మల్కాజిగిరి మున్సిపల్‌ కార్పొరేషన్‌ (ఎంఎంసీ) పరిధిలోని ఫతుల్లాగూడ జంతు సంరక్షణ కేంద్రాన్ని మున్సిపల్‌ కమిషనర్‌ సందర్శించారు. వెటర్నరీ అధికారులు, ఫీల్డ్‌ సిబ్బంది, జంతు సంక్షేమ సంస్థల ప్రతినిధులతో కలిసి కేంద్రంలో కొనసాగుతున్న యానిమల్‌ బర్త్‌ కంట్రోల్‌ (ఏబీసీ), యాంటీ రేబిస్‌ వ్యాక్సినేషన్‌ (ఏఆర్‌వీ) కార్యక్రమాలను సమీక్షించారు.
ఈ సందర్భంగా కుక్కల కెనల్స్‌, ఆపరేషన్‌ థియేటర్‌, కుక్కలకు ఆహారం సిద్ధం చేసే ప్రాంతాన్ని కమిషనర్‌ పరిశీలించారు. నిర్మాణంలో ఉన్న నూతన జంతు ఆశ్రయాన్ని కూడా సందర్శించారు. జంతు సంక్షేమ సంస్థల ప్రతినిధులు, జంతు ప్రేమికులతో మాట్లాడి వారి సూచనలను తెలుసుకున్నారు.
శస్త్రచికిత్స చేసిన కుక్కల గుర్తింపు, ధ్రువీకరణ ప్రక్రియను మరింత పటిష్టం చేయడంతో పాటు శస్త్రచికిత్స అనంతర సంరక్షణను సమర్థంగా నిర్వహించాలని అధికారులను ఆదేశించారు. కెనల్స్‌, కుక్కలను తరలించే వాహనాల్లో పారిశుద్ధ్య ప్రమాణాలను కచ్చితంగా పాటించాలని సూచించారు.
అలాగే ప్రతి కేసుకు సంబంధించిన కేస్‌షీట్లు, శస్త్రచికిత్స అనంతర సంరక్షణ వివరాలను క్రమబద్ధంగా నమోదు చేయాలని, ఏఆర్‌వీ కార్యక్రమంలో ఎస్‌ఓపీ ప్రకారం టీకాలు అందిస్తూ కోల్డ్‌చైన్‌ నిర్వహణను నిర్ధారించాలని సూచించారు. శస్త్రచికిత్సకు ముందు అవసరమైన పరీక్షలు నిర్వహించేందుకు డయాగ్నస్టిక్‌ సదుపాయాలను ఏర్పాటు చేసే అంశంపై చర్యలు తీసుకోవాలని తెలిపారు.
ఎంఎంసీ పరిధిలో అందుబాటులో ఉన్న వనరులు, సాధ్యాసాధ్యాలను పరిగణనలోకి తీసుకుని సుమారు 3,000 జంతువుల సామర్థ్యంతో జంతు ఆశ్రయాలను అభివృద్ధి చేసే ప్రతిపాదనపై కూడా చర్యలు చేపట్టాలని అధికారులకు సూచించారు.
జంతు సంరక్షణను బలోపేతం చేయడం, ఏబీసీ–ఏఆర్‌వీ కార్యక్రమాలను బాధ్యతాయుతంగా నిర్వహించడం, మెరుగైన జంతు సంక్షేమ సదుపాయాలను కల్పించడం లక్ష్యంగా చర్యలు కొనసాగించాలని కమిషనర్‌ స్పష్టం చేశారు.
About The Author
