సూర్య తండా పాఠశాలలో ఘనంగా ఉపాధ్యాయ దినోత్సవ వేడుకలు!

సూర్య తండాలోని ఎంపీయూపీఎస్ పాఠశాలలో హెడ్‌మాస్టర్ హార్జ్య ఆధ్వర్యంలో జాతీయ ఉపాధ్యాయ దినోత్సవ వేడుకలను ఘనంగా నిర్వహించారు. భారతదేశ మాజీ రాష్ట్రపతి, ప్రముఖ విద్యావేత్త డాక్టర్ సర్వేపల్లి రాధాకృష్ణన్ జయంతిని పురస్కరించుకుని ఆయన చిత్రపటానికి పూలమాలలు వేసి ఘనంగా నివాళులు అర్పించారు. ఈ సందర్భంగా విద్యార్థులు నూతన వస్త్రాలు ధరించి ఉత్సాహంగా వేడుకల్లో పాల్గొన్నారు. ఉపాధ్యాయ దినోత్సవాన్ని పురస్కరించుకుని విద్యార్థులు ఉపాధ్యాయుల వేషధారణలో తరగతులు నిర్వహించి, తోటి విద్యార్థులకు పాఠాలు బోధించారు. చిన్నారుల ఈ వినూత్న కార్యక్రమం ఉపాధ్యాయులు, తల్లిదండ్రులు, గ్రామ పెద్దలను విశేషంగా ఆకట్టుకుంది. అనంతరం విద్యార్థులకు సాంస్కృతిక కార్యక్రమాలు నిర్వహించారు. పాటలు, ఆటలు, వివిధ వినోద కార్యక్రమాలతో పాఠశాల ఆవరణ సందడిగా మారింది. అనంతరం కేక్ కట్ చేసి ఉపాధ్యాయ దినోత్సవ వేడుకలను ఆనందోత్సాహాల మధ్య జరుపుకున్నారు. ఈ సందర్భంగా హెడ్‌మాస్టర్ హార్జ్య మాట్లాడుతూ.. విద్యార్థుల జీవితాలను తీర్చిదిద్దడంలో ఉపాధ్యాయుల పాత్ర ఎంతో గొప్పదని తెలిపారు. విద్యతో పాటు క్రమశిక్షణ, నైతిక విలువలు, సమాజం పట్ల బాధ్యతను విద్యార్థుల్లో పెంపొందించడంలో గురువులు మార్గదర్శకులుగా నిలుస్తారని వివరించారు. డాక్టర్ సర్వేపల్లి రాధాకృష్ణన్ విద్యారంగానికి చేసిన సేవలను విద్యార్థులకు తెలియజేశారు. విద్యార్థుల్లో సృజనాత్మకత, నాయకత్వ లక్షణాలను పెంపొందించేందుకు ఇటువంటి కార్యక్రమాలు ఎంతో ఉపయోగపడతాయని హెడ్‌మాస్టర్ హార్జ్య పేర్కొన్నారు. ఈ కార్యక్రమంలో పాఠశాల ఉపాధ్యాయులు సుజాత, విజయకుమారి, వీరన్న, గ్రామ పెద్దలు, విద్యార్థుల తల్లిదండ్రులు, గ్రామ పంచాయతీ కార్యదర్శి భార్గవి తేజ, తల్లిదండ్రుల సంఘం ప్రతినిధి లక్ష్మి, సహాయక సిబ్బంది, విద్యార్థులు తదితరులు పాల్గొన్నారు.