కారేపల్లిలో ఘనంగా సర్దార్ సర్వాయి పాపన్న గౌడ్ 376వ జయంతి వేడుకలు

అణగారిన వర్గాల ఆత్మగౌరవం కోసం పోరాడిన వీరయోధుడు, మొఘల్ నిరంకుశ పాలనకు వ్యతిరేకంగా తిరుగుబాటు బావుటా ఎగురవేసిన సర్దార్ సర్వాయి పాపన్న గౌడ్ 376వ జయంతి వేడుకలను కారేపల్లి మండల గౌడ్ సంఘం అధ్యక్షులు పోలగాని శ్రీనివాసరావు ఆధ్వర్యంలో ఘనంగా నిర్వహించారు.  ఈ సందర్భంగా కారేపల్లి మండల కేంద్రంలోని సర్దార్ సర్వాయి పాపన్న గౌడ్ విగ్రహానికి నాయకులు, గౌడ్ సంఘం ప్రతినిధులు, అభిమానులు పూలమాలలు వేసి ఘనంగా నివాళులర్పించారు. అనంతరం పాపన్న గౌడ్ సేవలను, ఆయన పోరాట స్ఫూర్తిని స్మరించుకున్నారు. ఈ సందర్భంగా పోలగాని శ్రీనివాసరావు మాట్లాడుతూ.. సర్దార్ సర్వాయి పాపన్న గౌడ్ సామాజిక సమానత్వం కోసం, అణగారిన వర్గాల హక్కుల కోసం ధైర్యంగా పోరాడిన మహనీయుడని అన్నారు. మొఘల్ నిరంకుశ పాలనను ఎదిరించి ప్రజల కోసం పోరాడిన ఆయన ధైర్యసాహసాలు నేటి తరానికి స్ఫూర్తిదాయకమని పేర్కొన్నారు. పాపన్న గౌడ్ ఆశయాలను ముందుకు తీసుకెళ్లేందుకు యువత కృషి చేయాలని, సామాజిక సమానత్వం, ఆత్మగౌరవం కోసం ఆయన చూపిన బాటలో నడవాలని పిలుపునిచ్చారు. సర్దార్ సర్వాయి పాపన్న గౌడ్ చరిత్రను భావితరాలకు తెలియజేయాల్సిన బాధ్యత ప్రతి ఒక్కరిపై ఉందన్నారు. ఈ కార్యక్రమంలో గౌడ్ సంఘం నాయకులు, వివిధ పార్టీల నాయకులు, కార్యకర్తలు, యువకులు, మహిళలు, పాపన్న గౌడ్ అభిమానులు, స్థానిక ప్రజలు పెద్ద సంఖ్యలో పాల్గొని జయంతి వేడుకలను విజయవంతం చేశారు.