సిద్దిపేట, ఆగస్టు 8(లోకల్ గైడ్):
సిద్దిపేటలోని అనూష్టన్ ఇంటర్నేషనల్ పబ్లిక్ స్కూల్లో శనివారం ఆషాఢం బోనాల వేడుకలను ఘనంగా నిర్వహించారు. విద్యార్థులు, ఉపాధ్యాయులు సంప్రదాయ దుస్తులు ధరించి వేడుకల్లో పాల్గొని బోనాల పండుగ ప్రత్యేకతను చాటారు.ఈ సందర్భంగా పాఠశాల ప్రిన్సిపాల్ ఓ.ఆర్. సునయన మాట్లాడుతూ.. చిన్ననాటి నుంచే విద్యార్థులకు మన సంస్కృతి, సంప్రదాయాలపై అవగాహన కల్పించాల్సిన అవసరం ఉందన్నారు. మన సంస్కృతి, సంప్రదాయాలను పిల్లలకు పరిచయం చేస్తే వారు భవిష్యత్లో ఏ దేశానికి వెళ్లినా మన సంస్కృతి గురించి గర్వంగా చెప్పగలుగుతారని పేర్కొన్నారు.బోనాల పండుగ విశిష్టత, తెలంగాణ సంస్కృతిలో దాని ప్రాధాన్యతను విద్యార్థులకు వివరించారు. సంప్రదాయాలను కాపాడుతూ, వాటిని భవిష్యత్ తరాలకు అందించాల్సిన బాధ్యత ప్రతి ఒక్కరిపై ఉందన్నారు.కార్యక్రమంలో పాఠశాల డైరెక్టర్ ఎస్. భాస్కర్ రెడ్డి, ప్రిన్సిపాల్ ఓ.ఆర్. సునయన, పాఠశాల సిబ్బంది, విద్యార్థులు పాల్గొన్నారు.
