లోకల్ గైడ్ : అశ్వారావుపేట
పద్మశ్రీ మందకృష్ణ మాదిగ నాయకత్వంలో అక్టోబర్ 6న హైదరాబాద్ ఉస్మానియా యూనివర్సిటీ ఆర్ట్స్ కాలేజీ ప్రాంగణంలో నిర్వహించనున్న మాదిగ స్టూడెంట్ ఫెడరేషన్ (ఎంఎస్ఎఫ్) జాతీయ ప్రతినిధుల సదస్సును విజయవంతం చేయాలని ఎమ్మార్పీఎస్, ఎంఎస్ఎఫ్ రాష్ట్ర కార్యదర్శి కొలికపోగు కాంతారావు మాదిగ పిలుపునిచ్చారు. ఈ మేరకు మండల కేంద్రంలో శనివారం విలేకర్ల సమావేశం నిర్వహించారు. ఈ సందర్భంగా కాంతారావు మాట్లాడుతూ సదస్సు నిర్వహణకు కేవలం మూడు రోజుల గడువు మాత్రమే ఉన్నందున, గ్రామాల్లోని ఉద్యమకారులు, నాయకులు సమష్టిగా కృషి చేయాలన్నారు. మండల పరిధిలోని ప్రతి గ్రామం నుంచి క్రమశిక్షణ, సరైన డ్రెస్ కోడ్ కలిగిన విద్యార్థులను ఎంపిక చేసి హైదరాబాద్‌కు తరలించేందుకు సిద్ధం చేయాలని కోరారు. సదస్సు విజయవంతానికి ప్రతి ఒక్క నాయకుడు, నాయకురాలు బాధ్యత తీసుకుని, ఒక్కొక్కరు కనీసం ముగ్గురు విద్యార్థులను సమీకరించి భాగస్వాములను చేయాలని విజ్ఞప్తి చేశారు. విద్యార్థుల హక్కుల సాధన, సామాజిక న్యాయం కోసం నిర్వహిస్తున్న ఈ సదస్సును విజయవంతం చేసి ఉద్యమ స్ఫూర్తిని చాటాలని ఆయన ఆకాంక్షించారు. ఈ విలేకర్ల సమావేశంలో కొలికపోగు క్రాంతికుమార్, రాయల పుల్లారావు, రావూరి వీరయ్య, దాట్ల అశోక్, సాయి, రవికుమార్ తదితరులు పాల్గొన్నారు.
About The Author
