విద్యార్థులకు సరిపడా బస్సు సౌకర్యాలు లేక తీవ్ర ఇబ్బందులు

విద్యార్థులు, సామాన్య ప్రజలకు సరిపడా ఆర్టీసీ బస్సు సౌకర్యాలు లేక తీవ్ర ఇబ్బందులు ఎదుర్కొంటున్నారని కాంగ్రెస్ పార్టీ యువ నాయకుడు హరీష్ గౌడ్ ఆవేదన వ్యక్తం చేశారు.
రాజేంద్రనగర్ సర్కిల్ పరిధిలోని 123వ డివిజన్ సన్‌సిటీ పరిసర ప్రాంతాల్లో రోజురోజుకూ జనాభా పెరుగుతుండటంతో పాటు ట్రాఫిక్ రద్దీ కూడా అధికమవుతోందని ఆయన తెలిపారు. ముఖ్యంగా ప్రతి రోజు ఉదయం పాఠశాలలు, కళాశాలలకు వెళ్లే విద్యార్థులు బస్సుల కొరత కారణంగా తీవ్ర ఇబ్బందులు పడుతున్నారని పేర్కొన్నారు.
సన్‌సిటీ ప్రాంతం నుంచి టీఎస్‌ఆర్టీసీ బస్సుల్లో కళాశాలలకు వెళ్లే విద్యార్థుల సంఖ్యకు అనుగుణంగా బస్సులు లేకపోవడంతో కిక్కిరిసిన బస్సుల్లో ప్రయాణించాల్సి వస్తోందన్నారు. కొందరు విద్యార్థులు ప్రమాదకర పరిస్థితుల్లో ప్రయాణించాల్సి వస్తోందని, దీనివల్ల ప్రమాదాలు జరిగే అవకాశం ఉందని ఆందోళన వ్యక్తం చేశారు.
విద్యార్థుల ఇబ్బందులను దృష్టిలో ఉంచుకుని ఉదయం వేళల్లో అదనపు బస్సులను ఏర్పాటు చేయాలని ఆర్టీసీ యాజమాన్యాన్ని హరీష్ గౌడ్ కోరారు. ప్రమాదాలు సంభవించిన తర్వాత చర్యలు తీసుకోవడం కంటే ముందుగానే తగిన ఏర్పాట్లు చేయాలని సూచించారు.
అలాగే సన్‌ సిటీ చౌరస్తా పరిసర ప్రాంతాల్లో వాహనాల రద్దీ కారణంగా తరచూ ట్రాఫిక్ జామ్ ఏర్పడుతోందని, ట్రాఫిక్ సమస్య పరిష్కారానికి సంబంధిత అధికారులు చర్యలు తీసుకోవాలని ఆయన కోరారు.