కాగ్న నదిలో అక్రమ ఇసుక తవ్వకాలు!

హిటాచీలతో ఇసుక తరలింపుపై రైతుల ఆగ్రహం..

పట్టా భూములు కోతకు గురవుతున్నాయని ఆవేదన

Published On 30 Oct 2026 16:32:38

By Ram Reddy

లోకల్ గైడ్ /తాండూర్

వికారాబాద్ జిల్లా యాలాల్ మండల కేంద్రంలోని కాగ్న నది నుంచి కొడంగల్‌లో కొనసాగుతున్న అభివృద్ధి పనులకు భారీగా ఇసుక తరలిస్తుండటంపై రైతులు ఆగ్రహం వ్యక్తం చేస్తున్నారు. పట్టా భూములకు ఆనుకుని ఉన్న నదిలో హిటాచీలతో ఇష్టానుసారంగా ఇసుక తవ్వకాలు చేపడుతున్నారని రైతులు ఆరోపించారు. ఈ సందర్భంగా
యాలాల్ మండల కేంద్రానికి చెందిన రైతు శెట్టి రమేష్ మాట్లాడుతూ.. నది ప్రవాహం కారణంగా తమ భూములు కోతకు గురవుతున్నాయని ఆవేదన వ్యక్తం చేశారు. నది మధ్యలో నుంచి మాత్రమే ఇసుకను తరలించాల్సి ఉండగా, అడ్డదిడ్డంగా తవ్వకాలు చేపట్టడం వల్ల నది ప్రవాహం దిశ మారి పట్టా భూములు కోతకు గురవుతున్నాయని తెలిపారు. ఇసుక వ్యాపారులు నిబంధనలు పట్టించుకోకుండా భారీ యంత్రాలతో తవ్వకాలు చేపడుతున్నారని ఆరోపించారు.
ఈ విషయంపై అధికారులు వెంటనే స్పందించి ఇసుక తవ్వకాలను నియంత్రించాలని, తమ భూములను కాపాడేందుకు చర్యలు తీసుకుని న్యాయం చేయాలని శెట్టి రమేష్ డిమాండ్ చేశారు.