లోకల్ గైడ్/బంట్వారం:
విద్యార్థులు తమ హక్కులు, బాధ్యతలపై అవగాహన కలిగి ఉండాలని జిల్లా న్యాయ సేవాధికార సంస్థ (డీఎల్ఎస్ఏ) కార్యదర్శి ఎ. రాధిక సూచించారు. గురువారం బంట్వారం తెలంగాణ మోడల్ స్కూల్లో డీఎల్ఎస్ఏ ఆధ్వర్యంలో నిర్వహించిన న్యాయ విజ్ఞాన అవగాహన కార్యక్రమానికి ఆమె హాజరై మాట్లాడారు. ఈ సందర్భంగా విద్యార్థులకు చట్టపరమైన హక్కులు, బాధ్యతలు, ఉచిత న్యాయ సేవలు, న్యాయ సహాయం పొందే విధానాలపై అవగాహన కల్పించారు. ప్రతి ఒక్కరూ చట్టాలను తెలుసుకోవడంతో పాటు వాటిని గౌరవిస్తూ బాధ్యతాయుతమైన పౌరులుగా ఎదగాలని సూచించారు. సమస్యలు ఎదురైనప్పుడు భయపడకుండా న్యాయ సహాయం పొందాలని తెలిపారు. ఈ కార్యక్రమంలో చీఫ్ లీగల్ ఎయిడ్ డిఫెన్స్ కౌన్సిల్ టి. వెంకటేశ్, అసిస్టెంట్ లీగల్ ఎయిడ్ డిఫెన్స్ కౌన్సిల్ శ్రీనివాస్, పాఠశాల ప్రధానోపాధ్యాయులు, బ్యూలా ఉపాధ్యాయులు, విద్యార్థులు పాల్గొన్నారు.
