సింగంపల్లికి బీటీ రోడ్డు, బస్సు సౌకర్యం కల్పించాలి గ్రామ ప్రజల వినతి 

లోకల్ గైడ్ ఆమనగల్లు, ఆగస్టు 24:
సింగంపల్లి గ్రామానికి మెరుగైన రహదారి, బస్సు సౌకర్యం కల్పించాలని కోరుతూ గ్రామ ప్రజల వినతి మేరకు సర్పంచ్ సనమోని సత్యం ఆధ్వర్యంలో గ్రామపంచాయతీ కార్యాలయం నుంచి స్థానిక ప్రజాప్రతినిధులకు వినతిపత్రం అందజేశారు. ఇందులో భాగంగా కల్వకుర్తి శాసనసభ్యులు కసిరెడ్డి నారాయణరెడ్డిని కలిసి గ్రామ ప్రజలు ఎదుర్కొంటున్న సమస్యలను వివరించారు.
గ్రామ ప్రజలు అందించిన వినతిపత్రంలో ఆకుతోటపల్లి గేట్‌ నుంచి సింగంపల్లి గ్రామం మీదుగా పోలేపల్లి గేట్‌ వరకు సుమారు 6 కిలోమీటర్ల మేర బీటీ రోడ్డు నిర్మించాలని కోరారు. రహదారి సౌకర్యం సరిగా లేకపోవడంతో గ్రామ ప్రజలు, విద్యార్థులు, వృద్ధులు, రోగులు నిత్యం తీవ్ర ఇబ్బందులు ఎదుర్కొంటున్నారని తెలిపారు. ముఖ్యంగా వర్షాకాలంలో రహదారి పరిస్థితి మరింత అధ్వానంగా మారడంతో రాకపోకలకు తీవ్ర అంతరాయం కలుగుతోందని పేర్కొన్నారు.
అదేవిధంగా సింగంపల్లి గ్రామానికి బస్సు సౌకర్యం లేకపోవడంతో విద్యార్థులు, ఉద్యోగులు, రైతులు, రోగులు, వృద్ధులు తీవ్ర ఇబ్బందులు పడుతున్నారని తెలిపారు. ఆమనగల్లు నుంచి సింగంపల్లి మీదుగా ఆకుతోటపల్లి గేట్‌ వరకు బస్సు సౌకర్యం కల్పిస్తే గ్రామ ప్రజలకు ఎంతో ప్రయోజనం చేకూరుతుందని ఎమ్మెల్యేకు వివరించారు.
ఈ సందర్భంగా గ్రామ ప్రజలు తెలిపిన సమస్యలను ఎమ్మెల్యే కసిరెడ్డి నారాయణరెడ్డి సానుకూలంగా విన్నారు. గ్రామ ప్రజల సమస్యలను సంబంధిత అధికారుల దృష్టికి తీసుకెళ్లి, రోడ్డు నిర్మాణం, బస్సు సౌకర్యం కల్పించే అంశంపై అధికారులతో మాట్లాడి తగిన చర్యలు తీసుకునేలా కృషి చేస్తానని హామీ ఇచ్చారు.
గ్రామానికి అవసరమైన మౌలిక వసతులు కల్పించేందుకు అధికారులు, ప్రజాప్రతినిధులు చొరవ చూపాలని సింగంపల్లి గ్రామ ప్రజలు కోరుతున్నారు. తమ సమస్యలను ఎమ్మెల్యే సానుకూలంగా స్వీకరించి పరిష్కారానికి హామీ ఇవ్వడంపై గ్రామస్తులు హర్షం వ్యక్తం చేశారు.