విద్యుత్ ఉచ్చుకు ఫారెస్ట్ బీట్ ఆఫీసర్ నవీన్ బలి

సింగరేణి మండలం వెంకట్యాతండాకు చెందిన మాజీ ఎంపీపీ భానోత్ దేవ్లా నాయక్ కుమారుడు భానోత్ నవీన్ చెరువు సింగారం వెస్ట్ బీట్‌లో ఫారెస్ట్ బీట్ ఆఫీసర్‌గా విధులు నిర్వహిస్తున్నారు. విధుల్లో భాగంగా అటవీ ప్రాంతానికి వెళ్లిన నవీన్.. వన్యప్రాణుల వేట కోసం ఏర్పాటు చేసినట్లు భావిస్తున్న విద్యుత్ ఉచ్చుకు గురై విద్యుత్ షాక్‌తో మృతి చెందినట్లు సమాచారం.

నవీన్ మృతదేహానికి ఎమ్మెల్యే రాందాస్ నాయక్ నివాళి

నవీన్ మృతదేహాన్ని ఎమ్మెల్యే మాలోత్ రాందాస్ నాయక్ సందర్శించి ఘనంగా నివాళులర్పించారు. కుటుంబ సభ్యులను పరామర్శించి, తీవ్ర దిగ్భ్రాంతి వ్యక్తం చేశారు. విధి నిర్వహణలో ప్రాణాలు కోల్పోయిన నవీన్ కుటుంబానికి ప్రభుత్వం అన్ని విధాలా అండగా ఉండాలని ఎమ్మెల్యే పేర్కొన్నారు.

నవీన్ కుటుంబ పరిస్థితిని తెలుసుకున్న ఎమ్మెల్యే రాందాస్ నాయక్, భార్య, ఇద్దరు చిన్నారులు ఉన్న కుటుంబానికి తక్షణ సహాయం అందించేందుకు తన వంతు సహకారం అందిస్తానని, కుటుంబానికి అండగా నిలుస్తానని భరోసా ఇచ్చారు. నవీన్ కుటుంబానికి న్యాయం జరిగేలా ప్రభుత్వ స్థాయిలో అవసరమైన చర్యలు తీసుకునేందుకు అధికారులతో మాట్లాడుతున్నట్లు తెలిపారు.

నవీన్ పాడె మోసిన ఎమ్మెల్యే రాందాస్ నాయక్

నవీన్ అంతిమయాత్రలో ఎమ్మెల్యే మాలోత్ రాందాస్ నాయక్ స్వయంగా పాల్గొని నవీన్ పాడెను మోశారు. కుటుంబ సభ్యులు, బంధువులు, గ్రామస్తులతో కలిసి అంతిమయాత్రలో నడిచిన ఎమ్మెల్యే, నవీన్ కుటుంబం పట్ల తనకు ఉన్న ఆత్మీయతను చాటుకున్నారు.

విధి నిర్వహణలో ప్రాణాలు కోల్పోయిన అటవీశాఖ ఉద్యోగి అంతిమయాత్రలో ప్రజాప్రతినిధిగా కాకుండా కుటుంబ సభ్యుడిలా ఎమ్మెల్యే రాందాస్ నాయక్ పాడె మోయడం అక్కడున్న వారిని కదిలించింది. దుఃఖంలో ఉన్న నవీన్ కుటుంబ సభ్యులను ఓదార్చుతూ, “కుటుంబానికి అండగా ఉంటాం.. ప్రభుత్వం నుంచి తగిన సహాయం అందేలా చర్యలు తీసుకుంటాం” అని భరోసా ఇచ్చారు.

మాజీ ఎమ్మెల్యే బానోత్ చంద్రావతి నివాళి

మాజీ ఎమ్మెల్యే బానోత్ చంద్రావతి కూడా నవీన్ మృతదేహాన్ని సందర్శించి ఘనంగా నివాళులర్పించారు. కుటుంబ సభ్యులను పరామర్శించి, నవీన్ మృతిపై తీవ్ర దిగ్భ్రాంతి వ్యక్తం చేశారు. దుఃఖంలో ఉన్న కుటుంబానికి ప్రభుత్వం అన్ని విధాలా అండగా నిలవాలని, నవీన్ కుటుంబానికి తగిన న్యాయం, పరిహారం అందించాలని ఆమె కోరారు.

