సిద్దిపేట, సెప్టెంబర్ 07(లోకల్ గైడ్):
సిద్దిపేట ప్రభుత్వ ఆస్పత్రిలో ల్యాబ్ టెక్నీషియన్ పవన్ మృతి ఘటనపై సమగ్ర దర్యాప్తు జరిపించాలని బహుజన లెఫ్ట్ పార్టీ (బీఎల్పీ) సిద్దిపేట జిల్లా అధ్యక్షుడు తలారి ప్రవీణ్ కుమార్ డిమాండ్ చేశారు. ప్రభుత్వ ఆస్పత్రిలో పనిచేస్తున్న కాంట్రాక్ట్, ఔట్సోర్సింగ్ ఉద్యోగుల సమస్యలను పరిష్కరించాలని కోరుతూ సోమవారం జిల్లా కలెక్టర్కు వినతిపత్రం అందజేశారు.ఈ సందర్భంగా ప్రవీణ్ కుమార్ మాట్లాడుతూ.. కాంట్రాక్ట్, ఔట్సోర్సింగ్ ఉద్యోగులకు నెలల తరబడి జీతాలు అందకపోవడం, ఉద్యోగ భద్రత లేకపోవడం వల్ల తీవ్ర ఆందోళనకు గురవుతున్నారని అన్నారు. 10–15 ఏళ్లుగా పనిచేస్తున్నప్పటికీ ఉద్యోగ భద్రత లేకపోవడం బాధాకరమన్నారు. ఇటీవల ఆస్పత్రిలో చోటుచేసుకున్న ఘటనల నేపథ్యంలో ఉద్యోగుల్లో అభద్రతా భావం నెలకొందని పేర్కొన్నారు.ప్రభుత్వ ఆస్పత్రిలో కాంట్రాక్టర్ చల్ల శ్రీనివాసరెడ్డి వ్యవహారాలపై పూర్తిస్థాయిలో విచారణ జరిపి, తప్పులు నిర్ధారణైతే కాంట్రాక్టును రద్దు చేయాలని డిమాండ్ చేశారు. తొలగించిన ల్యాబ్ టెక్నీషియన్లను వెంటనే విధుల్లోకి తీసుకోవాలని కోరారు.అలాగే ఆస్పత్రి సూపరింటెండెంట్ పనితీరుపై ఉన్న ఆరోపణలు, అనుమానాలపై కూడా సమగ్ర విచారణ జరిపించాలని కలెక్టర్ను కోరారు. ఆస్పత్రిలో పనిచేస్తున్న కాంట్రాక్ట్, ఔట్సోర్సింగ్ ఉద్యోగుల సమస్యలను ప్రభుత్వం తక్షణమే పరిష్కరించాలని విజ్ఞప్తి చేశారు.ఈ కార్యక్రమంలో బీఎల్పీ నాయకులు దబ్బేట ఆనంద్, దబ్బేట భగవాన్, వెంకటస్వామి తదితరులు పాల్గొన్నారు.
