కారేపల్లి (సింగరేణి), సెప్టెంబర్ 10, లోకల్ గైడ్ న్యూస్ : సింగరేణి మండలం భాగ్యనగర్ తండా, పరిసర ఐదు తండాల ప్రజలు ఎదుర్కొంటున్న రైల్వే రాకపోకల సమస్యను తక్షణమే పరిష్కరించాలని యువజన కాంగ్రెస్ మండల అధ్యక్షుడు గుగులోత్ హర్ష నాయక్ కోరారు. ఈ మేరకు జాతీయ ఎస్టీ కమిషన్ సభ్యుడు జాటోత్ హుస్సేన్ నాయక్ను కలిసి వినతిపత్రం సమర్పించారు. ఈ సందర్భంగా గిరిజన ప్రాంతాల్లో రైతులు ఎదుర్కొంటున్న పోడు భూముల పట్టాలు, హక్కుల సమస్యలను కూడా ఎస్టీ కమిషన్ సభ్యుడి దృష్టికి తీసుకెళ్లారు. భాగ్యనగర్ తండా, పరిసర తండాలకు చెందిన రైతులు, రైతు కూలీలు ప్రతిరోజూ వ్యవసాయ పనుల కోసం రైల్వే ట్రాక్ దాటి పొలాలకు వెళ్లాల్సి వస్తోందని హర్ష నాయక్ వివరించారు. రైల్వే అధికారులు ట్రాక్ దాటేందుకు అనుమతి నిరాకరించడంతో ప్రజలు తీవ్ర ఇబ్బందులు ఎదుర్కొంటున్నారని తెలిపారు. అనుమతి లేకుండా ట్రాక్ దాటితే కేసులు నమోదు చేస్తామని హెచ్చరిస్తుండటంతో ప్రజల్లో ఆందోళన నెలకొందన్నారు. ఈ సమస్యపై గతంలో పలుమార్లు అధికారులకు వినతులు సమర్పించినా ఇప్పటివరకు శాశ్వత పరిష్కారం లభించలేదని పేర్కొన్నారు. ప్రజల భద్రత, రాకపోకల సౌకర్యాన్ని దృష్టిలో ఉంచుకుని జరుపుల బాలాజీ చేను సమీపంలోని రైల్వే స్తంభం నంబర్ కేఎస్/5/5 వద్ద అండర్పాస్ లేదా రైల్వే గేట్ ఏర్పాటు చేయాలని హర్ష నాయక్ కోరారు. సమస్యను సానుకూలంగా పరిశీలించి సంబంధిత రైల్వే, ప్రభుత్వ అధికారులతో చర్చించి తగిన చర్యలు తీసుకునేందుకు కృషి చేస్తానని జాతీయ ఎస్టీ కమిషన్ సభ్యుడు జాటోత్ హుస్సేన్ నాయక్ హామీ ఇచ్చినట్లు హర్ష నాయక్ తెలిపారు. తండాల ప్రజల ఇబ్బందులను దృష్టిలో ఉంచుకుని రైల్వే అధికారులు, ప్రభుత్వం సమస్యను త్వరితగతిన పరిష్కరించాలని ఆయన కోరారు.
About The Author
