ఇంగ్లండ్‌ పర్యటనలో టీమ్‌ఇండియా సారథి శుభ్‌మన్‌ గిల్‌ మరోసారి శతకం (216 బంతుల్లో 114 నాటౌట్‌, 12 ఫోర్లు) నమోదు చేశాడు. మొదటి టెస్టులో సెంచరీ చేసిన గిల్‌.. బర్మింగ్‌హామ్‌లోని ఎడ్జ్‌బాస్టన్‌ వేదికగా బుధవారం మొదలైన రెండో టెస్టులోనూ మూడంకెల స్కోరు చేసి భారత్‌కు బలాన్ని ఇచ్చాడు. తొలి రోజు ఆట ముగిసే సమయానికి భారత్‌ 85 ఓవర్లలో 5 వికెట్లు కోల్పోయి 310 పరుగులు చేసింది.ఓపెనర్‌ జైస్వాల్‌ 107 బంతుల్లో 87 పరుగులు (13 ఫోర్లు) చేయగా, జడేజా 67 బంతుల్లో 41 నాటౌట్‌ (5 ఫోర్లు) తో రాణించాడు. వోక్స్‌ 2, కార్స్‌, స్టోక్స్‌, బషీర్‌ తలా ఒక వికెట్‌ తీశారు.
టాస్‌ ఓడి బ్యాటింగ్‌ చేసిన భారత్‌ 9వ ఓవర్లోనే రాహుల్‌ (2)ను కోల్పోయింది. మూడో స్థానంలో వచ్చిన కరుణ్‌ నాయర్‌ (31) జైస్వాల్‌కు తోడుగా నిలిచాడు. జైస్వాల్‌ 59 బంతుల్లో అర్ధశతకం పూర్తి చేసి, కార్స్‌ బౌలింగ్‌లో 87 పరుగులకు అవుటయ్యాడు.
గిల్‌ శతకం:
జైస్వాల్‌ అవుటైన తరువాత గిల్‌ పంత్‌ (25)తో పాటు జడేజా సహకారంతో ఇన్నింగ్స్‌ను చక్కదిద్దాడు. బషీర్‌ బౌలింగ్‌లో హాఫ్‌ సెంచరీ పూర్తి చేసిన గిల్‌.. రూట్‌ ఓవర్లో వరుస బౌండరీలతో తన ఏడో టెస్ట్‌ శతకాన్ని, సారథిగా మూడు ఇన్నింగ్స్‌లలో రెండో శతకాన్ని నమోదు చేశాడు. జడేజాతో కలిసి 99 పరుగుల భాగస్వామ్యం నెలకొల్పాడు.
ఈ సిరీస్‌కు ముందు ఇంగ్లండ్‌లో గిల్‌ అత్యుత్తమ స్కోరు 28గా ఉండగా, ఇప్పుడే రెండు టెస్టుల్లో రెండు శతకాలు సాధించడం విశేషం.
సంక్షిప్త స్కోరు:
భారత్‌ మొదటి ఇన్నింగ్స్‌: 310/5 (గిల్‌ 114*, జైస్వాల్‌ 87; వోక్స్‌ 2/59, కార్స్‌ 1/49).
About The Author
