బంజారా సంస్కృతి, సంప్రదాయాలకు ప్రతీక తీజ్ పండుగ

ఖమ్మం జిల్లా, కారేపల్లి, ఆగష్టు 23 (లోకల్ గైడ్):

బంజారా సంస్కృతి, సంప్రదాయాలకు ప్రతీకగా నిలిచే తీజ్ పండుగను దుబ్బ తండాలో ఘనంగా నిర్వహించారు. పండుగ సందర్భంగా గ్రామంలో డీజేలను ఏర్పాటు చేసి యువతులు తొమ్మిది రోజుల పాటు బంజారా సంప్రదాయాలకు అనుగుణంగా భక్తిశ్రద్ధలతో తీజ్ పూజలు నిర్వహించారు. అనంతరం తీజ్ నిమజ్జన కార్యక్రమాన్ని ఉత్సాహంగా చేపట్టారు.

ఈ సందర్భంగా దేవతలకు ప్రత్యేక పూజలు నిర్వహించి నైవేద్యాలు సమర్పించారు. యువతులు సంప్రదాయ దుస్తులు ధరించి బంజారా సంప్రదాయ నృత్యాలతో సందడి చేశారు. గ్రామంలోని మహిళలు, యువత, చిన్నారులు పెద్ద సంఖ్యలో పాల్గొని వేడుకలను వైభవంగా నిర్వహించారు.

ప్రకృతిని, పంటలను, పశుసంపదను గౌరవించే బంజారా సమాజంలో తీజ్ పండుగకు విశిష్టమైన స్థానం ఉందని దుబ్బ తండా సర్పంచ్ ఆంగోత్ మాతృనాయ తెలిపారు. తరతరాలుగా వస్తున్న బంజారా సంస్కృతి, సంప్రదాయాలను కాపాడుతూ భావితరాలకు అందించాల్సిన బాధ్యత ప్రతి ఒక్కరిపై ఉందన్నారు. తీజ్ పండుగ ప్రజలందరినీ ఒక్కచోట చేర్చి ఐక్యతను, సోదరభావాన్ని చాటుతుందని పేర్కొన్నారు.

పండుగ సందర్భంగా గ్రామంలో ఆధ్యాత్మిక వాతావరణం నెలకొనగా, యువతుల సంప్రదాయ నృత్యాలు, పాటలు ప్రత్యేక ఆకర్షణగా నిలిచాయి. తీజ్ నిమజ్జనంతో వేడుకలు ఘనంగా ముగిశాయి.