బోసిపోయిన జిన్నింగ్ మిల్లులు.

*లోకల్ గైడ్/ తాండూర్:* 

పెద్దేముల్ మండల పరిధిలోని మారేపల్లి గ్రామ శివారులో గల కాటన్ కార్పొరేషన్ ఆఫ్ ఇండియా (సీసీఐ) జిన్నింగ్ పత్తి మిల్లులలో కొనుగోళ్లు లేక మిల్లులు బోసిపోయాయి. సుమిత్ర, జిన్నింగ్ పత్తి మార్కెట్లో కనీసం ఒక్కరంటే ఒక్క రైతు కూడా పత్తి విక్రయించకపోవడంతో మిల్లు పూర్తిగా బోసిపోయాయి. అయితే కాటన్ కార్పొరేషన్ ఆఫ్ ఇండియా కొత్తగా తెచ్చిన నిబంధనలను వెంటనే సడలించాలని డిమాండ్ చేస్తూ...వ్యాపారులు, జిన్నింగ్ మిల్లుల యాజమాన్యాలు గత రెండు రోజులుగా నిరవధిక బంద్ కు పిలుపునిచ్చాయి. ఈ నేపథ్యంలో పత్తి విక్రయాలు పూర్తిగా నిలిచిపోయాయి. కాగా సీసీఐ యాజమాన్యం కొన్ని మిల్లులకు మాత్రమే పత్తి కొనుగోలు చేసే అవకాశం ఇవ్వడంతో, కొంతమందికే అవకాశం దక్కింది.దీంతో సీసీఐ తీరును తప్పుపడుతూ పత్తి కొనుగోలు నిలిపివేశారు. ఈ క్రమంలో సీసీఐ పత్తి కొనుగోలు కేంద్రాలు ఎక్కడికక్కడ నిలిచిపోయాయి. ఈ మేరకు సీసీఐ తీసుకొచ్చిన పలు నిబంధనలను తక్షణమే విరమించుకోవాలని మిల్లు యాజమానులు పలువురు ఆగ్రహం వ్యక్తం చేస్తున్నారు. ఇదిలా ఉంటే సీసీఐ కొనుగోలు కేంద్రాలు సడన్గా నిలిచిపోవడంతో, పత్తి విక్రయించేందుకు వేరే మార్గం లేకపోవడంతో రైతులు ఆందోళన వ్యక్తం చేస్తున్నారు. అంతేకాకుండా కిసాన్ కపాస్ యాప్ ద్వారా ముందుగానే స్లాట్ బుక్ చేసుకున్న రైతులు తమ పరిస్థితి ఏంటని ఆందోళన చెందుతున్నారు.

జోరు అందుకున్న దళారుల తూకాలు!*

ఇదే అదును చూసుకొని నియోజకవర్గ పరిధిలో పలువురు దళారులు రైతుల నుంచి పత్తి కొనుగోలు చేస్తున్నారు. రైతులు చేసేదేమీ లేక మరో మార్గం లేదని దళారుల వద్దకే పత్తి విక్రయించేందుకు తీసుకెళ్తున్నారు. ఆరుగాలం కష్టపడి వేలాది రూపాయలు లాగోడి పెట్టి, చివరకు పంట చేతికొచ్చిన దశలో సీసీఐ పత్తి కొనుగోలు కేంద్రాలు ఆకస్మాత్తుగా నిలిపివేయడంతో మండలంలోని ఆయా గ్రామాల పత్తి రైతులు దిక్కుతోచని స్థితిలో ఉండిపోయారు. తక్షణమే ప్రభుత్వ సీసీఐ కొనుగోలు కేంద్రాలను పునః ప్రారంభించి దళారుల నుంచి రైతులను కాపాడాలంటూ మండలంలోని ఆయా గ్రామాల రైతులు అధికారులను డిమాండ్ చేస్తున్నారు.