సిద్దిపేట ఆగస్ట్ 28( లోకల్ గైడ్):
శ్రావణ మాసం, రాఖీ పౌర్ణమి సందర్భంగా సిద్దిపేట పట్టణంలోని శ్రీ సంతోషిమాత దేవాలయంలో మాజీ మంత్రి, ఎమ్మెల్యే హరీశ్ రావు అమ్మవారిని దర్శించుకున్నారు. ఆలయంలో నిర్వహించిన ఉద్యాపన పూజ కార్యక్రమంలో పాల్గొని ప్రత్యేక పూజలు చేశారు.ఈ సందర్భంగా హరీశ్ రావు మాట్లాడుతూ శ్రావణ మాసం అమ్మవారికి, ఆడపడుచులకు ఎంతో పవిత్రమైన, శ్రేష్ఠమైన మాసమని అన్నారు. శ్రీ సంతోషిమాత అమ్మవారి పుట్టినరోజు సందర్భంగా దర్శనం చేసుకోవడం ఎంతో పుణ్యమని పేర్కొన్నారు. రాఖీ పౌర్ణమి సందర్భంగా ఆడపడుచులందరికీ శుభాకాంక్షలు తెలిపారు. అమ్మవారి ఆశీస్సులతో ప్రజలందరూ సుఖసంతోషాలతో, ఆయురారోగ్యాలతో చల్లగా ఉండాలని ప్రార్థించినట్లు తెలిపారు.అనంతరం ఆలయ అర్చకులు, ఈఓ హరీశ్ రావుకు అమ్మవారి ప్రసాదాన్ని అందజేసి ఆశీర్వదించారు.రాఖీ పౌర్ణమి సందర్భంగా మాజీ మున్సిపల్ చైర్మన్ మంజుల రాజనర్సు, పార్టీ మహిళా నాయకులు హరీశ్ రావుకు రాఖీ కట్టి రాఖీ పౌర్ణమి శుభాకాంక్షలు తెలిపారు. ఈ సందర్భంగా ఆడపడుచులు, నాయకులతో హరీశ్ రావు ఆప్యాయంగా ముచ్చటించారు.
