యువ పారిశ్రామికవేత్తలు, స్టార్టప్‌లు, ఎంఎస్ఎంఈలను ప్రోత్సహించాలి: కేటీఆర్

2026లో ప్రముఖుల సందేశం
హైదరాబాద్: వివిధ రంగాల్లో విశిష్ట సేవలు అందిస్తున్న వ్యక్తులు, సంస్థలను సత్కరించే టైమ్స్ బిజినెస్ అవార్డ్స్ హైదరాబాద్ 2026 – 12వ ఎడిషన్ అవార్డుల ప్రదానోత్సవం నగరంలోని నోవాటెల్‌లో ఘనంగా జరిగింది. పరిశ్రమలు, ఐటీ, ఆరోగ్య సంరక్షణ, విద్య, రియల్ ఎస్టేట్, తయారీ, సేవారంగం, సామాజిక సేవ తదితర రంగాల్లో ప్రతిభ కనబరిచిన వారికి బీఆర్ఎస్ వర్కింగ్ ప్రెసిడెంట్ కేటీఆర్, సినీనటుడు నాగ చైతన్య, మాజీ క్రికెటర్ మిథాలీ రాజ్ చేతుల మీదుగా అవార్డులు అందజేశారు. ఈ సందర్భంగా కేటీఆర్ మాట్లాడుతూ యువ పారిశ్రామికవేత్తలు, స్టార్టప్‌లు, ఎంఎస్ఎంఈలను ప్రోత్సహించడం నేటి ఆర్థిక వ్యవస్థకు ఎంతో అవసరమన్నారు. యువత ఉద్యోగాలు వెతుక్కునేవారిగా కాకుండా ఉద్యోగాలు కల్పించేవారిగా ఎదగడానికి స్టార్టప్‌లు దోహదపడతాయని పేర్కొన్నారు. వ్యవసాయం తర్వాత అత్యధిక మందికి ఉపాధి కల్పిస్తున్న రంగాల్లో ఎంఎస్ఎంఈలు కీలకమని, దేశ జీడీపీ, ఎగుమతుల్లో వాటి పాత్ర గణనీయంగా ఉందన్నారు. యువ పారిశ్రామికవేత్తలు సరికొత్త ఆలోచనలు, సాంకేతికతతో మార్కెట్లోకి రావాలని సూచించారు. మెరుగైన సమాజ నిర్మాణానికి వ్యాపార రంగంలో ఆవిష్కరణలు అవసరమని సినీనటుడు నాగ చైతన్య అన్నారు. కేవలం లాభాలకే పరిమితం కాకుండా సమాజం, పర్యావరణానికి మేలు చేసే వ్యాపారాలే భవిష్యత్తులో ప్రాధాన్యం పొందుతాయని పేర్కొన్నారు. తాను రెండేళ్లుగా పారిశ్రామికవేత్తగా తన ప్రయాణాన్ని కొనసాగిస్తున్నానని, కొత్త ఆలోచన లేదా ఉత్పత్తిని విజయవంతంగా మార్కెట్లోకి తీసుకెళ్లేందుకు ఇన్నోవేషన్ కీలకమని అన్నారు. తెలంగాణ అభివృద్ధికి కృషి చేస్తున్న వ్యక్తులు, సంస్థలను గుర్తించి ప్రోత్సహించడమే అవార్డుల ఉద్దేశమని నిర్వాహకులు తెలిపారు. కార్యక్రమంలో వ్యాపారవేత్తలు, పారిశ్రామికవేత్తలు, కార్పొరేట్ ప్రతినిధులు, వైద్యులు, విద్యావేత్తలు, వివిధ రంగాల ప్రముఖులు పాల్గొన్నారు.