అశ్వరావుపేట, సెప్టెంబర్ 7 లోకల్ గైడ్ :
తెలంగాణ రాష్ట్రంలో వ్యవసాయ రంగాన్ని మరింత బలోపేతం చేసేందుకు ప్రభుత్వం ప్రత్యేక దృష్టి సారించింది. ఇందులో భాగంగా అశ్వరావుపేటలో ఉన్న పామాయిల్ ఫ్యాక్టరీని రాష్ట్ర వ్యవసాయ శాఖ మంత్రి తుమ్మల నాగేశ్వరరావు ఆకస్మికంగా తనిఖీ చేశారు. తనిఖీ అనంతరం మీడియాతో మాట్లాడిన ఆయన, పలు కీలక అంశాలను వెల్లడించారు.
తెలంగాణ వ్యాప్తంగా 10 లక్షల ఎకరాల్లో ఆయిల్ ఫామ్ సాగు లక్ష్యంగా పెట్టుకున్నట్లు మంత్రి తెలిపారు. రాష్ట్రంలోని మొత్తం 31 జిల్లాల్లో సుమారు 20 లక్షల ఎకరాలు ఆయిల్ ఫామ్ సాగుకు అనుకూల వాతావరణం కలిగి ఉన్నదని చెప్పారు. ప్రతి ఉమ్మడి జిల్లాకు లక్ష ఎకరాల చొప్పున ఆయిల్ ఫామ్ సాగు చేపడతామని వెల్లడించారు.
సిద్ధిపేటలో కొత్త ఫ్యాక్టరీ ప్రారంభం:
పామాయిల్ అభివృద్ధి దిశగా మరో ముందడుగు వేస్తూ సిద్ధిపేటలో నిర్మించిన పామాయిల్ ఫ్యాక్టరీను త్వరలో ముఖ్యమంత్రి రేవంత్ రెడ్డి చేతుల మీదుగా ప్రారంభించనున్నట్లు మంత్రి చెప్పారు. ఇది రాష్ట్రంలో ఆయిల్ ఫామ్ రంగానికి పెద్ద ఉత్సాహాన్నిస్తుందని పేర్కొన్నారు.
రైతులకు గిట్టుబాటు ధర, కేంద్రానికి విజ్ఞప్తి:
పామాయిల్ గెలలను టన్నుకు రూ. 25,000 గిట్టుబాటు ధరగా నిర్ణయించాలన్న ప్రోత్సహాన్ని కేంద్ర వ్యవసాయ శాఖ మంత్రికి స్వయంగా వివరించినట్లు మంత్రి తెలిపారు. రైతులు తమ ఆత్మగౌరవంతో జీవించాలంటే వ్యవసాయం బలపడాల్సిన అవసరం ఉందని చెప్పారు.
ప్రైవేట్ రంగంలో భాగస్వామ్యం:
ఆయిల్ ఫెడ్ తో పాటు ప్రైవేట్ రంగంలో కూడా పామాయిల్ రిఫైనరీలు ఏర్పడుతున్నాయని, దీనివల్ల రైతులకు నిలకడగా మార్కెట్ లభిస్తుందని, దీర్ఘకాలిక లాభాలు పొందగలుగుతారని మంత్రి వివరించారు. ఆయిల్ ఫామ్ పంటల సాగు ఇతర పంటలతో పోలిస్తే ఎక్కువ ఆదాయాన్ని ఇస్తుందని, దీని ద్వారా రైతుల ఆర్థిక స్థితిలో గణనీయమైన మార్పు వచ్చే అవకాశముందని వెల్లడించారు.
తెలంగాణకు జాతీయ హబ్గా అవకాశం:
రానున్న రోజుల్లో తెలంగాణ రాష్ట్రం ఆయిల్ ఫామ్ సాగులో దేశానికి హబ్గా మారే అవకాశముందని తుమ్మల నమ్మకం వ్యక్తం చేశారు. ఈ కార్యక్రమాలు పూర్తిగా అమలయ్యేలా చూడటమే తన ప్రాధాన్య కర్తవ్యమని చెప్పారు.
తెలంగాణలో వ్యవసాయ రంగ అభివృద్ధికి పామాయిల్ సాగు కీలక భూమిక పోషించనుందని మంత్రి తుమ్మల స్పష్టం చేశారు. ప్రభుత్వ ప్రణాళికలు అమలవుతున్నపుడు, రైతులు నిస్సందేహంగా ఆర్థికంగా బలపడతారని విశ్వాసం వ్యక్తం చేశారు.
About The Author
