లోకల్ గైడ్/తాండూర్:
తాండూర్ పట్టణంలోని 27వ వార్డు కౌన్సిలర్ ఉప్పరి స్వరూప–మల్లేశం నిలయం వద్ద ఏకదంత యూత్ ఉత్సవ సమితి ఆధ్వర్యంలో ప్రతిష్ఠించిన గణనాథుడికి మంగళవారం సాయంత్రం భక్తిశ్రద్ధలతో రాధిక-కిరణ్ దంపతులు ప్రత్యేక పూజలు నిర్వహించారు. ఈ నేపథ్యంలో గణనాథుడిని దర్శించుకుని ప్రత్యేక పూజలు చేసి, పుష్పాలు, పండ్లు సమర్పించారు.
పూజా కార్యక్రమంలో గణనాథుడికి అరటిపండ్లు, కొబ్బరికాయ, ఆపిల్, ద్రాక్ష, కమలాపండ్లు తదితర పండ్లతో పాటు పులిహోర, చక్కెర పొంగలి, పాయసం, ఉండ్రాళ్లు, కుడుములు, లడ్డూలు, బూందీ వంటి పిండి వంటకాలను నైవేద్యంగా సమర్పించారు. అనంతరం హారతి నిర్వహించి భక్తులకు తీర్థప్రసాదాలు అందజేశారు.
ఈ సందర్భంగా ఏకదంత యూత్ ఉత్సవ సమితి ఆధ్వర్యంలో భక్తులందరికీ అన్నదానం నిర్వహించారు. పెద్ద సంఖ్యలో భక్తులు పాల్గొని గణనాథుడిని దర్శించుకుని అన్నప్రసాదం స్వీకరించారు. యువకులు, మహిళలు, చిన్నారులు, స్థానికులు పెద్ద సంఖ్యలో పాల్గొనడంతో పరిసర ప్రాంతంలో ఆధ్యాత్మిక, భక్తి వాతావరణం నెలకొంది. ఈ కార్యక్రమంలో ఏకదంతా గణేష్ ఉత్సవ సమితి అధ్యక్షులు రవితేజ, సుదర్శన్, ప్రణీత్ , పవన్, శ్రీనాథ్, గొట్టం రాఘవేందర్, కార్తీక్, జగదీష్, రాకేష్, తదితరులు పాల్గొన్నారు.