కుటుంబాన్ని ఓదార్చిన మాజీ ఎమ్మెల్యే రాములు నాయక్

భద్రాచలం ఏరియా ఆసుపత్రిలో ఉంచిన నవీన్ మృతదేహాన్ని మాజీ ఎమ్మెల్యే రాములు నాయక్ సందర్శించారు. మృతదేహానికి నివాళులర్పించి, నవీన్ తండ్రి దేవ్లా నాయక్‌ను ఓదార్చారు. అనంతరం సంబంధిత అధికారులతో మాట్లాడి ఘటనకు సంబంధించిన వివరాలను తెలుసుకున్నారు. కుటుంబానికి ప్రభుత్వం నుంచి తగిన సహాయం అందేలా చర్యలు తీసుకోవాలని అధికారులను కోరారు.

మంత్రి కొండా సురేఖకు సమాచారం

ఎమ్మెల్యే మాలోత్ రాందాస్ నాయక్ ఘటనపై అటవీశాఖ మంత్రి కొండా సురేఖకు సమాచారం అందించారు. ఘటనపై వెంటనే స్పందించిన మంత్రి నవీన్ కుటుంబానికి తగిన న్యాయం జరిగేలా చర్యలు తీసుకుంటామని హామీ ఇచ్చినట్లు ఎమ్మెల్యే తెలిపారు. నవీన్ అంత్యక్రియలను అధికారిక లాంఛనాలతో ఘనంగా నిర్వహించాలని సంబంధిత అధికారులను మంత్రి ఆదేశించినట్లు వెల్లడించారు.

బైక్ ర్యాలీగా స్వగ్రామానికి మృతదేహం

భద్రాచలం నుంచి నవీన్ మృతదేహాన్ని స్వగ్రామానికి తీసుకువచ్చే సమయంలో గ్రామస్తులు, యువకులు పెద్ద సంఖ్యలో బైక్ ర్యాలీగా తరలివచ్చారు. విషాద వాతావరణంలో నవీన్ మృతదేహానికి తుది నివాళులు అర్పించారు. అనంతరం ప్రభుత్వ అధికారుల సమక్షంలో అధికారిక లాంఛనాలతో అంత్యక్రియలు నిర్వహించారు.

భార్య, ఇద్దరు చిన్నారులను అనాథలుగా చేసిన విషాదం

నవీన్ మృతితో ఆయన కుటుంబం తీవ్ర విషాదంలో మునిగిపోయింది. నవీన్‌కు భార్యతో పాటు మూడేళ్ల పాప, ఏడాది వయసున్న బాబు ఉన్నారు. చిన్న వయసులోనే తండ్రిని కోల్పోయిన ఇద్దరు చిన్నారులను చూసి కుటుంబ సభ్యులు, గ్రామస్తులు కన్నీరుమున్నీరయ్యారు.

వేటగాళ్లపై ఉక్కుపాదం మోపాలి

అటవీ ప్రాంతాల్లో వన్యప్రాణుల వేట కోసం విద్యుత్ ఉచ్చులు ఏర్పాటు చేస్తున్న వారిపై కఠిన చర్యలు తీసుకోవాలని స్థానికులు డిమాండ్ చేస్తున్నారు. వన్యప్రాణులను రక్షించాల్సిన అటవీశాఖ ఉద్యోగే అదే అక్రమ వేటకు ఏర్పాటు చేసిన విద్యుత్ ఉచ్చుకు బలికావడం తీవ్ర ఆందోళన కలిగిస్తోంది.

నవీన్ మృతికి కారణమైన విద్యుత్ ఉచ్చు ఎవరు ఏర్పాటు చేశారు? దాని వెనుక ఉన్న వ్యక్తులు ఎవరు? అనే కోణాల్లో సమగ్ర దర్యాప్తు చేపట్టి నిందితులను గుర్తించి కఠినంగా శిక్షించాలని ప్రజలు కోరుతున్నారు.

విధి నిర్వహణలో ప్రాణాలు కోల్పోయిన నవీన్ కుటుంబానికి ప్రభుత్వం తక్షణ ఆర్థిక సహాయం అందించడంతో పాటు, ఆయన కుటుంబ సభ్యుల్లో ఒకరికి ప్రభుత్వ ఉద్యోగం కల్పించి ఆదుకోవాలని స్థానిక ప్రజాప్రతినిధులు, నాయకులు కోరుతున్నారు. నవీన్ పాడెను స్వయంగా మోసిన ఎమ్మెల్యే రాందాస్ నాయక్, కుటుంబానికి అండగా నిలుస్తామని ఇచ్చిన భరోసా స్థానికంగా చర్చనీయాంశంగా మారింది.