ప్రకృతికి రాఖీ: నర్సంపేటలో వినూత్న రక్షాబంధన్

లోకల్ గైడ్  నర్సంపేట ప్రతినిధి ఆగస్టు 28  :

సాధారణంగా రాఖీ పండుగ అంటే అన్నా చెల్లెళ్ల అనుబంధం, రక్షణకు ప్రతీక. కానీ వరంగల్ జిల్లా నర్సంపేట మండల కేంద్రంలో ఒక వనప్రేమి ఈ పండుగకు కొత్త అర్థం చెప్పాడు. చెట్టును తన చెల్లిగా భావించి, దానికి రాఖీ కట్టి ‘వృక్షా బంధన్’ అనే వినూత్న సంప్రదాయానికి శ్రీకారం చుట్టాడు.
చెట్టు మనకు ఏమిస్తుంది?
“చెట్టు మనకి కర్రనిస్తుంది, ప్రాణవాయువు (ఆక్సిజన్) ఇస్తుంది, ఎండలో నీడనిస్తుంది. తిరిగి మన నుండి ఏమీ ఆశించదు. అలాంటి చెట్టును మనం కాపాడుకోవద్దా? చెల్లి తన అన్న రక్షణ కోసం రాఖీ కట్టినట్లు, మనం కూడా వృక్ష రక్షణ కోసం రాఖీ కట్టాలి” అని ఆ వనప్రేమి పేర్కొన్నారు.
ఐదేళ్లుగా ఆనవాయితీ:
ఇది ఒక్కరోజు ఆలోచన కాదు. గత ఐదు సంవత్సరాలుగా ప్రతి రాఖీ పండుగ రోజున నర్సంపేటలోని చెట్లకు రాఖీలు కట్టడం, వాటిని ఆలింగనం చేసుకోవడం ఆయన ఆనవాయితీగా పెట్టుకున్నారు. చెట్టును కేవలం మొక్కగా కాకుండా, తన కుటుంబ సభ్యురాలిగా, చెల్లిగా భావించి ఆత్మీయ బంధాన్ని పంచుతున్నారు.
మేధావుల ప్రశంస:
“చెల్లిని ఏ విధంగా ఆదరిస్తామో, మొక్కలను కూడా అదే విధంగా ఆదరించాలి. నీ చెల్లికి ఏ విధంగా ఆత్మీయ బంధాన్ని అందిస్తావో, ఆ విధంగా వృక్షానికి కూడా అందించాలి. ఇది ప్రతి ఒక్కరూ సాంప్రదాయబద్ధంగా తమ అన్నా చెల్లెళ్ల సంస్కారాన్ని ఏర్పరుచుకోవడమే” అని ఆయన ఈ సందర్భంగా ప్రజలకు పిలుపునిచ్చారు.
చెట్టును నరకడం కాదు, చెట్టును కౌగిలించుకోవడం మన ధర్మం అని చేసి చూపిస్తున్న ఈ వనప్రేమి చర్యను నర్సంపేట ప్రజలు, మేధావులు, పర్యావరణ ప్రేమికులు అభినందిస్తున్నారు.
ఒకవైపు విచ్చలవిడిగా చెట్లను నరుకుతున్న ఈ రోజుల్లో, చెట్టుకు రాఖీ కట్టి దాని రక్షణ బాధ్యతను తీసుకోవడం నిజంగా హర్షణీయం. ఈ ‘వృక్షా బంధన్’ సంప్రదాయాన్ని ప్రతి ఒక్కరూ కొనసాగించాలని, ప్రతి ఇంట్లో ఒక చెట్టుకు రాఖీ కట్టాలని ఆయన కోరారు.