కారేపల్లి మండల కార్యాలయంలో పోషకాహార ప్రదర్శనలో కలెక్టర్ దివాకర టి.ఎస్ 

కారేపల్లి, అక్టోబర్ 6 (లోకల్ గైడ్ న్యూస్):

తొమ్మిదవ జాతీయ పోషణ మాసోత్సవాల్లో భాగంగా కామేపల్లి ఐసీడీఎస్‌ ప్రాజెక్టు ఆధ్వర్యంలో కారేపల్లి మండల కేంద్రంలోని ఎంపీడీవో కార్యాలయంలో ఏర్పాటు చేసిన పోషకాహార పదార్థాల ప్రదర్శనను జిల్లా కలెక్టర్ దివాకర టి.ఎస్. మంగళవారం సందర్శించారు. ప్రదర్శనలో ఏర్పాటు చేసిన వివిధ రకాల పోషకాహార పదార్థాలను కలెక్టర్ స్వయంగా పరిశీలించి, వాటి తయారీ విధానం, వినియోగం, పోషక విలువలు, ఆరోగ్య ప్రయోజనాలపై అధికారులను అడిగి తెలుసుకున్నారు. చిరుధాన్యాలు, ఆకుకూరలు, పప్పులు, కూరగాయలు, పండ్లు తదితర స్థానికంగా లభించే ఆహార పదార్థాలతో తయారు చేసిన వంటకాలను పరిశీలించిన కలెక్టర్.. చిన్నారులు, గర్భిణులు, బాలింతలకు సమతుల్య ఆహారం అందించడం, పోషకాహార లోపాన్ని నివారించడంపై అధికారులతో చర్చించారు. ప్రజలకు అందుబాటులో ఉండే పదార్థాలతోనే ఆరోగ్యకరమైన ఆహారాన్ని తయారు చేసుకునే విధానాలను విస్తృతంగా తెలియజేయాలని సూచించారు. జాతీయ పోషణ మాసోత్సవాల సందర్భంగా ఐసీడీఎస్‌ ఆధ్వర్యంలో నిర్వహిస్తున్న అవగాహన కార్యక్రమాలను కూడా కలెక్టర్ పరిశీలించారు. అంగన్‌వాడీ కేంద్రాల ద్వారా పోషకాహారం ప్రాధాన్యతను ప్రజలకు వివరించడంతో పాటు చిన్నారులు, గర్భిణులు, బాలింతల ఆరోగ్యంపై ప్రత్యేక శ్రద్ధ చూపాలని సూచించారు. కలెక్టర్ వెంట ఐసీడీఎస్‌ పీడీ ఆలేటి ప్రమీల, కామేపల్లి ఐసీడీఎస్‌ ప్రాజెక్టు అధికారి కె.ఉమా, ఐసీడీఎస్‌ సిబ్బంది, అంగన్‌వాడీ కార్యకర్తలు తదితరులు పాల్గొన్నారు.