పూలనే దేవతగా పూజించే పండుగ బతుకమ్మ: 

 లోకల్ గైడ్ వికారాబాద్ జిల్లా బ్యూరో ప్రతినిధి :
 
ప్రకృతిలో లభించే పూలనే దేవతగా ఆరాధించే తెలంగాణ సంస్కృతీ సంప్రదాయాలకు ప్రతీక "బతుకమ్మ పండుగ" అని వికారాబాద్ జిల్లా కలెక్టర్ దీపక్ తివారి పేర్కొన్నారు.
శనివారం మహిళా శిశు సంక్షేమ శాఖ ఆధ్వర్యంలో వికారాబాద్ జిల్లా కలెక్టరేట్ కార్యాలయ ఆవరణలో బతుకమ్మ వేడుకలను ఘనంగా నిర్వహించారు. ఈ సంబరాలలో జిల్లా కలెక్టర్ దీపక్ తివారి, జిల్లా ఎస్పీ స్నేహ మెహరా, ట్రైనీ కలెక్టర్ సచిన్ బసవరాజ్ కలిసి పాల్గొని, గౌరమ్మకు ప్రత్యేక పూజలు నిర్వహించారు.
ఈ సందర్భంగా జిల్లా కలెక్టర్ మాట్లాడుతూ... తెలంగాణ సంస్కృతి, సంప్రదాయాలకు నిలువుటద్దంగా నిలిచే బతుకమ్మ సంబరాలను ప్రతి సంవత్సరం ఎంతో ఉత్సాహంగా నిర్వహిస్తున్నామని తెలిపారు. తెలంగాణ ఆడపడుచుల ఆత్మీయతకు, ప్రకృతి ఆరాధనకు, పూల వైవిధ్యానికి ప్రతిరూపమైన బతుకమ్మ పండుగ మన సంస్కృతీ సంప్రదాయాలను భావితరాలకు అందించడంలో కీలక పాత్ర పోషిస్తుందని పేర్కొన్నారు. మహిళల విశేష భాగస్వామ్యంతో నిర్వహించిన ఈ వేడుకలు సాంస్కృతిక ఐక్యతను, సామాజిక సౌభ్రాతృత్వాన్ని చాటిచెప్పాయని అన్నారు.
ఈ కార్యక్రమంలో జిల్లా సంక్షేమ అధికారి కాంతారావు, జిల్లా పంచాయతీ అధికారి (డీపీవో ) జయసుధ, జిల్లా పౌర సంబంధాల అధికారి ( డిపిఆర్ఓ) చెన్నమ్మ, సీడీపీఓలు, సూపర్వైజర్లు, అంగన్‌వాడీ టీచర్లు, మహిళా ఉద్యోగులు మరియు వివిధ శాఖల సిబ్బంది తదితరులు పాల్గొన్నారు