డిజిటల్ మనీకి ఛార్జీల సంకెళ్లు!

కారేపల్లి (సింగరేణి), సెప్టెంబర్ 18 (లోకల్ గైడ్ న్యూస్) : డిజిటల్ చెల్లింపులపై అదనపు ఛార్జీల విధానం పేదలు, మధ్యతరగతి ప్రజలు, చిరు వ్యాపారులపై భారం మోపేలా ఉందని సీపీఐ(ఎం) జిల్లా కమిటీ సభ్యులు కొండబోయిన నాగేశ్వరరావు, సింగరేణి మండల కార్యదర్శి కె. నరేంద్ర అన్నారు. యూపీఐ లావాదేవీలకు సంబంధించిన ఎండీఆర్ విధానాన్ని పునఃపరిశీలించి, అదనపు భారం లేకుండా చూడాలని వారు డిమాండ్ చేశారు. శుక్రవారం కారేపల్లిలో విలేకరులతో మాట్లాడుతూ.. రూ.2 వేలకుపైబడిన అర్హత కలిగిన వ్యాపారి-వినియోగదారుల యూపీఐ లావాదేవీలపై 0.4 శాతం ఎండీఆర్ వర్తించనున్నట్లు పేర్కొన్నారు. ఈ ఛార్జీ నేరుగా వినియోగదారుడిపై పన్నుగా విధించేది కాకపోయినా, చిన్న వ్యాపారుల లావాదేవీ వ్యయాన్ని పెంచే అవకాశం ఉందని వారు ఆందోళన వ్యక్తం చేశారు.చిన్న దుకాణాలు, టీ కొట్లు, చిరు వ్యాపారాలు, పెట్రోల్ బంకులు తదితర ప్రాంతాల్లో యూపీఐ చెల్లింపులు రోజువారీ లావాదేవీల్లో భాగమయ్యాయని వారు పేర్కొన్నారు. డిజిటల్ చెల్లింపులను ప్రోత్సహించిన ప్రభుత్వం ఇప్పుడు వాటిపై అదనపు వ్యయాన్ని తీసుకురావడం వల్ల నగదు లావాదేవీలు పెరిగే పరిస్థితి ఏర్పడవచ్చని అభిప్రాయపడ్డారు. నల్లధనాన్ని అరికట్టడం, డిజిటల్ లావాదేవీలను విస్తరించడం వంటి లక్ష్యాలతో గతంలో తీసుకున్న చర్యల నేపథ్యంలో ప్రస్తుత ఛార్జీల విధానంపై కేంద్రం పునరాలోచించాలని నాగేశ్వరరావు, నరేంద్ర కోరారు. పేదలు, మధ్యతరగతి ప్రజలు, చిన్న వ్యాపారులపై ప్రభావం పడకుండా యూపీఐ వ్యవస్థను కొనసాగించాలని డిమాండ్ చేశారు. ఈ విధానాన్ని ఉపసంహరించుకోకపోతే ప్రజలను సమీకరించి కేంద్ర ప్రభుత్వ నిర్ణయానికి వ్యతిరేకంగా ఆందోళన కార్యక్రమాలను తీవ్రతరం చేస్తామని వారు హెచ్చరించారు.