వందేమాతరం 150 సంవత్సరాల స్ఫూర్తితో పాటు రాష్ట్రీయ స్వయంసేవక సంఘ్ శతాబ్ది ఉత్సవాల సందర్భంగా ఆమనగల్లు ఖండ ఆధ్వర్యంలో యువ సమ్మేళనం ఘనంగా నిర్వహించారు. ఆమనగల్లులోని వాసవి కన్యకా పరమేశ్వరి ఫంక్షన్ హాల్లో నిర్వహించిన ఈ కార్యక్రమానికి యువత, విద్యార్థులు, స్వయంసేవకులు, పట్టణ ప్రజలు, భారతీయ జనతా పార్టీ నాయకులు, ప్రజాప్రతినిధులు, వివిధ రంగాలకు చెందిన ప్రముఖులు పెద్ద సంఖ్యలో హాజరయ్యారు.
ఈ సందర్భంగా వక్తలు మాట్లాడుతూ.. వందేమాతరం స్ఫూర్తి ప్రతి భారతీయుడిలో దేశభక్తిని, జాతీయ భావనను మరింతగా పెంపొందిస్తుందని అన్నారు. దేశ నిర్మాణంలో యువత పాత్ర ఎంతో కీలకమని పేర్కొన్నారు. యువత క్రమశిక్షణ, సేవాభావం, ఐక్యత, దేశభక్తి వంటి విలువలను అలవర్చుకుని సమాజ అభివృద్ధికి కృషి చేయాలని పిలుపునిచ్చారు.
భారతీయ సంస్కృతి, సంప్రదాయాలు, జాతీయ విలువలను పరిరక్షిస్తూ సమాజ సేవలో యువత ముందుండాలని వక్తలు సూచించారు. యువతలో సామాజిక బాధ్యతను పెంపొందించడం, దేశం పట్ల గౌరవం, సేవా భావాన్ని బలోపేతం చేయడం ఇటువంటి యువ సమ్మేళనాల ప్రధాన ఉద్దేశ్యమని నిర్వాహకులు తెలిపారు.
వందేమాతరం 150 సంవత్సరాల స్ఫూర్తిని ప్రతి ఒక్కరిలోకి తీసుకెళ్లడంతో పాటు, దేశాభివృద్ధిలో యువతను భాగస్వాములను చేయాలనే సంకల్పంతో కార్యక్రమాన్ని నిర్వహించినట్లు పేర్కొన్నారు.
కార్యక్రమం సందర్భంగా “భారతమాతాకీ జై”, “వందేమాతరం” నినాదాలతో ప్రాంగణం మార్మోగింది. కార్యక్రమం దేశభక్తి, జాతీయ స్ఫూర్తితో ఉత్సాహభరితంగా కొనసాగింది.
About The Author
