కారేపల్లి (సింగరేణి), సెప్టెంబర్ 18 (లోకల్ గైడ్ న్యూస్): గణనాథుని నవరాత్రి ఉత్సవాల్లో భాగంగా గేట్ కారేపల్లి బస్టాండ్ సెంటర్లో ఐదో రోజు వేడుకలు భక్తిశ్రద్ధలు, ఉత్సాహం నడుమ ఘనంగా జరిగాయి. శ్రీ గణేష్ ఉత్సవ కమిటీ ఆధ్వర్యంలో నిర్వహించిన కార్యక్రమంలో ఉదయం కుంకుమ పూజ, సాయంత్రం దీపారాధన నిర్వహించి గణపయ్యకు నైవేద్యం సమర్పించారు. పెద్ద సంఖ్యలో భక్తులు పాల్గొని గణనాథుని దర్శించుకుని తీర్థప్రసాదాలు స్వీకరించారు.
ఈ వేడుకలకు గేట్ కారేపల్లి ఎన్ఆర్ఐ యూవ కాంగ్రెస్ పార్టీ నాయకుడు గుడిపూడి తిరుమల రావు హాజరై గణపయ్యకు ప్రత్యేక పూజలు నిర్వహించి స్వామివారి ఆశీస్సులు పొందారు. అనంతరం భక్తులతో మమేకమై ఉత్సవాల్లో ఉత్సాహంగా పాల్గొన్నారు. మహిళలు, చిన్నారులు, యువతతో కలిసి నృత్యం చేస్తూ వేడుకలకు మరింత ఉత్సాహాన్ని తీసుకొచ్చారు.
“యువతకు, మహిళలకు అండగా నేనున్నాను.. వారి ప్రతి అడుగులో ప్రోత్సాహంగా నిలుస్తాను” అన్న సందేశాన్ని తన పాల్గొనడం ద్వారా చాటుతూ తిరుమల రావు యువత, మహిళలను ఉత్సాహపరిచారు. ఆయనతో కలిసి భక్తులు నృత్యాలు చేస్తూ కేరింతలు కొట్టడంతో బస్టాండ్ సెంటర్ ఒక్కసారిగా సందడిగా మారింది. గణపయ్య నామస్మరణలు, జై గణేశ్ నినాదాలతో ఉత్సవ ప్రాంగణం మార్మోగింది.
గణపయ్య సేవను భక్తితో కొనసాగిస్తున్న తిరుమల రావు సింగరేణి మండలంలోని వివిధ గ్రామాల్లో జరుగుతున్న వినాయక నవరాత్రి ఉత్సవాల్లో పాల్గొంటూ స్వామివారి ఆశీస్సులు పొందుతున్నారు. పలు గ్రామాల్లో నిర్వహిస్తున్న ప్రత్యేక పూజలు, అన్నదాన కార్యక్రమాల్లో భాగస్వామ్యమవుతూ భక్తులు, గ్రామస్తులతో మమేకమవుతున్నారు. ఉత్సవాల్లో యువత, మహిళలు, చిన్నారుల భాగస్వామ్యాన్ని ప్రోత్సహిస్తూ వారితో కలిసి కార్యక్రమాల్లో పాల్గొంటున్నారు.
గేట్ కారేపల్లి బస్టాండ్ సెంటర్లో సాయంత్రం మహిళలు కోలాటాలతో, యువత–చిన్నారులు నృత్యాలతో సందడి చేయగా, డీజే పాటలతో ఉత్సవ వాతావరణం మరింత ఉత్సాహభరితంగా మారింది. తిరుమల రావు భక్తులతో కలిసి నృత్యం చేయడంతో కార్యక్రమంలో ప్రత్యేక ఉత్సాహం నెలకొంది.
ప్రతిరోజూ ప్రత్యేక పూజలు, నైవేద్యాలు, సాంస్కృతిక కార్యక్రమాలతో కొనసాగుతున్న గణేష్ నవరాత్రి ఉత్సవాల్లో ఐదో రోజు గేట్ కారేపల్లి గ్రామ ప్రజలు అధిక సంఖ్యలో పాల్గొని గణనాథుని ఆశీస్సులు పొందారు.
About The Author
