కారేపల్లి (సింగరేణి), సెప్టెంబర్ 12, లోకల్ గైడ్ న్యూస్ : పేరుపల్లి గ్రామ సమీపంలో పంట కాలువలో పడి ఓ వ్యక్తి మృతి చెందిన ఘటన శనివారం వెలుగుచూసింది. పేరుపల్లి పాత కేసీఆర్ కాలనీకి చెందిన పోలబోయిన వెంకన్న (రాయుడి) (43) చిన్నకట్టుగూడెంలో ఓ రైతు వద్ద పాలేరుగా పనిచేస్తున్నాడు. శుక్రవారం ఇంటి నుంచి బయటకు వెళ్లిన వెంకన్న రాత్రి వరకు తిరిగి రాకపోవడంతో కుటుంబ సభ్యులు పరిసర ప్రాంతాల్లో గాలించారు. అయినప్పటికీ ఆయన ఆచూకీ లభించలేదు. శనివారం ఉదయం నాగరాజుకట్టు నుంచి పేరుపల్లి పెద్దచెరువుకు వెళ్లే పంట కాలువలో వెంకన్న మృతదేహాన్ని స్థానికులు గుర్తించారు. కాలువ వద్దకు వెళ్లిన సమయంలో ప్రమాదవశాత్తు జారిపడి నీటిలో మునిగి మృతి చెంది ఉండవచ్చని స్థానికులు భావిస్తున్నారు. మృతదేహాన్ని గుర్తించిన విషయం కుటుంబ సభ్యులకు తెలియడంతో వారు విషాదంలో మునిగిపోయారు. ఘటనపై పూర్తి వివరాలు తెలియాల్సి ఉంది.
