప్రజాప్రతినిధులు, ఉన్నతాధికారులు తక్షణమే జోక్యం చేసుకుని, రాజకీయ ప్రమేయం లేకుండా నిష్పక్షపాతంగా విచారణ జరిపి నిజమైన అర్హులకు ఇందిరమ్మ ఇళ్లు దక్కేలా చర్యలు తీసుకోవాలని ఆత్కూరు గ్రామస్తులు డిమాండ్ చేస్తున్నారు.
About The Author
