పహాడీషరీఫ్ పోలీస్ స్టేషన్ పరిధిలో 58 సిసిటివి కెమెరాల ప్రారంభించిన శంషాబాద్ జోన్ డీసీపీ బి. రాజేష్

 

మహేశ్వరం, అక్టోబర్ 27 ( లోకల్ గైడ్ ):                          ప్రజా భద్రతను బలోపేతం చేయడం, నేరాల నియంత్రణ, మత సామరస్యాన్ని కాపాడడమే ధ్యేయంగా తెలంగాణ పోలీసులు పనిచేస్తున్నారని శంషాబాద్ జోన్ డిసిపి బి. రాజేష్. తెలిపారు. మంగళవారం పహాడీషరీఫ్ పరిధిలోని పలు ప్రాంతాల్లో ఏర్పాటు చేసిన 58 సిసిటివి కెమెరాలను పహాడి షరీఫ్ ఏసీపీ ఆధ్వర్యంలో అయన ప్రారంభించారు. 
ఈ సందర్భంగా డీసీపీ శంషాబాద్ మాట్లాడుతూ.. విభిన్న మతాలు, వర్గాల ప్రజల మధ్య మత సామరస్యం, పరస్పర గౌరవం, శాంతియుత సహజీవనం యొక్క ప్రాముఖ్యతను వివరించారు. ముఖ్యంగా పండుగలు, ఇతర కార్యక్రమాల సమయంలో పహాడీషరీఫ్ ప్రాంత ప్రజలు చాటుతున్న ఐక్యతా స్ఫూర్తిని ఆయన అభినందించారు. శాంతిభద్రతలను కాపాడటం అనేది పోలీసులు ప్రజల ఉమ్మడి బాధ్యత అని ఆయన నొక్కి చెప్పారు.
సిసిటివి కెమెరాల ఏర్పాటు వల్ల నిఘా మరింత బలోపేతం అవుతుందని, నేరపూరిత కార్యకలాపాలకు అడ్డుకట్ట పడుతుందన్నారు. నేరాల గుర్తింపు, దర్యాప్తులో ఇవి ఎంతో సహాయపడతాయని ఆయన పేర్కొన్నారు. ప్రజలు, యువత, మత పెద్దలు మరియు కాలనీ పెద్దలు పోలీసులకు సహకరించాలని, పుకార్లను నమ్మవద్దని, అనుమానాస్పద కదలికలపై సమాచారం అందించాలని సూచించారు. అన్ని పండుగలను శాంతియుతంగా జరుపుకోవాలని ఆయన విజ్ఞప్తి చేశారు. కులం, మతం, వర్గాలతో సంబంధం లేకుండా ప్రతి పౌరుడికి సమాన రక్షణ కల్పించడానికి పోలీసులు కట్టుబడి ఉన్నారని ఆయన పునరుద్ఘాటించారు.
కార్పొరేట్ సామాజిక బాధ్యతలో భాగంగా ప్రజా భద్రత, సమాజ సంక్షేమం కోసం ఈ కార్యక్రమానికి తమ వంతు విలువైన సహకారాన్ని అందించిన ప్రీమియర్ ఎనర్జీస్ ప్రైవేట్ లిమిటెడ్, రేడియంట్ టెక్నాలజీస్ ప్రైవేట్ లిమిటెడ్ సంస్థలకు పోలీసులు తమ హృదయపూర్వక కృతజ్ఞతలు తెలియజేశారు. పహాడీషరీఫ్ ప్రాంతాన్ని మరింత సురక్షితమైన, ప్రశాంతమైన మరియు సామరస్యపూర్వకమైన ప్రాంతంగా మార్చడంలో సమాజ భాగస్వామ్యం, పోలీస్-ప్రజల సమన్వయం ఎంతైనా అవసరమన్నారు. ఈ కార్యక్రమంలో మాజీ ఎం పి టి సి, మైనారిటీ విభాగం అధ్యక్షుడు షేక్ అఫ్జల్, మాజీ కౌసిలర్ కొండల్, దస్తగిరి, ఎంజాల అర్జున్, సయ్యద్ ఆరిఫ్,  మగ్ధూం పటేల్ , ఇతర నాయకులు పాల్గొన్నారు.

End